Jio Platforms IPO: जिओ प्लॅटफॉर्म्सच्या आयपीओचा नवा इतिहास, १ कोटींहून अधिक अर्ज

रिलायन्स ग्रुपच्या जिओ प्लॅटफॉर्म्सच्या आयपीओने १ कोटींहून अधिक अर्ज मिळवून जागतिक स्तरावर नवा इतिहास रचला आहे. ३०,२१३ कोटी रुपये उभारण्याचे उद्दिष्ट असलेल्या या आयपीओने जुने सर्व रेकॉर्ड मोडले आहेत. यातून मिळणारा पैसा प्रामुख्याने कंपनीचे कर्ज फेडण्यासाठी वापरला जाईल.

मुंबई: रिलायन्स ग्रुपची टेलिकॉम आणि टेक्नॉलॉजी कंपनी असलेल्या जिओ प्लॅटफॉर्म्सने शेअर बाजारात एक नवा इतिहास रचला आहे. कंपनीच्या इनिशियल पब्लिक ऑफरिंगला (IPO) १ कोटींहून अधिक अर्ज आले आहेत. असा टप्पा गाठणारी जिओ ही जगातली पहिलीच कंपनी ठरली आहे. विशेष म्हणजे, बोली (Bidding) संपायला पाच तास उरलेले असतानाच कंपनीने हा टप्पा ओलांडला. याआधी वारी एनर्जीजच्या आयपीओला ९७ लाख अर्ज आले होते, तो रेकॉर्ड आता जिओने मोडला आहे.

बोलीच्या तिसऱ्या दिवशी, म्हणजेच २३ ऑक्टोबरला दुपारी १२.२४ वाजेपर्यंत मिळालेल्या आकडेवारीनुसार, हा आयपीओ एकूण ७.४१ पट सबस्क्राईब झाला आहे. यामध्ये रिटेल गुंतवणूकदारांचा वाटा २.१२ पट, तर क्वालिफाईड इन्स्टिट्यूशनल बायर्स (QIB) चा वाटा १५.९५ पट राहिला. तसेच, नॉन-इन्स्टिट्यूशनल इन्व्हेस्टर्सच्या (NII) कॅटेगरीत ९.८६ पट अर्ज आले आहेत.

या आयपीओच्या माध्यमातून ३०,२१३ कोटी रुपये उभारण्याचं कंपनीचं उद्दिष्ट आहे. यासाठी एका शेअरची किंमत १,०६५ ते १,११९ रुपये इतकी निश्चित करण्यात आली आहे. एका लॉटमध्ये १२ शेअर्स आहेत. त्यामुळे रिटेल गुंतवणूकदारांना अप्पर प्राईस बँडनुसार कमीत कमी १३,४२८ रुपयांची गुंतवणूक करावी लागेल.

या आयपीओतून मिळणाऱ्या पैशांपैकी २७,५०० कोटी रुपये रिलायन्स जिओ इन्फोकॉम या उपकंपनीचे कर्ज फेडण्यासाठी वापरले जातील. उरलेली रक्कम कंपनीच्या इतर कॉर्पोरेट कामांसाठी वापरली जाईल. २०१९ मध्ये सुरू झालेली जिओ प्लॅटफॉर्म्स आज डिजिटल कनेक्टिव्हिटी आणि अत्याधुनिक तंत्रज्ञानाच्या जोरावर भारतातील आघाडीची टेक कंपनी बनली आहे.