Independence Day 2024: लाल किल्ल्यावर पहिल्यांदाच घुमणार 'वंदे मातरम्', युवा शक्तीचा नारा!

पंतप्रधान नरेंद्र मोदी दिल्लीतील लाल किल्ल्यावरून ८० व्या स्वातंत्र्य दिनाच्या सोहळ्याचे नेतृत्व करतील. यावर्षी 'वंदे मातरम्'ला १५० वर्षे पूर्ण होत असल्याच्या निमित्ताने लाल किल्ल्यावर पहिल्यांदाच हे राष्ट्रगीत गायले जाणार आहे. तसेच, 'विकसित भारत २०४७' साठी 'युवा शक्ती'च्या योगदानाला विशेष महत्त्व दिले जाणार आहे.

येत्या १५ ऑगस्ट रोजी पंतप्रधान नरेंद्र मोदी दिल्लीतील लाल किल्ल्यावरून ८० व्या स्वातंत्र्य दिनाच्या सोहळ्याचे नेतृत्व करणार आहेत. यावेळचा सोहळा खूप खास असणार आहे, कारण यात राष्ट्रगीत 'वंदे मातरम्'च्या १५० वर्षांच्या अजोड वारशाचं स्मरण केलं जाईल आणि २०४७ पर्यंत 'विकसित भारता'चं स्वप्न साकार करण्यासाठी 'युवा शक्ती'च्या योगदानाचा गौरव केला जाईल. विशेष म्हणजे, लाल किल्ल्यावरील स्वातंत्र्य दिनाच्या कार्यक्रमात पहिल्यांदाच 'वंदे मातरम्' गायलं जाणार आहे, अशी माहिती प्रसिद्धीपत्रकात देण्यात आली आहे.

पंतप्रधानांचे आगमन आणि गार्ड ऑफ ऑनर

पंतप्रधान लाल किल्ल्यावर पोहोचल्यावर संरक्षण मंत्री राजनाथ सिंह, संरक्षण राज्यमंत्री संजय सेठ आणि संरक्षण सचिव राजेश कुमार सिंह त्यांचं स्वागत करतील. संरक्षण सचिव दिल्ली क्षेत्राचे जनरल ऑफिसर कमांडिंग (GOC) लेफ्टनंट जनरल राजेश सेठी यांची पंतप्रधानांशी ओळख करून देतील.

त्यानंतर, दिल्ली क्षेत्राचे जीओसी पंतप्रधानांना सॅल्युटिंग बेसवर घेऊन जातील, जिथे तिन्ही सैन्य दल आणि दिल्ली पोलिसांची संयुक्त तुकडी पंतप्रधान नरेंद्र मोदींना सलामी देईल. यानंतर पंतप्रधान 'गार्ड ऑफ ऑनर'ची पाहणी करतील.

पंतप्रधानांच्या 'गार्ड ऑफ ऑनर' तुकडीमध्ये लष्कर, नौदल, हवाई दल आणि दिल्ली पोलीस यांच्या प्रत्येकी एक अधिकारी आणि २४ जवानांचा समावेश असेल. यावर्षी स्वातंत्र्य दिनाच्या सोहळ्यासाठी भारतीय लष्कर समन्वय साधणारी मुख्य सेवा आहे. 'गार्ड ऑफ ऑनर'चं नेतृत्व लेफ्टनंट कर्नल अर्जुन सिंह करतील. लष्कराच्या तुकडीचं नेतृत्व मेजर आदित्य शर्मा, नौदलाच्या तुकडीचं नेतृत्व लेफ्टनंट कमांडर नीलम राणा आणि हवाई दलाच्या तुकडीचं नेतृत्व स्क्वाड्रन लीडर विपिन कुमार करतील. तर दिल्ली पोलिसांच्या तुकडीचं नेतृत्व अतिरिक्त डीसीपी विनीत कुमार करतील.

मुख्य ध्वजारोहण सोहळा

गार्ड ऑफ ऑनरची पाहणी केल्यानंतर पंतप्रधान लाल किल्ल्याच्या तटबंदीकडे जातील. तिथे संरक्षण मंत्री राजनाथ सिंह, संरक्षण राज्यमंत्री संजय सेठ, चीफ ऑफ डिफेन्स स्टाफ जनरल एन. एस. राजा सुब्रमणी, हवाई दल प्रमुख एअर चीफ मार्शल ए. पी. सिंह, नौदल प्रमुख ॲडमिरल कृष्णा स्वामीनाथन आणि लष्कर प्रमुख जनरल धीरज सेठ त्यांचं स्वागत करतील. यानंतर दिल्ली क्षेत्राचे जीओसी पंतप्रधानांना ध्वजारोहणासाठी मंचावर घेऊन जातील.

कॅप्टन सोनिया सिंह चौहान राष्ट्रध्वज फडकवण्यासाठी पंतप्रधानांना मदत करतील. ध्वजारोहणाच्या वेळी १७२१ फील्ड बॅटरी (सेरेमोनियल) चे शूर तोपची २१ तोफांची सलामी देतील. यासाठी स्वदेशी १०५ मिमी लाईट फिल्ड गनचा वापर केला जाईल आणि या बॅटरीचं नेतृत्व मेजर पवन सिंह शेखावत करतील. तर गन पोझिशन ऑफिसर म्हणून नायब सुभेदार (AIG) अनुतोष सरकार असतील.

पंतप्रधानांच्या हस्ते ध्वजारोहण होताच, लष्कर, नौदल, हवाई दल आणि दिल्ली पोलिसांचे प्रत्येकी एक अधिकारी आणि ३२ जवान असलेली 'नॅशनल फ्लॅग गार्ड' तुकडी राष्ट्रध्वजाला 'राष्ट्रीय सलामी' देईल. या इंटर-सर्व्हिसेस गार्ड आणि पोलीस गार्डचं नेतृत्व मेजर लोकेंद्र सिंह शेखावत करतील. यामध्ये लष्कराच्या तुकडीचं नेतृत्व मेजर विकास यादव, नौदलाच्या तुकडीचं नेतृत्व लेफ्टनंट कमांडर अभिलाष आणि हवाई दलाच्या तुकडीचं नेतृत्व स्क्वाड्रन लीडर उमेश जी. करतील. दिल्ली पोलिसांच्या तुकडीचं नेतृत्व अतिरिक्त डीसीपी विकास मीना करतील.

संगीत आणि पंतप्रधानांचे भाषण

ध्वजारोहणानंतर तिरंग्याला 'राष्ट्रीय सलामी' दिली जाईल. त्यानंतर लष्कराचा बँड 'वंदे मातरम्'ची धून वाजवेल आणि लाल किल्ल्यावर उपस्थित सर्वजण हे राष्ट्रगीत गातील. या बँडमध्ये एक जेसीओ आणि २५ जवान असतील, ज्यांचे संचालन सुभेदार ईश्वर सिंह करतील. यानंतर राष्ट्रगान होईल.

पंतप्रधानांच्या हस्ते ध्वजारोहण होताच, भारतीय हवाई दलाची दोन Mi-17 हेलिकॉप्टर्स पुष्पवृष्टी करतील. यातील एका हेलिकॉप्टरवर राष्ट्रध्वज आणि दुसऱ्या हेलिकॉप्टरवर 'वंदे मातरम्' दर्शवणारा ध्वज असेल. या हेलिकॉप्टर्सचे कॅप्टन विंग कमांडर रजत आणि स्क्वाड्रन लीडर अंकित वार्ष्णेय असतील.

पुष्पवृष्टीनंतर पंतप्रधान देशाला संबोधित करतील. त्यांच्या भाषणानंतर, नॅशनल कॅडेट कोअर (NCC) चे कॅडेट्स आणि 'माय भारत'चे स्वयंसेवक 'वंदे मातरम्' हे राष्ट्रगीत गातील आणि त्यानंतर राष्ट्रगान होईल. या सोहळ्यात एकूण २,५०० मुलं-मुली (लष्कर, नौदल आणि हवाई दल) आणि 'माय भारत'चे स्वयंसेवक सहभागी होतील. हे सर्वजण तटबंदीसमोरील ज्ञानपथावर बसलेले असतील.

यावर्षी लाल किल्ल्यावरील सोहळा पाहण्यासाठी देशभरातील विविध क्षेत्रांतील सुमारे ५,००० विशेष पाहुण्यांना आमंत्रित करण्यात आले आहे. (ANI)