Extramarital Affair : मेहुण्यासोबत होते अफेअर, नवऱ्याला कळताच तीन मुलांच्या आईने त्याला जिवंत जाळलं!

Tamil Nadu Woman Burns Husband Alive : तामिळनाडूच्या कल्लाकुरिचीमध्ये एक धक्कादायक घटना घडली आहे. एका महिलेने तिच्या अनैतिक संबंधाला नवऱ्याने विरोध केल्याने, त्याला दारूच्या नशेत असताना पेट्रोल टाकून जिवंत जाळलं. 

Tamil Nadu Woman Burns Husband Alive : तामिळनाडूतील सेलमजवळच्या कल्लाकुरिचीमध्ये एक अत्यंत धक्कादायक घटना घडली आहे. एका महिलेने दारूच्या नशेत असलेल्या नवऱ्यावर पेट्रोल ओतून त्याला पेटवून दिलं. त्यानंतर नवऱ्याने आत्महत्या केल्याचा बनाव रचला. मात्र, ही संपूर्ण घटना सीसीटीव्हीमध्ये कैद झाल्याने पोलिसांच्या तपासात हा हत्येचा प्रकार असल्याचं उघड झालं. अम्मू असं आरोपी पत्नीचं नाव असून, अँटनी रॉबिन असं हत्या झालेल्या पतीचं नाव आहे. तो मामंडल रोडचा रहिवासी होता आणि सेलमच्या चिन्नातिरुपती भागातील एका गॅस कंपनीत काम करत होता.

सीसीटीव्हीमध्ये कैद झालं थरारक दृश्य

सुरुवातीला, पत्नी अम्मूने पोलिसांना सांगितलं की तिचा पती अँटनी रॉबिनने दारूच्या नशेत स्वतःवर पेट्रोल ओतून आत्महत्या केली. पण घरासमोरील रस्त्यावर लावलेल्या सीसीटीव्हीमध्ये ती स्वतःच लायटरने पतीला आग लावत असल्याचं स्पष्ट दिसलं. या घटनेनंतर शेजाऱ्यांनी रॉबिनला तातडीने सेलमच्या सरकारी रुग्णालयात दाखल केलं, पण तो ९० टक्के भाजला होता. त्यामुळे उपचारादरम्यान त्याचा मृत्यू झाला.

रविवारी पहाटे अंगाला आग लागल्यानंतर अँटनी जीव वाचवण्यासाठी किंचाळत पळत सुटल्याचं सीसीटीव्ही फुटेजमध्ये दिसतंय. सुरुवातीला पत्नी अम्मूने आत्महत्याचा बनाव रचला होता. शेजाऱ्यांनी त्याला आधी कल्लाकुरिची सरकारी रुग्णालयात आणि नंतर पुढील उपचारांसाठी सेलममधील रुग्णालयात नेलं.

जेव्हा पोलिसांनी या प्रकरणाचा तपास सुरू केला आणि परिसरातील सीसीटीव्ही फुटेज तपासले, तेव्हा केसला एक अनपेक्षित वळण मिळालं. सीसीटीव्हीमधील दृश्य आणि पत्नी अम्मूच्या जबाबात मोठी तफावत होती. व्हिडिओमध्ये दिसतंय की, अँटनी घरातून बाहेर येतो आणि अंगावरील पेट्रोल पुसण्याचा प्रयत्न करतो. पण, पत्नी अम्मू त्याच्या मागे येते आणि मुद्दाम लायटरने त्याला आग लावते.

तीन मुलांच्या आईचे मेहुण्यासोबतच होते संबंध

अँटनी आणि अम्मू यांच्या लग्नाला अनेक वर्षे झाली होती आणि त्यांना दोन मुलं आणि एक मुलगी अशी तीन मुलं आहेत. पोलिसांच्या प्राथमिक तपासात समोर आलं आहे की, हत्येमागे अनैतिक संबंधांतून होणारे कौटुंबिक वाद हे मुख्य कारण आहे. पत्नी अम्मूचे तिच्याच बहिणीच्या पतीसोबत अफेअर असल्याची माहिती अँटनीला मिळाली होती. हे संबंध संपवण्यासाठी तो तिला वारंवार समजावत होता. याच कारणामुळे दोघांमध्ये सतत भांडणं होत होती.

पोलिसांनी दिलेल्या माहितीनुसार, शनिवारी रात्री अँटनी दारूच्या नशेत होता. याचाच फायदा घेऊन अम्मूने घरातील त्याच्या अंगावर पेट्रोल ओतलं. स्वतःला वाचवण्यासाठी तो घराबाहेर पळाला, तेव्हा अम्मूने त्याचा पाठलाग करून त्याला आग लावली. या घटनेप्रकरणी कल्लाकुरिची पोलिसांनी गुन्हा दाखल करून आरोपी पत्नी अम्मूला अटक केली आहे.