Maharashtra Rain : महाराष्ट्रासह 20 राज्यांमध्ये विजांच्या कडकडाटासह मुसळधार पावसाची शक्यता, IMD ने दिलाय इशारा!

पुढील ५ दिवसांत महाराष्ट्रासह जवळपास २० राज्यांमध्ये मुसळधार पाऊस, विजांच्या कडकडाटासह पाऊस आणि जोरदार वारे वाहण्याची शक्यता असल्याचा इशारा हवामान खात्याने दिला आहे. त्यामुळे परतीचा पाऊस राज्याला चांगलाच झोडपून काढणार असल्याचे दिसत आहे.

देशात पाऊस धुमाकूळ घालणार

उत्तरेकडील राज्यांमध्ये, विशेषतः हिमाचल प्रदेश, उत्तराखंड, जम्मू-काश्मीर, दिल्ली, पंजाब, हरियाणा यांसारख्या राज्यांमध्ये, नैऋत्य मोसमी पाऊस सक्रिय झाल्याने मुसळधार पाऊस पडत आहे. या मुसळधार पावसामुळे पूर, भूस्खलन होऊन जनजीवन विस्कळित झाले आहे. बंगालच्या उपसागरात निर्माण होणारे कमी दाबाचे क्षेत्र आणि बंगालच्या उपसागरात असलेले वाढते वारे यामुळे उत्तरेकडील राज्यांमध्ये मुसळधार पाऊस पडत असल्याचे वृत्त आहे. 

या पार्श्वभूमीवर भारतीय हवामान खात्याने संपूर्ण उत्तर भारतात मुसळधार ते अति मुसळधार पावसाचा अंदाज वर्तवला आहे. महाराष्ट्र, हिमाचल प्रदेश, उत्तराखंड, पंजाब, हरियाणा, दिल्ली, पूर्व राजस्थान या राज्यांमध्ये मुसळधार ते अति मुसळधार पाऊस पडण्याची शक्यता आहे. 

 पुढील ५ दिवस भारताच्या अनेक भागात मुसळधार पाऊस, विजांसह पाऊस आणि जोरदार वारे वाहण्याची शक्यता आहे. त्यानुसार जवळपास २० राज्यांमध्ये मुसळधार पावसाचा इशारा देण्यात आला आहे.

२० राज्यांना मुसळधार पावसाचा इशारा

ईशान्येकडील राज्ये

अरुणाचल प्रदेश, आसाम, मेघालय, नागालँड, मणिपूर, मिझोरम, त्रिपुरा या भागात १० ते १६ तारखेपर्यंत विजांच्या कडकडाटासह पाऊस पडेल. विशेषतः १२ ते १६ तारखेपर्यंत मुसळधार पाऊस पडेल असा इशारा देण्यात आला आहे.

पूर्व आणि मध्य राज्ये

पुढे पश्चिम महाराष्ट्र, मध्य प्रदेश, छत्तीसगड, बिहार, झारखंड, ओडिशा या भागात १० ते १४ तारखेपर्यंत मुसळधार पाऊस पडेल. तसेच उप-हिमालयीन पश्चिम बंगाल, सिक्कीम भागात १० ते १५ तारखेपर्यंत मुसळधार पाऊस पडेल.

वायव्य भारत

पूर्व उत्तर प्रदेश, जम्मू-काश्मीर, उत्तराखंड आणि हिमाचल प्रदेशात ११ ते १५ तारखेपर्यंत पाऊस पडेल.

विजांसह मुसळधार पाऊस

पश्चिमेकडील राज्ये

मध्य प्रदेश, मराठवाडा, कोकण आणि गोवा, गुजरात या भागात १२ ते १६ तारखेपर्यंत पाऊस पडेल. मराठवाडा, कोकण, मध्य महाराष्ट्र भागात १३, १४ तारखेला मुसळधार पावसाची शक्यता आहे.

तमिळनाडू, कर्नाटक, केरळ - पावसाचा इशारा

तमिळनाडू, केरळ, कर्नाटक, आंध्र प्रदेश आणि तेलंगणा, रायलसीमा या भागात १० ते १४ तारखेपर्यंत विजांच्या कडकडाटासह पाऊस पडेल. किनारी आंध्र प्रदेश आणि यनम भागात ३०-४० किमी वेगाने जोरदार वारे वाहतील असा इशारा हवामान खात्याने दिला आहे.