'महादायी योजना आम्ही राबवणारच', डीके शिवकुमार यांचे गोव्याचे मुख्यमंत्री प्रमोद सावंत यांना आव्हान

महादायी योजनेबाबत गोवा मुख्यमंत्री प्रमोद सावंत यांना माहिती नाही. ते मानसिक संतुलन गमावून बोलत आहेत, असा आरोप कर्नाटकचे उपमुख्यमंत्री डीके शिवकुमार यांनी केला आहे.

बंगळुरू : ‘महादायी योजनेबाबत गोवा मुख्यमंत्री प्रमोद सावंत यांना माहिती नाही. ते मानसिक संतुलन गमावून बोलत आहेत. योजनेसाठी आधीच निविदा मागवल्या असून, काहीही झाले तरी आम्ही काम सुरू करू. गोवाचे मुख्यमंत्री ते थांबवू शकतात का ते पाहूया,’ असे आव्हान उपमुख्यमंत्री डी. के. शिवकुमार यांनी गोवाच्या मुख्यमंत्र्यांना दिले आहे.

गुरुवारी विधानसभेत पत्रकारांशी बोलताना जलसंपदा मंत्री शिवकुमार यांनी महादायी योजनेला केंद्रीय वन खात्याची परवानगी मिळणार नाही, असे गोवाचे मुख्यमंत्री प्रमोद सावंत यांचे म्हणणे फेटाळून लावले. गोव्याला कर्नाटक राज्याला नोटीस बजावण्याचा अधिकार नाही. काहीही नोटीस दिली तरी आम्ही योजनेचे काम सुरू करू. ते थांबवू दे, मी पाहतो, असे ते म्हणाले.

सर्वोच्च न्यायालयात दाखल केलेला अर्ज मागे घेऊन लवकरच काम सुरू करू. योजनेसाठी आधीच निविदा मागवल्या आहेत. काम सुरू करायचे आहे. सर्वोच्च न्यायालयाच्या आदेशानुसार आम्ही काम करू. आपली संघराज्य व्यवस्था आहे. येथे आंतरराज्य संबंध कसे असावेत हे त्यांना माहीत नाही, असे ते म्हणाले.

आमची जमीन, आमची योजना

ही आमची जमीन आहे, आमची योजना आहे, आम्ही काहीही करू. त्यावर प्रश्न उपस्थित करणे हा त्यांचा अधिकार नाही. महादायी प्रकरणात न्यायालयाचा निकाल आला आहे. योजनेच्या अंमलबजावणीसाठी निविदा मागवल्या आहेत. भाजप सरकारच्या काळात बसवराज बोम्मई, स्थानिक खासदार आणि केंद्रीय मंत्री प्रल्हाद जोशी यांनी योजनेची अंमलबजावणी होईल असा जल्लोष केला होता, असे शिवकुमार म्हणाले.

राज्याच्या स्वाभिमानाचा प्रश्न

राज्याचा मान राखण्यासाठी सर्व खासदारांनी एकत्रितपणे लढावे. याबाबत मी राज्यातील सर्व खासदारांची भेट घेईन. हा आपल्या राज्याच्या स्वाभिमानाचा प्रश्न आहे. या प्रकरणात आपले खासदार गप्प बसणे ही मोठी चूक आहे. आपल्या राज्यातील २८ लोकसभा सदस्य, १२ राज्यसभा सदस्य यांनी एकजुटीने लढून राज्याचा मान राखला पाहिजे. गोव्यातील एका खासदाराच्या हट्टासाठी आपले कर्नाटक विकायला मिळणार नाही. आता तरी भाजप नेते बोला, असे शिवकुमार यांनी आवाहन केले.

आमचे काम आम्ही करू

याबाबत भाजप खासदार, राज्याचे प्रतिनिधित्व करणारे केंद्रीय मंत्री आणि पंतप्रधानांवर दबाव आणला पाहिजे. मीही केंद्रीय जलशक्ती मंत्री आणि पंतप्रधानांची भेट घेण्यासाठी वेळ मागेन. सर्व खासदारांची बैठक बोलावून शिष्टमंडळ नेण्याचा प्रयत्न करेन. कोण येईल कोण जाईल, आमचे काम आम्ही करू, असे उपमुख्यमंत्र्यांनी सांगितले.

केंद्रीय जलशक्ती मंत्री महादायी प्रकरणात निष्पक्ष आहेत. ते यात राजकारण करणार नाहीत. मी त्यांना यासाठी पाच-सहा वेळा भेटलो आहे. केंद्रीय वनमंत्रीही यात राजकारण करणार नाहीत. विकास कामांना ते पाठिंबा देत आहेत.
- डी.के. शिवकुमार, उपमुख्यमंत्री

भाजपचे इतके खासदार निवडून आले तरी ते महादायी प्रकरणात बोलत नाहीत. केंद्र सरकार महादायी प्रकरणात सावत्र आईची भूमिका घेत आहे. यावर बोलत नसलेल्या भाजपला जनतेनेच धडा शिकवायला हवा.
- रामलिंगारेड्डी, मंत्री