INDIA Alliance Mock Parliament: इंडिया आघाडीच्या 'मॉक पार्लमेंट'ला उत्तर देण्यासाठी 'सिटिझन फॉर डेमोक्रसी'ची पर्यायी संसद
सार
इंडिया आघाडीच्या 'मॉक पार्लमेंट'ला उत्तर देण्यासाठी 'सिटिझन फॉर डेमोक्रसी' या संघटनेने एका पर्यायी कार्यक्रमाचं आयोजन केलं आहे. याला भाजपचा पाठिंबा असल्याची चर्चा आहे. काँग्रेस खासदारांचा लोकशाहीविरोधी चेहरा उघड करणे, हा यामागचा मुख्य उद्देश असल्याचा दावा आयोजकांनी केला आहे.
नवी दिल्ली: इंडिया आघाडीच्या 'मॉक पार्लमेंट'ला (प्रतीकात्मक संसद) उत्तर देण्यासाठी आता एक पर्यायी 'मॉक पार्लमेंट' भरवली जाणार आहे. 'सिटिझन फॉर डेमोक्रसी' ही संघटना एनडीएमसी (NDMC) कन्व्हेन्शन सेंटरमध्ये हा कार्यक्रम आयोजित करत आहे. इंडिया आघाडी ज्यावेळी मुख्य निवडणूक आयुक्त ज्ञानेश कुमार यांच्यावर प्रतीकात्मक महाभियोग चालवेल, नेमक्या त्याच वेळी हा पर्यायी कार्यक्रम होईल. राहुल गांधींसह काँग्रेसच्या इतर खासदारांचा लोकशाहीविरोधी चेहरा आपण उघड करू, असं आयोजकांनी स्पष्ट केलं आहे. या कार्यक्रमाला भाजपचा पडद्यामागून पाठिंबा असल्याची जोरदार चर्चा आहे. काँग्रेस अध्यक्ष मल्लिकार्जुन खर्गे यांच्या निवासस्थानी उद्या मुख्य निवडणूक आयुक्त ज्ञानेश कुमार यांच्यावर प्रतीकात्मक खटला चालवला जाणार आहे.
दिल्ली पोलिसांनी सुरुवातीला रामलीला मैदान आणि अशोका हॉटेलमध्ये या कार्यक्रमाला परवानगी नाकारली होती. त्यामुळे विरोधकांनी हा प्रतीकात्मक खटला आता काँग्रेस अध्यक्षांच्या घरासमोरील लॉनवर हलवला आहे. या कार्यक्रमासाठी इंडिया आघाडीचे खासदार, मित्रपक्षांचे नेते, निवृत्त न्यायाधीश आणि मानवाधिकार कार्यकर्त्यांनाही आमंत्रित करण्यात आलं आहे. दरम्यान, व्यापारी संघटनांनी १ नोव्हेंबर रोजी होणारी रॅली पुढे ढकलण्याची मागणी करत अखिलेश यादव आणि ममता बॅनर्जी यांच्यासारख्या नेत्यांना पत्रं पाठवली आहेत. त्यांनी राहुल गांधींनाही तीन वेळा पत्र पाठवलं होतं, पण त्यांनी त्याकडे दुर्लक्ष केलं.
दिल्लीत कडेकोट बंदोबस्त आणि निर्बंध
दुसरीकडे, केंद्रीय गृह मंत्रालय आणि दिल्ली पोलिसांनी रामलीला मैदानावर होणाऱ्या इंडिया आघाडीच्या महारॅलीच्या पार्श्वभूमीवर सुरक्षा व्यवस्था कडक केली आहे. विरोधी पक्ष मतदार यादीतील बदलांना विरोध करण्यासाठी आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी ही निषेध रॅली काढत आहेत. दिल्ली पोलीस यासाठी सुमारे ३,००० जवान आणि निमलष्करी दलाच्या तुकड्या तैनात करणार आहेत. प्रशासनाने सुरक्षेवर लक्ष ठेवण्यासाठी १५० हून अधिक एआय (AI) आधारित सीसीटीव्ही कॅमेरे आणि तात्पुरते कंट्रोल रूम उभारले आहेत. पोलिसांनी सुरक्षा व्यवस्था चोख ठेवण्यासाठी मैदान आणि आजूबाजूचा परिसर ८ रिजन आणि १४ झोनमध्ये विभागला आहे. दिल्ली पोलिसांनी संध्याकाळी ५ वाजेपूर्वी रॅली संपवून कार्यकर्त्यांनी निघून जावं, असे कडक निर्देश दिले आहेत. पोलिसांनी मैदानावर रात्री थांबायला किंवा इतर ठिकाणी मोर्चा काढायला सक्त मनाई केली आहे. काँग्रेसने या रॅलीत सहभागी होण्यासाठी विविध राज्यांमधून येणाऱ्या कार्यकर्त्यांसाठी विशेष ट्रेन सोडण्याची मागणी केंद्रीय रेल्वे मंत्रालयाकडे केली आहे.