Jio Satellite Internet: रिलायन्स जिओ आता भारतात सॅटेलाइट इंटरनेट सेवा सुरू करणार आहे. यासाठी कंपनी 1600 पेक्षा जास्त लो-अर्थ ऑर्बिट (LEO) उपग्रह अवकाशात सोडणार आहे. यामुळे मोबाईल नेटवर्क नसलेल्या दुर्गम भागातही थेट इंटरनेट कनेक्टिव्हिटी मिळेल.
रिलायन्स जिओ टेलिकॉम क्षेत्रात मोठी क्रांती करण्याच्या तयारीत आहे. कंपनी पुढच्या 2 ते 3 वर्षांत तब्बल 1600 ते 1650 लो-अर्थ ऑर्बिट (LEO) उपग्रह अवकाशात सोडणार आहे. हे उपग्रह जमिनीपासून सुमारे 650 किलोमीटर उंचीवर फिरतील. यामुळे पारंपरिक सॅटेलाइटपेक्षा खूपच वेगवान इंटरनेट आणि कमी लेटन्सी (Latency) मिळेल.
25
मोबाईल टॉवर नसतानाही थेट कनेक्टिव्हिटी!
या योजनेचं सर्वात मोठं वैशिष्ट्य म्हणजे 'डायरेक्ट-टू-डिव्हाइस' कनेक्टिव्हिटी. यामुळे जिथे मोबाईल टॉवर किंवा नेटवर्क नाही, अशा दुर्गम भागांतही ग्राहकांचे स्मार्टफोन थेट उपग्रहाशी कनेक्ट होतील. आता डोंगर-दऱ्या, दूरची बेटं आणि जंगलातही इंटरनेट आणि कॉलिंग सहज शक्य होईल.
35
एलॉन मस्कच्या 'स्टारलिंक'ला जिओची थेट टक्कर
जिओच्या या नव्या पावलामुळे जागतिक सॅटेलाइट कंपन्यांना मोठा धक्का बसला आहे. सध्या ग्लोबल मार्केटमध्ये आघाडीवर असलेल्या एलॉन मस्कच्या 'स्टारलिंक' (Starlink), ॲमेझॉनच्या 'प्रोजेक्ट कुइपर' (Project Kuiper) आणि 'युटेलसॅट वनवेब' (Eutelsat OneWeb) या कंपन्यांना जिओ भारतीय बाजारात थेट आव्हान देणार आहे.
जगभरात सॅटेलाइट ब्रॉडबँडची बाजारपेठ वेगाने वाढत आहे. ग्रामीण भाग, जहाजं, विमानं आणि आपत्कालीन परिस्थितीत इंटरनेट पोहोचवण्यासाठी कंपन्यांमध्ये स्पर्धा सुरू आहे. रिलायन्स याला आपल्या टेलिकॉम व्यवसायाचा एक महत्त्वाचा विस्तार म्हणून पाहत आहे. तसेच, परदेशी सॅटेलाइट ऑपरेटर्सवरील अवलंबित्व कमी करून भारताचं डिजिटल सार्वभौमत्व मजबूत करणं हाही याचा एक मुख्य उद्देश आहे.
55
ग्राहकांना नेमका काय फायदा होणार?
जिथे पारंपरिक फायबर केबल पोहोचवणं शक्य नाही, अशा भारताच्या दुर्गम खेड्यापाड्यांतही या तंत्रज्ञानामुळे हाय-स्पीड इंटरनेट पोहोचेल. नैसर्गिक आपत्तीच्या वेळी मोबाईल टॉवर जरी कोसळले, तरी हे सॅटेलाइट नेटवर्क कनेक्टिव्हिटी तुटू देणार नाही. भविष्यात हे तंत्रज्ञान देशातील 5G आणि फायबर नेटवर्कला एक उत्तम जोड देऊन संपूर्ण इंटरनेट विश्वाचा चेहरामोहरा बदलेल.
