YouTuber Death : आई, I Love You... आणि फोन बंद, हैदराबादमध्ये प्रसिद्ध यूट्यूबर तरुणीचा घरातच अंत

YouTuber Death : हैदराबादमध्ये २१ वर्षीय यूट्यूबर बोनू कोमाली तिच्या भाड्याच्या घरात मृतावस्थेत आढळली. कुवेतमध्ये असलेल्या आईला 'आय लव्ह यू' असा मेसेज पाठवल्यानंतर तिने हे टोकाचं पाऊल उचललं. 

YouTuber Death : हैदराबादमध्ये एका २१ वर्षीय यूट्यूबर आणि विज्ञान शाखेची विद्यार्थिनी असलेल्या बोनू कोमालीचा मृतदेह सोमवारी तिच्या भाड्याच्या घरात आढळला. धक्कादायक म्हणजे, मृत्यूच्या काही वेळापूर्वीच तिने आपल्या आईला 'आय लव्ह यू सो मच' असा मेसेज पाठवला होता. आंध्र प्रदेशातील विशाखापट्टणमची रहिवासी असलेली कोमाली, हैदराबादमधील एका खासगी कॉलेजमध्ये बीएससी करत होती. गेल्या ११ महिन्यांपासून ती एका अपार्टमेंटमध्ये एकटीच राहत होती. ती तिच्या यूट्यूब व्हिडिओमुळे खूप प्रसिद्ध होती.

सोमवारी पहाटे तिने कुवेतमध्ये काम करणाऱ्या आपल्या आई, बी. सत्य वरलक्ष्मी यांना शेवटचा मेसेज पाठवला. 'लहान भावाची नीट काळजी घे,' असंही तिने मेसेजमध्ये लिहिलं होतं. त्यानंतर तिचा फोन स्विच ऑफ झाला. आईने तिला वारंवार फोन केले, पण काहीच प्रतिसाद मिळाला नाही. त्यामुळे त्यांनी कोमालीच्या एका मैत्रिणीला घरी जाऊन पाहण्यास सांगितलं.

मैत्रीण घरी पोहोचल्यावर दरवाजा आतून बंद होता. दरवाजा तोडून आत प्रवेश केला असता, कोमाली मृतावस्थेत आढळली. घटनास्थळावरून पोलिसांना एक शिडी आणि साडी सापडली आहे. प्रेमसंबंध तुटल्यामुळे आलेल्या नैराश्यातून तिने आत्महत्या केली असावी, असा पोलिसांचा प्राथमिक अंदाज आहे. कोमाली गेल्या तीन वर्षांपासून एका २७ वर्षीय सॉफ्टवेअर इंजिनिअर आणि सहकारी यूट्यूबरसोबत रिलेशनशिपमध्ये होती. पोलिसांनी दिलेल्या माहितीनुसार, सहा महिन्यांपूर्वीही कोमालीने आत्महत्येचा प्रयत्न केला होता.

कोमालीचा मृतदेह शवविच्छेदनासाठी उस्मानिया जनरल हॉस्पिटलमध्ये पाठवण्यात आला आहे. पोलीस तिच्या फोन रेकॉर्ड्स, मेसेजेस आणि मित्र-मैत्रिणी व शेजाऱ्यांकडून मिळालेल्या माहितीच्या आधारे या प्रकरणाचा अधिक तपास करत आहेत.