पंतप्रधान मोदींच्या हस्ते नागपूर-पुणेसह या वंदे भारत ट्रेनचे थाटात लोकार्पण, जाणून घ्या तिकीटाची रक्कम आणि इतर माहिती

मुंबई - पंतप्रधान नरेंद्र मोदी आज रविवारी पुणे-नागपूर, बेळगाव-बंगळुरु आणि अमृतसर-वैष्णोदेवी वंदे भारत ट्रेनचे लोकार्पण केले आहे. या तिन्ही ट्रेनचा रुट आणि तिकिटांची रक्कम जाणून घ्या.

रविवारपासून (१० ऑगस्ट) तीन नवीन वंदे भारत

भारतीय रेल्वे रविवारी (१० ऑगस्ट) पासून तीन नवीन वंदे भारत एक्स्प्रेस गाड्या चालवणार आहे. पंतप्रधान नरेंद्र मोदी हे या गाड्यांना व्हर्च्युअली हिरवा झेंडा दाखवतील, अशी माहिती मिळाली आहे. या नवीन सेवा अजनी (नागपूर)-पुणे मार्ग, केएसआर बेंगळुरू-बेळगाव मार्ग आणि श्री माता वैष्णो देवी कटरा-अमृतसर मार्गावर धावणार आहेत. अर्धवेगवान या गाड्यांची भर पडल्याने कर्नाटक, महाराष्ट्र, जम्मू-कश्मीर आणि पंजाबमधील महत्त्वाच्या मार्गांवर प्रवास सुलभ होणार असून संपर्कक्षमता वाढणार आहे.

पुणे-अजनी वंदे भारत एक्स्प्रेस वेळापत्रक आणि भाडे

अजनी-पुणे सेवेसह महाराष्ट्राला त्याची १२वी वंदे भारत सेवा मिळणार आहे. रेल्वे अधिकाऱ्यांच्या मते, हा मार्ग विशेषतः व्यावसायिक, विद्यार्थी आणि नोकरीसाठी किंवा विरंगुळ्यासाठी वारंवार प्रवास करणाऱ्यांसाठी उपयुक्त ठरणार आहे. ही गाडी आठवड्यातून सहा दिवस (सोमवार वगळता) धावेल. गाडी सकाळी ९.५० वाजता अजनीवरून सुटेल आणि रात्री ९.५० वाजता पुण्यात पोहोचेल. परतीच्या प्रवासात, सकाळी ६.२५ वाजता पुण्यावरून सुटेल आणि सायंकाळी ६.२५ वाजता अजनीला पोहोचेल. प्रमुख थांबे: वर्धा, बदनेरा, अकोला, भुसावळ, जळगाव, मनमाड, कोपरगाव, अहमदनगर आणि दौंड कॉर्ड लाईन.

बेळगाव-बंगळुरू वंदे भारत एक्स्प्रेस वेळापत्रक आणि भाडे

कर्नाटकातील बेळगाव-बंगळुरू वंदे भारत एक्स्प्रेस राज्याच्या उत्तर आणि दक्षिण भागांदरम्यान जलद आणि अधिक आरामदायी प्रवासाची सुविधा देईल. ही गाडी क्रमांक 26751 बेळगाव–केएसआर बेंगळुरू आणि 26752 केएसआर बेंगळुरू–बेळगाव या क्रमांकांनी धावेल.

ही सेवा आठवड्यातून सहा दिवस (बुधवार वगळता) चालेल. सकाळी ५.२० वाजता बेळगाववरून सुटेल आणि दुपारी १.५० वाजता बेंगळुरूला पोहोचेल. परतीच्या प्रवासात, दुपारी २.२० वाजता सुटेल आणि रात्री १०.४० वाजता बेळगावला पोहोचेल. प्रमुख थांबे: यशवंतपूर, तुमकुरु, देवणगेरे, हावेरी, हुबळी आणि धारवाड.

या मार्गावरचे भाडे सीसी साठी ₹१,५७५ आणि एक्झिक्युटिव्ह क्लाससाठी ₹२,९०५ असे निश्चित केले असून यात केटरिंग शुल्क समाविष्ट आहे.

अमृतसर-श्री माता वैष्णो देवी कटरा वंदे भारत एक्स्प्रेस

उत्तर भारतातील अमृतसर-श्री माता वैष्णो देवी कटरा वंदे भारत एक्स्प्रेस अमृतसर आणि जम्मूतील तीर्थक्षेत्र कटरा यांदरम्यानची संपर्क सुविधा वाढवेल. ही गाडी आठवड्यातून सहा दिवस (मंगळवार वगळता) धावेल. सकाळी ६.४० वाजता कटऱ्यावरून सुटेल आणि दुपारी १२.२० वाजता अमृतसरला पोहोचेल. परतीच्या प्रवासात, दुपारी ४.२५ वाजता सुटेल आणि रात्री १०.०० वाजता कटऱ्यावर पोहोचेल. प्रमुख थांबे: जम्मू, पठाणकोट कॅन्ट, जालंधर सिटी आणि व्यास.

या मार्गावरील भाडे अद्याप जाहीर झालेले नाही.