संसदेचे हिवाळी अधिवेशन: अदानी, मणिपूर, वक्फ मुद्द्यांवर संघर्ष?
संसदेच्या हिवाळी अधिवेशनात गौतम अदानी यांच्यावरील सौरऊर्जा घोटाळ्याचे आरोप आणि मणिपूर हिंसाचार हे प्रमुख मुद्दे असतील. वक्फ (सुधारणा) विधेयक मंजूर करण्याचा सरकारचा प्रयत्न आणि १५ इतर विधेयके मांडण्याचाही सरकारचा विचार आहे.
नवी दिल्ली : संसदेचे हिवाळी अधिवेशन सोमवारपासून सुरू होत आहे. या अधिवेशनात उद्योगपती गौतम अदानी यांच्यावरील सौरऊर्जा घोटाळ्याचे आरोप आणि मणिपूर हिंसाचार हे पहिल्या दिवसापासूनच गोंधळ उडवण्याची शक्यता आहे. यासोबतच वादग्रस्त वक्फ (सुधारणा) विधेयक मंजूर करण्यासाठी सरकारने सर्व तयारी केली असून, कामकाज तापण्याची चिन्हे आहेत. दरम्यान, २६ नोव्हेंबर रोजी देशाने संविधान स्वीकारून ७५ वर्षे पूर्ण होत असून, त्या दिवशी संसदेचे संयुक्त अधिवेशन होणार आहे. त्यानंतर नियमित कामकाज सुरू होईल आणि २० डिसेंबर रोजी अधिवेशन संपेल.
अदानी यांनी त्यांच्या कंपनीने उत्पादित केलेली सौरऊर्जा विक्रीसाठी काही राज्य सरकारांच्या अधिकाऱ्यांना २१०० कोटी रुपयांची लाच दिली, असा आरोप अमेरिकेत करण्यात आला आहे. त्यामुळे अदानींना पंतप्रधान नरेंद्र मोदी यांचे संरक्षण आहे, असा आरोप करून विरोधक गोंधळ घालण्याची शक्यता आहे. मणिपूर हिंसाचाराचा मुद्दा उपस्थित करूनही विरोधक सरकारला अडचणीत आणतील.
या अधिवेशनात वक्फ सुधारणा विधेयक मंजूर करण्याचा सरकार प्रयत्न करेल, असे गृहमंत्री अमित शहा यांनी नुकतेच सांगितले होते. याला विरोधकांचा विरोध असल्याने सभागृहात राडा झाला तरी आश्चर्य वाटायला नको.
१५ विधेयके मांडणार: दरम्यान, विकास कामांशी संबंधित १५ इतर विधेयकेही सरकारने यादीत समाविष्ट केली आहेत. मात्र, वादग्रस्त 'एक देश एक निवडणूक' या विधेयकाला या यादीतून वगळण्यात आले आहे.
)
)
)
)