Indian Army: भारतीय लष्कराच्या श्वानाने मारली पॅराशूट जंप, व्हिडिओ व्हायरल
सार
भारतीय लष्कराच्या सूर्या कमांडच्या जवानांनी एका लढाऊ श्वानासोबत बेहट ड्रॉप झोनमध्ये यशस्वी पॅराशूट जंप केली. जवान आणि लष्करी श्वानांमधील अतूट विश्वास यातून दिसून येतो.
आकाशात उंचावर एक पॅराशूट उघडतं. त्याखाली फक्त जवानच नाहीत, तर एक लढाऊ श्वानही आहे. जवान आणि त्यांच्या श्वानांमधलं नातं सहसा जमिनीवर पाहायला मिळतं. पण आता भारतीय लष्कराने हे नातं थेट आकाशातही सिद्ध करून दाखवलं आहे.
मध्य भारतातील बेहट ड्रॉप झोनमध्ये सूर्या कमांडच्या एका पॅराट्रूपरने श्वान आणि त्याच्या हँडलरसोबत टँडम पॅराशूट जंप केली. विशेष म्हणजे, यावेळी त्यांच्याकडे पूर्ण लढाऊ साहित्य होतं. श्वान आणि त्याच्या हँडलरने एकत्र केलेली ही पहिलीच टँडम जंप असावी, असं भारतीय लष्कराच्या सूर्या कमांडने 'एक्स' (X) वर केलेल्या पोस्टमध्ये म्हटलं आहे.
सूर्या कमांडने आपल्या पोस्टमध्ये लिहिलंय, "अचूकता, धाडस आणि युद्धसज्जतेचं उत्तम उदाहरण देत #SuryaWarrior च्या एका पॅराट्रूपरने बेहट ड्रॉप झोनमध्ये श्वान आणि त्याच्या हँडलरसोबत टँडम पॅराशूट जंप केली. यावेळी त्यांच्याकडे पूर्ण लढाऊ साहित्य होतं."
"𝗣𝗮𝘄𝘀 𝗶𝗻 𝘁𝗵𝗲 𝗦𝗸𝘆, 𝗖𝗼𝘂𝗿𝗮𝗴𝗲 𝗼𝗻 𝘁𝗵𝗲 𝗚𝗿𝗼𝘂𝗻𝗱."
In a remarkable display of courage, precision and combat readiness, a paratrooper of #SuryaWarrior undertook a tandem parachute jump over Behat DZ with a dog handler and his combat canine, carrying a full… pic.twitter.com/4S48kbNKCm— SuryaCommand_IA (@suryacommand) September 15, 2026
लष्कराने दिलेल्या माहितीनुसार, याआधी श्वानांसोबत केलेल्या फ्री-फॉल जंपचाच हा पुढचा टप्पा आहे. जवान आणि श्वान यांच्यातील 'विश्वास आणि टीमवर्क'चं हे एक उत्तम उदाहरण मानलं जात आहे.
सूर्या कमांड हे भारतीय लष्कराचं सेंट्रल कमांड असून त्याचं मुख्यालय लखनौमध्ये आहे. उत्तर आणि मध्य भारताचा मोठा भाग या कमांडच्या अखत्यारीत येतो. मध्य भागातील लष्कराच्या सर्व कारवायांची जबाबदारी याच कमांडवर असते.
या नव्या हवाई सरावामुळे लष्करी श्वानांचा वापर आणखी वाढणार आहे. भारतीय लष्कर अनेक वर्षांपासून शोध मोहिमा आणि दहशतवादविरोधी कारवायांमध्ये श्वानांचा वापर करत आलं आहे. त्यांची वास घेण्याची क्षमता हा त्यांचा सर्वात मोठा फायदा असतो.
लष्करी श्वानांना कठीण भौगोलिक परिस्थितीत माणसांचा माग काढण्याचं प्रशिक्षण दिलं जातं. याशिवाय बॉम्ब, शस्त्रे आणि माणसांचा शोध घेण्यातही ते तरबेज असतात. जवान एखाद्या धोकादायक ठिकाणी पोहोचण्यापूर्वी हे श्वान इमारती आणि संशयित लपण्याच्या जागांची तपासणी करतात. जेव्हा जवानांना शत्रूच्या हद्दीत घुसावं लागतं, तेव्हा या श्वानांची भूमिका खूप महत्त्वाची ठरते. लष्कराचे पॅरा स्पेशल फोर्सेस आधीपासूनच अशा लढाऊ श्वानांचा वापर करत आहेत.