Lucknow Student Death: लखनौमध्ये धक्कादायक घटना! आठवीत शिकणारा विद्यार्थी वर्गातच कोसळला, मृत्यू
सार
लखनौच्या जानकीपुरम भागातील एका शाळेत १३ वर्षांचा अथर्व वर्गातच अचानक कोसळला आणि त्याचा मृत्यू झाला. शाळेतून फोन आल्यावर त्याचे वडील प्रेम सिंह यांनी त्याला तातडीने रुग्णालयात नेले, पण डॉक्टरांनी त्याला मृत घोषित केले.
उत्तर प्रदेशच्या लखनौमध्ये एका कुटुंबावर अचानक दुःखाचा डोंगर कोसळला आहे. त्यांचा १३ वर्षांचा मुलगा शाळेत वर्गातच अचानक खाली पडला आणि त्याचा मृत्यू झाला. अथर्व ऊर्फ डुग्गू हा आठवीत शिकत होता. रोजच्यासारखाच तो बुधवारीही शाळेत गेला होता. त्याचे वडील प्रेम सिंह यांनीच त्याला सकाळी शाळेत सोडले होते. पण काही वेळातच त्यांच्या आयुष्याला कलाटणी देणारा एक फोन येईल, याची त्यांना पुसटशीही कल्पना नव्हती.
ही घटना बुधवारी सकाळी लखनौच्या जानकीपुरम भागातील एका शाळेत घडली. वर्गात गेल्यावर काही वेळातच अथर्व खाली कोसळला. शाळेतील कर्मचाऱ्यांच्या मदतीने त्याला तातडीने जवळच्या रुग्णालयात नेण्यात आले. पण तिथे पोहोचताच डॉक्टरांनी त्याला मृत घोषित केले, अशी माहिती 'आज तक'च्या वृत्तात दिली आहे.
लखनऊ: स्कूल में आठवीं के छात्र की संदिग्ध परिस्थितियों में मौत।
13 वर्षीय अथर्व सिंह अचानक स्कूल में बेहोश होकर गिरा।
परिजन अस्पताल लेकर पहुंचे, जहां डॉक्टरों ने मृत घोषित किया।
परिवार का इकलौता बेटा था अथर्व, हार्ट अटैक की आशंका जताई जा रही है।
सहारा स्टेट स्थित एलपीएस स्कूल का मामला।
@CMOfficeUP @AdminLKO @UPGovt @adgzonelucknow @Igrangelucknow @lkopolice
#Lucknow #LPSchool #StudentDeath #UttarPradesh #LucknowNews #BreakingNews
— India News UP/UK (@IndiaNewsUP_UK) November 6, 2026
प्राथमिक वैद्यकीय अंदाजानुसार हा कार्डियाक अरेस्ट (हृदयविकाराचा झटका) असल्याचा संशय आहे. मात्र, मृत्यूचे नेमके कारण अद्याप स्पष्ट झालेले नाही.
घटनेनंतर शाळेने काय सांगितले?
शाळेच्या मुख्याध्यापिका मीना टांगरी यांनी सांगितले की, अथर्व वर्गात आला आणि अचानक पाठीमागे जमिनीवर कोसळला. तो पडला तेव्हा त्याच्या पाठीवर दप्तर तसेच होते.
या अचानक घडलेल्या प्रकारामुळे शिक्षक आणि इतर विद्यार्थीही घाबरले. नेमकं काय झालंय हे कोणाला समजायच्या आतच हा १३ वर्षांचा मुलगा बेशुद्ध पडला होता.
शिक्षकांनी लगेच त्याच्या मदतीला धाव घेतली आणि शाळेतील इतर कर्मचाऱ्यांना बोलावले. अथर्वची अवस्था पाहण्यासाठी त्याला स्टाफ रूममध्ये नेण्यात आले.
पण मुलाच्या शरीरात कोणतीही हालचाल होत नसल्याचे पाहून कर्मचारी अधिकच घाबरले. शाळा प्रशासनाने तातडीने त्याच्या वडिलांशी संपर्क साधला आणि या आणीबाणीची माहिती दिली.
फोन येताच वडिलांची शाळेत धाव
जानकीपुरममध्ये राहणारे आणि कपड्यांचा व्यवसाय करणारे प्रेम सिंह यांना मुलाची बातमी समजताच मोठा धक्का बसला. ते तातडीने शाळेत पोहोचले. तिथे कर्मचाऱ्यांच्या मदतीने त्यांनी अथर्वला जवळच्या रुग्णालयात नेले.
वेळेवर उपचार मिळाल्यास मुलाचा जीव वाचेल, अशी कुटुंबाला आशा होती. पण डॉक्टरांनी तपासून त्याला मृत घोषित केल्यावर त्यांच्या सर्व आशा मावळल्या.
ही बातमी ऐकताच प्रेम सिंह कोसळले. रुग्णालयात उपस्थित असलेले शिक्षक आणि इतर लोक त्यांचे सांत्वन करण्याचा प्रयत्न करत होते.
वडिलांनी सांगितले की, काही तासांपूर्वीच त्यांनी नेहमीप्रमाणे मुलाला शाळेत सोडले होते. आजचा दिवस असा भयंकर असेल, याची कोणतीही पूर्वकल्पना त्यांना नव्हती.
अथर्व हा आई-वडिलांचा एकुलता एक मुलगा होता
अथर्व हा प्रेम सिंह आणि त्यांच्या पत्नीचा एकुलता एक मुलगा होता. त्याच्या अचानक जाण्याने कुटुंबावर कधीही न भरून येणारा आघात झाला आहे.
या मृत्यूच्या बातमीने परिसरातील लोक आणि शाळेतील सर्वांनाच धक्का बसला आहे. त्याला सकाळी शाळेत येताना पाहणारे शिक्षक आणि विद्यार्थी या घटनेमुळे प्रचंड अस्वस्थ झाले आहेत.
या घटनेमुळे लहान मुले आणि किशोरवयीन मुलांमध्ये अचानक उद्भवणाऱ्या हृदयाच्या समस्यांबाबत पुन्हा एकदा प्रश्न निर्माण झाले आहेत.
डॉक्टरांना कार्डियाक अरेस्टचा संशय
अथर्व अचानक कोसळल्यानंतर, मृत्यूचे संभाव्य कारण म्हणून डॉक्टरांनी सुरुवातीला कार्डियाक अरेस्टचा संशय व्यक्त केला आहे.
जेव्हा हृदय अचानक रक्तपुरवठा करणे थांबवते, तेव्हा मेंदूसह शरीरातील महत्त्वाच्या अवयवांना ऑक्सिजन मिळणे बंद होते, याला कार्डियाक अरेस्ट म्हणतात. यामध्ये व्यक्ती कोणतीही पूर्वसूचना न मिळता बेशुद्ध पडते आणि खाली कोसळते.
हे हार्ट अटॅकपेक्षा वेगळे असते. हृदयाच्या एखाद्या भागाला होणारा रक्तपुरवठा खंडित होतो तेव्हा हार्ट अटॅक येतो. तर कार्डियाक अरेस्ट ही एक प्रकारची इलेक्ट्रिकल बिघाड असते ज्यामुळे हृदय काम करणे थांबवते. काही वेळा हार्ट अटॅकमुळेही कार्डियाक अरेस्ट येऊ शकतो.
मात्र, हा केवळ प्राथमिक वैद्यकीय अंदाज आहे. अथर्वच्या मृत्यूचे नेमके कारण शोधण्यासाठी आणखी वैद्यकीय तपासणीची गरज आहे.
पोलिसांची रुग्णालयात धाव, कुटुंबाची तक्रार नाही
घटनेची माहिती मिळताच स्थानिक पोलिसांनी रुग्णालयात धाव घेतली. अधिकाऱ्यांनी कुटुंबाशी संवाद साधला आणि शाळेत नेमके काय घडले याची माहिती घेतली.
पोलीस अधिकाऱ्यांनी दिलेल्या माहितीनुसार, कुटुंबाने अद्याप कोणतीही अधिकृत तक्रार दिलेली नाही. डॉक्टरांनी कार्डियाक अरेस्टची शक्यता वर्तवल्यानंतर, कुटुंबाने पोलिसांत कोणतीही लेखी तक्रार दाखल केली नाही.