Abhijeet Dipke Arrest: CJP कार्यकर्त्यांना पकडायला महिला पोलीस का? 'इंदिरा गांधींनीही असं केलं नव्हतं' दीपके का म्हणाला?

बंगळुरूमध्ये फ्लॉप झालेल्या आंदोलनानंतर दिल्लीला पोहोचलेले CJP नेते अभिजीत दीपके आणि त्यांच्या साथीदारांना विमानातच महिला पोलिसांनी ताब्यात घेतलं. विमानात गोंधळ किंवा हिंसाचार होऊ नये म्हणून दिल्ली पोलिसांनी ही खास रणनीती वापरली.

काही दिवसांपूर्वी बंगळुरूच्या फ्रीडम पार्कमध्ये एक आंदोलन झालं होतं. अमेरिकेवरून लाखो रुपये खर्च करून आलेला कॉकरोच जनता पार्टीचा (CJP) नेता अभिजीत दीपके, जर्मनीवरून आलेला यूट्यूबर ध्रुव राठी आणि कायम भाजप-आरएसएसवर टीका करणारे अभिनेते प्रकाश राज यांच्या नेतृत्वाखाली हे आंदोलन होतं. पण हे आंदोलन पूर्णपणे फ्लॉप ठरलं. जेन झी (Gen Z) मुलांनी या आंदोलनाकडे पाठ फिरवली. शेवटी, अभिनेत्री रचिता राम हिचा वाढदिवस असल्यामुळे तिकडे गर्दी गेली आणि इकडे लोक कमी पडले, अशी सारवासारव करण्याची वेळ यांच्यावर आली. बंगळुरूत काहीच झालं नाही, तर किमान दिल्लीत जाऊन तरी गोंधळ घालू, असा विचार करून हे लोक दिल्लीला निघाले. पण तिथे जंतरमंतरवर त्यांना आंदोलनासाठी परवानगीच मिळाली नाही. याआधी आंदोलनाच्या नावाखाली झालेला हिंसाचार, दगडफेक आणि जेन झीच्या नावाखाली बाहेरच्या शक्तींनी केलेला राडा, यामुळे केंद्र सरकारला बदनाम करण्याचा त्यांचा डाव उधळला गेला आणि त्यांना परवानगी नाकारण्यात आली.

महिला पोलीसच का?

आज सकाळी एअर इंडियाचं विमान दिल्ली विमानतळावर लँड होताच एक नाट्यमय घडामोड पाहायला मिळाली. CJP चे सदस्य सौरव दास, आशुतोष रंका आणि अभिजीत दीपके यांना महिला पोलिसांनी विमानातच ताब्यात घेतलं. पोलिसांनी थेट विमानात घुसून ही कारवाई केली. पण त्यांना पकडण्यासाठी महिला पोलिसांनाच का पाठवलं, हा आता चर्चेचा विषय बनला आहे.

याबाबत कोणतीही अधिकृत माहिती समोर आलेली नाही. पण, जर पुरुष पोलीस गेले असते, तर मागच्या वेळेसारखा आंदोलनाच्या नावाखाली पुन्हा हिंसाचार भडकण्याची शक्यता होती. विमानात जागा खूप कमी असते. तिथे झालेली छोटीशी बाचाबाचीही मोठ्या गोंधळात बदलू शकते. त्यामुळे विमानात कोणताही तणाव निर्माण होऊ नये, यासाठी महिला अधिकाऱ्यांना पाठवण्याचा निर्णय दिल्ली पोलिसांनी घेतला असावा. अपेक्षेप्रमाणे, महिला पोलीस समोर आल्यावर थोडीफार शाब्दिक चकमक झाली आणि दीपकेसह इतर CJP नेत्यांना ताब्यात घेण्यात आलं. २० जुलैला झालेल्या दंगलीच्या आठवणी अजूनही ताज्या आहेत. त्यामुळे दिल्ली पोलिसांनी यावेळी अतिशय अचूक रणनीती आखली. याआधी CJP ने पुरुष पोलिसांवर तरुणींना मारहाण केल्याचा आरोप केला होता, त्यामुळेच महिला पोलिसांना पुढे करणं ही एक जाणीवपूर्वक खेळलेली खेळी असू शकते.

'इंदिरा गांधींनीही असं केलं नव्हतं' - दीपके

पोलीस विमानात शिरताच दीपकेने खिडकीच्या सीटवरून व्हिडिओ रेकॉर्ड करायला सुरुवात केली. दास मधल्या सीटवर होता आणि रंका त्याच्या शेजारी बसला होता. पोलिसांना पाहताच CJP नेत्यांनी "इन्कलाब झिंदाबाद" आणि "भारत माता की जय" अशा घोषणा द्यायला सुरुवात केली. जवळपास डझनभर महिला पोलिसांनी या नेत्यांना गराडा घातला. ताब्यात घेण्यापूर्वी दीपकेने पोलिसांना अनेक प्रश्न विचारले. "आम्ही विमानातून खाली उतरेपर्यंत तुम्ही थांबू शकला असता," असं तो पोलिसांना म्हणाला.

"इंदिरा गांधींनीही असं केलं नव्हतं. देश कुठे चाललाय हे तुम्ही पाहू शकता. हे लोक आम्हाला थेट विमानातूनच अटक करायला आलेत," असं दीपके एका व्हिडिओमध्ये बोलताना दिसतोय. "ही तर हुकूमशाही आहे. मी इथे अटकेसाठीच आलोय, करा मला अटक," असंही तो पोलिसांना उद्देशून म्हणताना दिसतोय.