लडाखमध्ये भारत-चीन सैन्यमाघार पूर्ण; दीपावलीत गोडधोड

तपासणी सुरू असून गस्तीचे तंत्र ग्राउंड कमांडर ठरवतील, असे भारतीय सैन्य सूत्रांनी सांगितले.

लडाख: पूर्व लडाखमधील वास्तविक नियंत्रण रेषेवरून (एलएसी) भारताचे आणि चीनचे सैन्यमाघार पूर्ण झाली आहे. दोन्ही देशांनी डेम्चोक आणि डेपसांग क्षेत्रातून करारानुसार माघार घेतली आहे. या क्षेत्रात लवकरच सैन्य गस्त सुरू होईल. दीपावलीनिमित्त चिनी सैन्याशी गोडधोड वाटले जातील, असे सैन्य सूत्रांनी सांगितले.

तपासणी सुरू असून गस्तीचे तंत्र ग्राउंड कमांडर ठरवतील, असे भारतीय सैन्य सूत्रांनी सांगितले. दोन्ही देशांमध्ये महत्त्वपूर्ण करार झाल्याचे भारतातील चिनी राजदूत सुन वेइदोंग यांनी कोलकाता येथे सांगितले. रशियातील ब्रिक्स शिखर परिषदेदरम्यान चिनी अध्यक्ष शी जिनपिंग आणि भारतीय पंतप्रधान नरेंद्र मोदी यांच्यात बैठक झाली. दोन्ही नेत्यांमध्ये महत्त्वपूर्ण करार झाल्याने भविष्यात आपले संबंध सुमधुर राहतील, अशी अपेक्षा असल्याचे त्यांनी सांगितले. दोन शेजारी देशांमध्ये मतभेद असणे स्वाभाविक आहे. ते कसे हाताळायचे आणि सोडवायचे हे सर्वात महत्त्वाचे आहे, असेही त्यांनी सांगितले.

परस्परांमध्ये संघर्ष झालेल्या ठिकाणी दोन्ही गटांनी तात्पुरते उभारलेले तंबूही हटवले आहेत. माघार पूर्ण झाली आहे की नाही हे दोन्ही देश तपासून पडताळून पाहतील. भारताच्या आणि चीनच्या सैन्यमाघारीच्या निर्णयाचे अमेरिकेने स्वागत केले आहे. परिस्थितीवर बारकाईने लक्ष ठेवले जात असून या विषयावर भारताशी चर्चा केली जाईल, असे अमेरिकेचे परराष्ट्र विभागाचे प्रवक्ते मॅथ्यू मिलर म्हणाले.