LPG Crisis: घाबरू नका, पेट्रोल-डिझेल पुरेसं; पण LPG चं टेन्शन आहेच-सरकारची कबुली

India Fuel Supply Stable Amid West Asia Crisis Govt Says But LPG Concerns Remain: पश्चिम आशियातील संघर्षामुळे LPG पुरवठ्यावर परिणाम होण्याची भीती निर्माण झाली आहे. त्यामुळे देशभरात लोक घाबरून गॅस सिलेंडर बुक करत आहेत आणि एजन्सीबाहेर रांगा लावत आहेत.

India Fuel Supply Stable Amid West Asia Crisis Govt Says But LPG Concerns Remain:पश्चिम आशियातील युद्ध आणि इराणने होरमुझची सामुद्रधुनी (Strait of Hormuz) रोखल्यामुळे जागतिक ऊर्जा पुरवठ्यावर परिणाम झाला आहे. याचा परिणाम म्हणून भारतात LPG पुरवठ्याबद्दल लोकांमध्ये भीतीचे वातावरण आहे. याच पार्श्वभूमीवर, सरकारने शुक्रवारी सलग तिसऱ्या दिवशी पत्रकार परिषद घेऊन परिस्थिती स्पष्ट केली. देशभरात घरगुती गॅस सिलेंडरसाठी 'पॅनिक बुकिंग' सुरू झाले असून, गॅस एजन्सीबाहेर लोकांच्या लांबच लांब रांगा दिसत आहेत.

घरगुती आणि व्यावसायिक LPG सिलेंडरच्या पुरवठ्याबद्दलच्या चिंतेवर बोलताना केंद्र सरकारने लोकांना दिलासा दिला आहे. "घरांसाठी गॅसचा अखंड पुरवठा सुनिश्चित केला जाईल," असे आश्वासन सरकारने दिले. ५ मार्चच्या तुलनेत देशांतर्गत LPG उत्पादनात ३० टक्क्यांनी वाढ झाली असल्याचा दावाही सरकारने केला.

पेट्रोलियम आणि नैसर्गिक वायू मंत्रालयाच्या सहसचिव सुजाता शर्मा यांनी पत्रकार परिषदेत माहिती दिली, "घरगुती ग्राहकांना LPG चा अखंड पुरवठा सुनिश्चित केला आहे. त्याचप्रमाणे, रुग्णालये आणि शैक्षणिक संस्थांनाही LPG पुरवठा केला जात आहे. ५ मार्चच्या तुलनेत आज देशांतर्गत LPG उत्पादन ३० टक्क्यांनी वाढले आहे. आपल्या रिफायनरीज सध्या ३० टक्के जास्त LPG उत्पादन करत आहेत."

होरमुझची सामुद्रधुनी बंद झाल्यानंतर LPG हा "चिंतेचा विषय" बनला असल्याचे त्यांनी मान्य केले. मात्र, देशातील २५,००० वितरकांपैकी कोणीही साठा पूर्णपणे संपल्याची (dry-out) तक्रार केलेली नाही, असेही त्यांनी स्पष्ट केले.

शर्मा पुढे म्हणाल्या, "कच्च्या तेलाबाबत बोलायचं झाल्यास, आपली शुद्धीकरण क्षमता २५८ दशलक्ष मेट्रिक टन आहे. पेट्रोल आणि डिझेलच्या उत्पादनात आपण स्वयंपूर्ण आहोत; त्यामुळे हे इंधन आयात करण्याची गरज नाही. आपल्या सर्व रिफायनरीज सध्या १००% किंवा त्याहून अधिक क्षमतेने कार्यरत आहेत. रिफायनरीजकडे कच्च्या तेलाचा पुरेसा साठा आहे आणि पुरवठाही नियमितपणे सुरू आहे. घरगुती ग्राहकांना PNG (पाईप नॅचरल गॅस) आणि CNG (कॉम्प्रेस्ड नॅचरल गॅस) चा पुरवठा कोणत्याही व्यत्ययाशिवाय सुरू आहे. त्यामुळे घाबरून जाण्याची अजिबात गरज नाही."

"याशिवाय, मोठ्या शहरांमधील व्यावसायिक ग्राहक, ज्यांना सध्या LPG पुरवठ्याच्या समस्येमुळे अडचणी येत आहेत, त्यांच्या समस्या सोडवण्यासाठी भारत सरकार सर्वतोपरी प्रयत्न करत आहे. आम्ही अशा सर्व व्यावसायिक ग्राहकांना आवाहन करतो की त्यांनी PNG कनेक्शनसाठी त्यांच्या स्थानिक CGD (सिटी गॅस डिस्ट्रिब्युशन) नेटवर्क प्रदात्याशी किंवा डीलरशी संपर्क साधावा," असेही त्या म्हणाल्या.

LPG चा काळाबाजार आणि साठेबाजी करणाऱ्यांवर सरकार कारवाई करत असल्याचेही त्यांनी सांगितले.

भारताला घरगुती LPG ची मागणी पूर्ण करण्यासाठी काही प्रमाणात आयातीवर अवलंबून राहावे लागते. मात्र, सध्याचा साठा, वाढलेले उत्पादन आणि पुरवठा साखळीतील उपाययोजनांमुळे घरगुती गरज पूर्ण करण्यासाठी पुरेशी व्यवस्था असल्याचे अधिकाऱ्यांचे म्हणणे आहे.