Mohun Bagan vs Punjab FC: मोहन बागानचा पंजाब एफसीवर २-१ ने दणदणीत विजय

आयएसएलच्या (ISL) एका हाय-व्होल्टेज सामन्यात शनिवारी कोलकात्याच्या युवा भारती क्रीडांगणावर मोहन बागान आणि पंजाब एफसी आमनेसामने आले. या स्पर्धेतली ही एक अत्यंत महत्त्वाची मॅच होती.

Mohun Bagan vs Punjab FC: मोहन बागान आणि पंजाब एफसी शनिवारी कोलकात्याच्या युवा भारती क्रीडांगणावर आयएसएलच्या हाय-व्होल्टेज सामन्यात भिडले. या स्पर्धेतली ही एक अत्यंत महत्त्वाची मॅच होती. मोहन बागानने या मॅचमध्ये आक्रमक खेळ करत बाजी मारली. त्यांनी पंजाबचा २-१ असा पराभव करत दणदणीत विजय मिळवला.

दोन्ही टीम्सनी सुरुवातीपासूनच आक्रमक खेळायला सुरुवात केली. याचाच फायदा घेत अवघ्या तिसऱ्या मिनिटाला पहिला गोल झाला. पंजाब एफसीचा फॉरवर्ड अल्फ्रेड मोयाने कोनसाम सनाथोईच्या पासवर अतिशय हुशारीने गोल केला. यामुळे पंजाबने मॅचमध्ये आघाडी घेतली. पण ६ व्या मिनिटाला मोहन बागानचा मिडफिल्डर समीर जेल्कोविचचा शॉट थोडक्यात हुकला. दुसरीकडे, मोहन बागानच्या कोचला नाईलाजाने सहल अब्दुल समदला बाहेर बोलावून अनिरुद्ध थापाला मैदानात उतरावं लागलं. एक गोल खाऊनही मोहन बागानची टीम मॅचमधून बाहेर गेली नाही.

आयएसएलच्या हाय-व्होल्टेज मॅचमध्ये युवा भारतीवर मोहन बागान विरुद्ध पंजाब एफसी

इरविनने १८ व्या मिनिटाला गोल करत मोहन बागानला बरोबरी साधून दिली. त्यावेळी स्कोअर १-१ असा झाला. यानंतर खेळाचा वेग थोडा मंदावला. पण एक गोष्ट नक्की सांगावी लागेल, पंजाबचा फॉरवर्ड मेस्सी बाऊली डाव्या बाजूने चांगलाच ॲक्टिव्ह होता. मोहन बागानने मॅचच्या ४२ व्या मिनिटाला पुन्हा एकदा कमाल केली. द्राजिचने बॉक्सच्या बाहेरून उजव्या पायाने जोरदार शॉट मारत गोल केला. हा खरोखरच एक वर्ल्ड-क्लास गोल होता. त्यानंतर काही क्षणांतच त्यांच्याकडे आणखी एक संधी आली, पण जेल्कोविच आणि इरविनने ती गमावली. यानंतर ऑफसाईडमुळे पंजाबचा एक गोल रद्दही झाला. अखेर, फर्स्ट हाफ २-१ या स्कोअरवर संपला. पंजाबच्या कोचने सेकंड हाफच्या सुरुवातीलाच एक बदल केला. त्यांनी मांगलेंथांगला बाहेर बोलावून कारिश सोरामला मैदानात पाठवलं. दीपक टांगरीचा लांबून मारलेला शॉट ६३ व्या मिनिटाला बाहेर गेला. दुसरीकडे, पंजाबचा गोलकीपर अर्शदीप सिंगने एक चांगला सेव्ह केला.

पंजाबचा डिफेंडर मेईतेई त्याचवेळी मैदानात आला. तिकडे मोहन बागानकडून लिस्टन कोलासो मैदानात उतरला. मैदानात येताच त्याने इरविनला एक जबरदस्त पास दिला. पण ७५ व्या मिनिटाला तो पास मिळूनही इरविनला गोल करता आला नाही. पंजाबच्या गोलकीपरने तो सेव्ह केला. याला उत्तर म्हणून विशाल कैथनेही एक चांगला शॉट सेव्ह केला. ८१ व्या मिनिटाला लिस्टनचा शॉटही बाहेर गेला. शेवटच्या टप्प्यात मोहन बागानने लागोपाठ हल्ले चढवले. मनवीर सिंगने एक संधी गमावली आणि पंजाबच्या गोलकीपरने आणखी एक चांगला सेव्ह केला. एक्स्ट्रा टाईममध्ये लिस्टनकडे पुन्हा एक संधी आली, पण गोल होऊ शकला नाही. खरं तर, मॅचच्या अगदी शेवटपर्यंत उत्कंठा टिकून होती. अखेर, आक्रमक फुटबॉल खेळत मोहन बागानने बाजी मारली आणि पंजाबला २-१ ने धूळ चारली.