Independence Day 2026: लाल किल्ल्यावर स्वातंत्र्य दिन साजरा करणार, मग 'या' १० गोष्टी नक्की लक्षात ठेवा!

तुम्ही २०२६ च्या स्वातंत्र्य दिनाच्या सोहळ्यासाठी दिल्लीच्या लाल किल्ल्यावर जाण्याचा विचार करत आहात का? तर मग एन्ट्री पास, तिकीट, मेट्रोची वेळ, पार्किंग, सुरक्षा आणि 'वंदे मातरम्' बद्दलच्या या १० महत्त्वाच्या गोष्टी जाणून घ्या.

दिल्लीत ८० व्या स्वातंत्र्य दिनाची तयारी जोरात सुरू आहे. पंतप्रधान नरेंद्र मोदी १५ ऑगस्ट रोजी लाल किल्ल्यावर होणाऱ्या मुख्य सोहळ्याला उपस्थित राहणार आहेत. या पार्श्वभूमीवर प्रशासनाने सुरक्षा व्यवस्था अत्यंत कडक केली आहे. तसेच, कार्यक्रमाला येणाऱ्या नागरिकांसाठी एन्ट्री, मेट्रो सेवा, पार्किंग आणि वाहतुकीबद्दल संपूर्ण माहिती जाहीर केली आहे.

या १० गोष्टी लक्षात ठेवा

१. एन्ट्री पास मिळतोय का, हे तपासा

या कार्यक्रमाचे पास मिळवण्यासाठी तुम्ही सरकारच्या 'आमंत्रण' (Aamantran) या वेबसाइटला भेट देऊ शकता. सध्या तरी वेबसाइटवर पास उपलब्ध नसल्याचं दिसतंय. त्यामुळे, नवीन पास उपलब्ध झाले आहेत का, हे पाहण्यासाठी आधी वेबसाइट तपासा.

२. तीन प्रकारची तिकिटं उपलब्ध

सध्या तीन प्रकारची तिकिटं उपलब्ध आहेत. सामान्य (General) तिकीट २० रुपयांना, स्टँडर्ड (Standard) तिकीट १०० रुपयांना आणि प्रीमियम (Premium) तिकीट ५०० रुपयांना मिळत आहे.

३. बुकिंग करताना वापरलेलं ओळखपत्र सोबत ठेवा

तिकीट बुक करताना तुम्ही जे ओळखपत्र (ID) वापरलं असेल, तेच ओळखपत्र कार्यक्रमाच्या ठिकाणी सोबत घेऊन जाणं बंधनकारक आहे. आधार कार्ड, मतदार ओळखपत्र किंवा पासपोर्ट यांसारखी ओळखपत्रं ग्राह्य धरली जातील. पास दुसऱ्या कोणालाही देता येणार नाही.

४. १५ ऑगस्टला मेट्रो पहाटे ४ वाजता सुरू होणार

स्वातंत्र्य दिनाच्या दिवशी, म्हणजेच १५ ऑगस्टला दिल्ली मेट्रोची सेवा पहाटे ४ वाजल्यापासून सुरू होईल. नियमित सेवा सुरू होईपर्यंत दर ३० मिनिटांनी ट्रेन धावेल. रस्त्यांवर निर्बंध असल्यामुळे मेट्रो हा प्रवासाचा एक महत्त्वाचा पर्याय ठरू शकतो.

५. जवळची मेट्रो स्टेशन कोणती?

लाल किल्ला परिसरात पोहोचण्यासाठी तुम्ही लाल किला, जामा मशीद आणि दिल्ली गेट या मेट्रो स्टेशनचा वापर करू शकता. या ठिकाणी मोठी गर्दी आणि कडक सुरक्षा तपासणी असेल, त्यामुळे वेळेचं नियोजन करूनच निघा.

६. पार्किंगसाठी ७ जागा निश्चित

दिल्ली वाहतूक पोलिसांनी लाल किल्ल्याच्या आसपास पार्किंगसाठी सात जागा निश्चित केल्या आहेत. या जागा शोधण्यासाठी तुम्ही गुगल मॅप्स (Google Maps) आणि मॅपल्स (Mappls) वापरू शकता.

७. या वस्तू सोबत नेण्यास मनाई

सुरक्षा तपासणी खूप कडक असणार आहे. त्यामुळे बॅग, पॉवर बँक, कॅमेरा, लॅपटॉप, टॅबलेट, इअरफोन, पाण्याची बाटली, छत्री, स्प्रे, परफ्यूम, धारदार वस्तू आणि ज्वलनशील पदार्थ यांसारख्या वस्तू सोबत आणू नका.

८. सुरक्षा व्यवस्था अत्यंत कडक

दिल्ली आणि आसपासच्या परिसरात सुरक्षा वाढवण्यात आली आहे. वाहनांची तपासणी, गस्त आणि संवेदनशील भागांवर नजर ठेवली जात आहे. गुरुग्राम आणि फरिदाबादमध्येही सुरक्षा व्यवस्था कडक करण्यात आली आहे.

९. अनेक रस्त्यांवर वाहतूक बदल

लाल किल्ला आणि मध्य दिल्लीतील काही भागांतील रस्ते बंद असतील किंवा वाहतूक दुसऱ्या मार्गांवर वळवली जाईल. बस आणि व्यावसायिक वाहनांच्या वाहतुकीवरही निर्बंध असू शकतात. त्यामुळे त्रास टाळण्यासाठी घरातून लवकर निघा.

१०. 'वंदे मातरम्' ठरणार मुख्य आकर्षण

या वर्षीच्या सोहळ्याचं एक मुख्य वैशिष्ट्य म्हणजे लाल किल्ल्यावरून पहिल्यांदाच 'वंदे मातरम्'चं गायन होणार आहे. या राष्ट्रीय गीताच्या १५० व्या वर्धापन दिनानिमित्त 'युवा शक्ती'वरही विशेष भर दिला जाईल.

गुरुग्राम आणि फरिदाबादमध्येही सुरक्षा वाढवली

गुरुग्राममध्ये रॅपिड रिॲक्शन स्कॉड, इमारतींच्या छतावरून पाळत आणि घातपात विरोधी तपासणी करून सुरक्षा वाढवण्यात आली आहे. पाच अग्निशमन दल आणि रुग्णवाहिका तैनात असतील. तर फरिदाबादमध्ये आंतरराज्यीय तपासणी नाक्यांवर सुरक्षा वाढवण्यात आली आहे.

निघण्यापूर्वी सर्व गोष्टी तपासा

घरातून निघण्यापूर्वी तुमचा एन्ट्री पास, आवश्यक ओळखपत्र सोबत आहे का हे तपासा. तसेच, मेट्रो आणि वाहतुकीसंदर्भातल्या सूचना पुन्हा एकदा वाचूनच प्रवासाला सुरुवात करा.