चॅम्पियन्स ट्रॉफी वादावरून भारत-पाक तणाव; आयसीसी बैठक पुढे ढकलली

भारताचे सामने दुसऱ्या ठिकाणी खेळवण्याची बीसीसीआयची मागणी आहे. हायब्रिड मॉडेलचा विचार सुरू आहे.

दिल्ली: आयसीसी चॅम्पियन्स ट्रॉफीच्या आयोजनावरून भारत आणि पाकिस्तानमध्ये तणाव वाढला आहे. आज होणारी आयसीसीची आणीबाणीची बैठक उद्यापर्यंत पुढे ढकलण्यात आल्याची माहिती आहे. पाकिस्तान क्रिकेट बोर्डाचे अध्यक्ष दुबईत दाखल झाले आहेत. बैठकीपूर्वी समेटासाठी पडद्यामागे चर्चा झाली, मात्र त्यातून कोणताही तोडगा निघाला नाही. २० मिनिटांच्या चर्चेत भारत आणि पाकिस्तान आपल्या भूमिकेवर ठाम राहिल्याने बैठक उद्यापर्यंत पुढे ढकलण्याचा निर्णय घेण्यात आला.

चॅम्पियन्स ट्रॉफी फेब्रुवारी-मार्चमध्ये पाकिस्तानात होणार आहे. मात्र, राजकीय आणि सुरक्षेच्या कारणास्तव भारत पाकिस्तानात खेळण्यास तयार नाही, अशी बीसीसीआयची भूमिका आहे. ९ तारखेलाच केंद्र सरकारने याबाबत आपली भूमिका स्पष्ट केली होती. बीसीसीआयनेही हीच भूमिका घेतली आहे. भारताचे सामने दुबई किंवा यूएईमध्ये खेळवण्याची बीसीसीआयची मागणी आहे.

गेल्या वर्षी पाकिस्तानात झालेल्या आशिया चषकात भारताने भाग घेतला नव्हता. हायब्रिड मॉडेलनुसार भारताचे सामने श्रीलंकेत खेळवण्यात आले होते. चॅम्पियन्स ट्रॉफीमध्येही भारताचे सामने दुसऱ्या ठिकाणी खेळवण्याची बीसीसीआयची मागणी आहे. मात्र, इतर संघांना काहीच अडचण नसताना भारतालाच सुरक्षेची काळजी का, असा सवाल पाकिस्तान क्रिकेट बोर्डाने उपस्थित केला आहे. भारताने पाकिस्तानातच खेळावे, अशी त्यांची भूमिका आहे. यामुळेच वाद निर्माण झाला आहे. बीसीसीआयने पाकिस्तानात खेळणार नाही आणि पीसीबीने भारताने पाकिस्तानातच खेळावे, अशी भूमिका घेतल्याने स्पर्धेचे भवितव्य अनिश्चित झाले आहे.