Indore Horror : लिव्ह-इनसाठी दिला नकार, प्रियकर जिवावर उठला, स्कूटरले तिला उडवले!

Indore Horror : इंदूरच्या कल्पना नगरमध्ये गुरुवारी संध्याकाळी एका तरुणाने लिव्ह-इनसाठी नकार दिल्याने आपल्या माजी प्रेयसीला स्कूटरने जाणूनबुजून धडक दिली.

इंदूर - एका धक्कादायक घटनेत, इंदूरच्या कल्पना नगरमध्ये गुरुवारी संध्याकाळी एका तरुणाने लिव्ह-इनमध्ये राहण्यास नकार दिल्याने आपल्या माजी प्रेयसीला स्कूटरने जाणूनबुजून धडक दिली. मिळालेल्या माहितीनुसार, तरुणीने काही काळापूर्वी आरोपीसोबतचे नाते संपवले होते. असे असूनही, आरोपी तिला धमकावत होता आणि तिच्यावर दबाव टाकत होता. तिने पुन्हा एकत्र येण्यास नकार दिल्याने त्याचे वागणे आक्रमक आणि हिंसक झाले.

एका व्हिडिओमध्ये दिसत आहे की, भरधाव वेगात ॲक्टिव्हा चालवणारा तरुण रस्त्यावरून चालणाऱ्या तरुणीवर धावून गेला आणि तिला धडक दिली. तरुणीने स्वतःचा बचाव करण्यासाठी त्याच्यावर दगड फेकला. यानंतर संतापलेल्या आरोपीने गाडीचा वेग वाढवून तिला स्कूटरने धडक दिली आणि घटनास्थळावरून पळ काढला.

बघा या घटनेचा व्हिडिओ

या घटनेत तरुणी जखमी झाली असून, तिने नंतर हिरानगर पोलीस ठाण्यात तक्रार दाखल केली.

तिच्या जबाबानुसार, पोलिसांनी मारहाण, धमकी आणि जाणूनबुजून इजा पोहोचवल्याप्रकरणी गुन्हा दाखल केला आहे. तपासात समोर आले की, हा तरुण सराईत गुन्हेगार असून त्याच्यावर विविध पोलीस ठाण्यांमध्ये आधीच सात गुन्हे दाखल आहेत. "आम्ही आरोपीची ओळख पटवली असून त्याच्या गुन्हेगारी पार्श्वभूमीची पुष्टी केली आहे. त्याचा शोध सुरू असून त्याला लवकरच अटक केली जाईल," असे हिरानगर पोलिसांच्या एका वरिष्ठ अधिकाऱ्याने सांगितले.