Maha Devi Adishakti: नवरात्रीची खास भेट, अ‍ॅनिमेशनमध्ये येतेय महिषासुरमर्दिनी आणि कालीमातेची कथा

नवरात्रीच्या मुहूर्तावर 'महादेवी आदिशक्ती - द लेजेंड ऑफ माँ दुर्गा' या अ‍ॅनिमेटेड सिनेमाचा फर्स्ट लूक प्रेक्षकांच्या भेटीला आला आहे. मिलिंद नंदनवार यांनी दिग्दर्शित केलेला हा सिनेमा फेब्रुवारी २०२७ मध्ये जगभरात रिलीज होणार आहे.

नवरात्रीच्या शुभ मुहूर्तावर 'महादेवी आदिशक्ती' या अ‍ॅनिमेटेड सिनेमाचा फर्स्ट लूक मेकर्सनी रिलीज केला आहे. मिलिंद नंदनवार या सिनेमाचे दिग्दर्शन करत असून अक्षत गुप्ता यांनी याची कथा लिहिली आहे. फेब्रुवारी २०२७ मध्ये हा सिनेमा जगभरात रिलीज होणार आहे. महिषासुराचा वध करणारी महिषासुरमर्दिनी आणि दुष्टांचा संहार करणाऱ्या कालीमातेची कथा या सिनेमात पाहायला मिळणार आहे.

अर्था एंटरटेनमेंट अँड अ‍ॅनिमेशनच्या बॅनरखाली गौरव मल्होत्रा या सिनेमाची निर्मिती करत आहेत. श्रेयस पुराणिक यांनी याला संगीत दिलं आहे. आजच्या पिढीतील मुलांना भारतीय पौराणिक कथा अ‍ॅनिमेशनच्या माध्यमातून सांगणे, हा यामागचा मुख्य उद्देश आहे.

'धर्म आणि सत्याचाच नेहमी विजय होतो'

सनातन धर्माच्या कथा पिढ्यानपिढ्या चालत आल्या आहेत आणि त्या आजही तितक्याच महत्त्वाच्या आहेत, असं दिग्दर्शक मिलिंद नंदनवार यांनी सांगितलं. ते म्हणाले, "भारत ही अध्यात्म, भक्ती आणि ज्ञानाची भूमी आहे. सनातन धर्माच्या कथांनी आपली संस्कृती घडवली आहे. वाईट शक्ती कितीही ताकदवान असली, तरी शेवटी धर्म आणि सत्याचाच विजय होतो, याची आठवण या कथा करून देतात. आईची कथा मुलांपर्यंत पोहोचवण्यासाठी तिनेच आमची निवड केली आहे. हा आमच्यासाठी खूप मोठा आशीर्वाद आहे."

हाताने रेखाटलेलं अ‍ॅनिमेशन (Hand-Drawn Animation)

सध्या सगळीकडे आर्टिफिशियल इंटेलिजन्सचा (AI) वापर होत असताना, या सिनेमाच्या टीमने मात्र हाताने रेखाटलेल्या (हँड-ड्रॉन) अ‍ॅनिमेशन तंत्रज्ञानाचा वापर केला आहे. १५० हून अधिक अ‍ॅनिमेटर्स या प्रोजेक्टवर रात्रंदिवस काम करत आहेत.

नव्या पिढीला आध्यात्मिक परंपरेची ओळख

आजच्या मुलांना आपली संस्कृती आणि परंपरा त्यांच्या आवडीच्या भाषेत समजावून सांगण्यासाठी आम्ही हा सिनेमा बनवला आहे, असं निर्माता गौरव मल्होत्रा यांनी सांगितलं. ते म्हणाले, 'आपण भक्तीवर आधारित टीव्ही मालिका पाहत आणि पुस्तके वाचत मोठे झालो. पण आजच्या मुलांची कंटेंट पाहण्याची पद्धत बदलली आहे. त्यामुळे त्यांना रिलेट होईल अशा पद्धतीने या कथा सांगणं गरजेचं आहे. आजी-आजोबा, आई-वडील आणि मुले असे सगळे एकत्र बसून पाहू शकतील, असा हा फॅमिली सिनेमा आहे.'

दुर्गामातेची कथा सांगण्यासाठी या सिनेमात पुराण, संगीत आणि अ‍ॅनिमेशनचा सुरेख संगम साधण्यात आला आहे. सिनेमाच्या उत्तम व्हिज्युअल्ससाठी कलाकार आणि अ‍ॅनिमेटर्सची मोठी टीम मेहनत घेत आहे. 'महादेवी आदिशक्ती - द लेजेंड ऑफ माँ दुर्गा' हा सिनेमा फेब्रुवारी २०२७ मध्ये जगभरातील चित्रपटगृहांमध्ये धडकणार आहे.