Oracle Layoffs : एकाच ईमेलने नोकरी संपली; अमेरिका-भारतासह जागतिक स्तरावर कर्मचाऱ्यांना मोठा धक्का
सार
Oracle layoffs : ओरॅकल कंपनीने जागतिक स्तरावर अचानक कर्मचारी कपात केली असून कर्मचाऱ्यांना थेट ईमेलद्वारे नोकरी समाप्तीची माहिती देण्यात आली. विविध टीम्समध्ये मोठ्या प्रमाणावर कपात झाली असून या निर्णयामुळे आयटी क्षेत्रात चिंता व्यक्त केली जात आहे.
Oracle Layoffs : जगातील अग्रगण्य तंत्रज्ञान कंपनी ओरॅकल कॉर्पोरेशनने अचानक मोठ्या प्रमाणावर कर्मचारी कपात करण्यास सुरुवात केली आहे. अमेरिका, भारत आणि इतर देशांमधील कर्मचाऱ्यांना कोणतीही पूर्वसूचना न देता थेट ईमेलद्वारे नोकरी संपल्याची माहिती देण्यात आली. या निर्णयामुळे आयटी क्षेत्रात खळबळ उडाली असून हजारो कर्मचाऱ्यांवर याचा परिणाम झाल्याची शक्यता आहे.
ईमेलद्वारे अचानक नोकरी समाप्ती
मिळालेल्या माहितीनुसार, मंगळवारी सकाळी (EST) ६ वाजल्यापासून अनेक कर्मचाऱ्यांच्या इनबॉक्समध्ये नोकरी समाप्तीचे ईमेल येऊ लागले. ओरॅकल कोर्पोरेशनच्या नेतृत्वाकडून पाठवलेल्या या ईमेलमध्ये सांगण्यात आले की, व्यापक संघटनात्मक बदलांच्या पार्श्वभूमीवर संबंधित पदे रद्द करण्यात आली आहेत. विशेष म्हणजे, कर्मचाऱ्यांना कोणतीही पूर्वसूचना, एचआरचा कॉल किंवा मॅनेजरशी चर्चा न करता थेट ईमेलद्वारेच नोकरी संपल्याची माहिती देण्यात आली.
टीम्समध्ये मोठ्या प्रमाणावर कर्मचारी कपात
कपातीच्या काही तासांतच रेडिट आणि ब्लाइंडसारख्या प्लॅटफॉर्मवर कर्मचाऱ्यांच्या प्रतिक्रिया समोर आल्या. आरएचएस (Revenue and Health Sciences) आणि एसव्हीओएस (SaaS and Virtual Operations Services) यांसारख्या टीम्समध्ये सुमारे ३०% पर्यंत कर्मचारी कपात झाल्याची माहिती समोर आली आहे. काही बिझनेस युनिट्समध्ये एकाच वेळी १५-१६ अभियंत्यांना कामावरून कमी करण्यात आले असून, व्यवस्थापक स्तरावरील कर्मचाऱ्यांनाही याचा फटका बसला आहे.
भारतातील NetSuite IDCलाही बसला फटका
या कपातीचा परिणाम भारतावरही झाला असून, NetSuiteच्या इंडिया डेव्हलपमेंट सेंटरमध्ये (IDC) विविध पदांवर कपात करण्यात आली आहे. प्रॉडक्ट मॅनेजर्स (PM), इंडिव्हिज्युअल कॉन्ट्रिब्युटर्स (IC) आणि मॅनेजमेंट स्तरावरील कर्मचाऱ्यांना याचा मोठा फटका बसल्याचे सांगितले जात आहे.
सेव्हरन्स पॅकेजवर अटींचा अडथळा
कर्मचाऱ्यांना पाठवलेल्या ईमेलमध्ये सेवा समाप्तीचे (severance) पॅकेज देण्याची माहिती देण्यात आली आहे. मात्र, हे पॅकेज मिळवण्यासाठी कर्मचाऱ्यांना डॉक्युसाइनद्वारे पाठवलेल्या विभक्त होण्याच्या कागदपत्रांवर स्वाक्षरी करणे आवश्यक असल्याचे नमूद करण्यात आले आहे. तसेच पुढील प्रक्रिया आणि तपशील जाणून घेण्यासाठी कर्मचाऱ्यांना वैयक्तिक ईमेल अपडेट करण्याचे निर्देश देण्यात आले आहेत.