HDFC Bank: HDFC बँकेत मोठे फेरबदल, ३५ वर्षांचा अनुभव असलेल्या जिमी टाटांवर नवी जबाबदारी!
सार
भारतातील आघाडीची खासगी बँक असलेल्या HDFC बँकेच्या संचालक मंडळात मोठे बदल जाहीर झाले आहेत. जिमी टाटा यांची नवे कार्यकारी संचालक म्हणून नियुक्ती करण्यात आली आहे, तर व्ही. श्रीनिवास रंगन यांना मुदतवाढ मिळाली आहे. यासोबतच, बँकेने संचालक मंडळ विस्तारण्याचा निर्णय घेतला आहे.
मुंबई: देशातील सर्वात मोठ्या खासगी बँकांपैकी एक असलेल्या HDFC बँकेच्या संचालक मंडळात काही मोठे बदल झाले आहेत. बँकेने जिमी टाटा यांची तीन वर्षांसाठी पूर्णवेळ कार्यकारी संचालक (Executive Director) म्हणून नियुक्ती केली आहे. स्टॉक एक्सचेंजला दिलेल्या माहितीत बँकेने ही घोषणा केली. अर्थात, या नियुक्तीसाठी रिझर्व्ह बँक ऑफ इंडियाच्या (RBI) अंतिम मंजुरीची गरज असेल. आरबीआयच्या नियमांनुसारच त्यांचं मानधन आणि कार्यकाळ निश्चित होईल, असंही बँकेने स्पष्ट केलं आहे.
जिमी टाटा कोण आहेत?
जिमी टाटा सध्या HDFC बँकेत मुख्य क्रेडिट ऑफिसर (Chief Credit Officer) म्हणून काम पाहत आहेत. त्यांनी जमनालाल बजाज इन्स्टिट्यूट ऑफ मॅनेजमेंटमधून फायनान्समध्ये मास्टर्स पदवी घेतली आहे. सोबतच, इन्स्टिट्यूट ऑफ चार्टर्ड फायनान्शियल ॲनालिस्ट्स ऑफ इंडियामधून त्यांनी सीएफए (CFA) ही पात्रताही मिळवली आहे.
बँकिंग आणि फायनान्स क्षेत्रात त्यांना तब्बल ३५ वर्षांपेक्षा जास्त अनुभव आहे. त्यांनी १९८७ मध्ये स्ट्रॅटेजिक कन्सल्टंट्समधून आपल्या करिअरची सुरुवात केली. त्यानंतर ते ॲपल इंडस्ट्रीजमध्ये होलसेल लीजिंग आणि हायर पर्चेस विभागाचे प्रमुख होते.
१९९४ मध्ये ते HDFC बँकेत कॉर्पोरेट बँकिंग विभागात रिलेशनशिप मॅनेजर म्हणून रुजू झाले आणि नंतर याच विभागाचे प्रमुख बनले. जून २०१३ मध्ये त्यांनी बँकेचे मुख्य जोखीम अधिकारी (Chief Risk Officer) म्हणून जबाबदारी स्वीकारली होती. सध्या ते HDB फायनान्शियल सर्व्हिसेस आणि इंटरनॅशनल ॲसेट रिकन्स्ट्रक्शन कंपनीच्या संचालक मंडळावरही आहेत.
व्ही. श्रीनिवास रंगन यांची पुन्हा नियुक्ती
याचबरोबर, बँकेच्या संचालक मंडळाने व्ही. श्रीनिवास रंगन यांचीही पूर्णवेळ कार्यकारी संचालक म्हणून पुन्हा नियुक्ती करण्यास मंजुरी दिली आहे. त्यांचा कार्यकाळ २३ नोव्हेंबर २०२६ ते २२ नोव्हेंबर २०२७ असा एक वर्षाचा असेल. या नियुक्तीसाठीही आवश्यक नियामक मंजुरी मिळणं बाकी आहे.
संचालक मंडळाचा विस्तार आणि नवीन MD-CEO प्रक्रिया
HDFC बँकेने आपल्या संचालक मंडळाचा विस्तार करण्याचाही निर्णय घेतला आहे. यासाठी एका अतिरिक्त पूर्णवेळ संचालकाचं पद तयार केलं आहे. यामुळे, व्यवस्थापकीय संचालक (MD) आणि मुख्य कार्यकारी अधिकारी (CEO) वगळता, बोर्डावरील पूर्णवेळ संचालकांची संख्या ४ होईल. बँक आणि तिच्या उपकंपन्यांमध्ये चांगला समन्वय, देखरेख आणि प्रशासकीय रचना मजबूत करण्यासाठी हे पाऊल उचलल्याचं बँकेने म्हटलं आहे.
एमडी आणि सीईओ पदासाठी बँकेने दोन उमेदवारांची नावं प्राधान्यक्रमानुसार आरबीआयकडे पाठवली आहेत. तीन वर्षांच्या कार्यकाळासाठी हा प्रस्ताव असून, बँकेने सध्या या उमेदवारांची ओळख जाहीर केलेली नाही. नवीन एमडी आणि सीईओ पदभार स्वीकारल्यानंतर, त्यांच्याशी चर्चा करूनच नवीन पूर्णवेळ संचालकाची नियुक्ती केली जाईल.