Pitbull कुत्र्याने 6 वर्षांच्या मुलाचे सर्वांसमोर तोडले लचके, कान उपटला (CCTV VIDEO)

Pitbull Attacks 6 Year Old Boy In Delhi : दिल्लीत एका सहा वर्षांच्या मुलावर पिटबुल जातीच्या कुत्र्याने हल्ला करून त्याला गंभीर जखमी केले. घराबाहेर खेळणाऱ्या मुलाला कुत्र्याने चावा घेतला. या घटनेचे सीसीटीव्ही फुटेज समोर आले आहे.

Pitbull Attacks 6 Year Old Boy In Delhi : दिल्लीतील प्रेम नगर परिसरात एका सहा वर्षांच्या मुलाला पिटबुल जातीच्या कुत्र्याने चावा घेऊन जखमी केले. या हल्ल्यात मुलगा गंभीर जखमी झाला आहे. या घटनेचे सीसीटीव्ही फुटेज सोशल मीडियावर व्हायरल झाले आहे. व्हिडिओमध्ये, एक पिटबुल सहा वर्षांच्या मुलाच्या दिशेने धाव घेताना आणि मुलगा पळून जाण्याचा प्रयत्न करताना दिसत आहे. व्हिडिओ व्हायरल झाल्यानंतर, सोशल मीडिया वापरकर्त्यांनी अशा आक्रमक कुत्र्यांच्या मालकांवर कारवाई करण्याची मागणी केली आहे.

थरारक दृश्य

पोलिसांनी दिलेल्या माहितीनुसार, ही घटना गेल्या रविवारी संध्याकाळी घडली, जेव्हा मुलगा घराबाहेर खेळत होता. मुलगा विनय एन्क्लेव्हमधील आपल्या घराबाहेर खेळत होता. अचानक शेजाऱ्याचा पाळीव कुत्रा पिटबुल रस्त्यावर धावून आला आणि त्याने कोणत्याही चिथावणीशिवाय मुलावर हल्ला केला. पिटबुलच्या हल्ल्यात मुलगा गंभीर जखमी झाला. कुत्र्याने त्याचा उजवा कान तोडला, असे पोलिसांनी सांगितले.

अथक प्रयत्नांनी सुटका

कुत्र्याने मुलाच्या कानाला पकडून त्याला जमिनीवरून ओढले. मुलाचा ओरडण्याचा आवाज ऐकून एक महिला धावत आली आणि तिने मुलाला कुत्र्यापासून वाचवण्याचा प्रयत्न केला. दरम्यान, मदतीसाठी आणखी एक व्यक्ती आली. त्या व्यक्तीने मुलाला सुरक्षित ठिकाणी नेले, तर महिला कुत्र्याला नियंत्रित करण्याचा प्रयत्न करत असल्याचे व्हिडिओमध्ये दिसत आहे. शेजाऱ्यांच्या मदतीने पालकांनी मुलाला रोहिणी येथील बीएसए रुग्णालयात नेले. नंतर मुलाला सफदरजंग रुग्णालयात हलवण्यात आले. सध्या मुलावर उपचार सुरू असल्याचे सांगण्यात येत आहे. पोलिसांनी कुत्र्याचा मालक राजेश पाल याच्याविरुद्ध गुन्हा दाखल करून त्याला अटक केली आहे.