Tirupati Temple: तिरुपतीच्या दानपेटीत पैशांचा पाऊस, एका दिवसात जमा झाले तब्बल 6.93 कोटी रुपये!

गणेशोत्सवाच्या सुट्ट्यांमुळे तिरुपती मंदिरात भक्तांची गर्दी वाढली आहे. याच दरम्यान, मंदिराच्या दानपेटीत एकाच दिवसात तब्बल ६.९३ कोटी रुपयांची देणगी जमा झाली असून, हा एक नवीन विक्रम आहे.

तिरुपती (१२ सप्टेंबर): तिरुपती बालाजीच्या दर्शनासाठी दररोज हजारो भाविक येतात. सणासुदीच्या आणि सुट्ट्यांच्या दिवसात तर हा आकडा लाखांवर पोहोचतो. आता तिरुपतीच्या दानपेटीने एक नवा विक्रम केला आहे. गुरुवारी एकाच दिवसात तब्बल ६.९३ कोटी रुपयांची देणगी जमा झाली आहे. तिरुमला तिरुपती देवस्थानच्या इतिहासातील ही दुसरी सर्वात मोठी एकदिवसीय देणगी ठरली आहे.

एकाच दिवशी अनेक विक्रम

विशेष दिवसांमुळे तिरुपती तिरुमला मंदिरात भक्तांची संख्या वाढली आहे. तिरुपती तिरुमलाच्या इतिहासात एकाच दिवशी ७.६८ कोटी रुपयांची देणगी जमा होण्याचा सर्वात मोठा विक्रम आहे. आता ६.९३ कोटी रुपयांसह दुसरा सर्वात मोठा विक्रम नोंदवला गेला आहे. एका दिवसात ६ कोटी रुपयांपेक्षा जास्त देणगी जमा होण्याची ही सातवी वेळ आहे. लाँग वीकेंडमुळे भक्तांची गर्दी वाढल्याने हे शक्य झाले.

तिरुपतीमधील देणगीचे आकडे

यापूर्वी २ जानेवारी २०२३ रोजी वैकुंठ एकादशीच्या दिवशी ७.६८ कोटी रुपये जमा झाले होते, जो आतापर्यंतचा सर्वाधिक आकडा आहे. याशिवाय, १ एप्रिल २०१८ रोजी ६.४५ कोटी रुपये, २३ ऑक्टोबर २०२२ रोजी ६.३१ कोटी रुपये, २६ जुलै २०१८ रोजी ६.२८ कोटी रुपये, ४ जुलै २०२२ रोजी ६.१८ कोटी रुपये आणि १८ ऑगस्ट २०२६ रोजी ६.१२ कोटी रुपये जमा झाले होते.

तिरुपती भक्तांसाठी विमा

अलीकडेच, तिरुमला तिरुपती देवस्थानने भक्तांसाठी विमा संरक्षण वाढवले आहे. ही रक्कम ३ लाख रुपयांवरून १० लाख रुपये करण्यात आली आहे. तिरुमला तिरुपतीच्या दर्शनासाठी आलेल्या भक्ताचा अपघाती मृत्यू झाल्यास, त्याच्या कुटुंबाला १० लाख रुपयांची विमा रक्कम दिली जाईल. तसेच, भक्ताचा नैसर्गिक मृत्यू झाल्यास २ लाख रुपयांचे विमा संरक्षण दिले जाणार आहे. अपघात विम्यासोबतच नैसर्गिक मृत्यूसाठीही विमा देऊन तिरुपती भक्तांना संपूर्ण विमा संरक्षण देण्याचा देवस्थानचा प्रयत्न आहे.