Online Investment Fraud: गोव्यातील वृद्धाला ३९ लाखांचा गंडा, पुण्याचे दोन भामटे अटकेत

शेअर बाजारात गुंतवणुकीच्या बहाण्याने गोव्यातील एका ६० वर्षीय वृद्धाची ३९.०१ लाखांची फसवणूक झाली आहे. या प्रकरणी गोवा पोलिसांनी पुण्यातून दोघांना अटक केली. खोटा नफा दाखवून या वृद्धाकडून पैसे उकळण्यात आले. पोलिसांनी आतापर्यंत २३.१२ लाख रुपये परत मिळवले आहेत.

गोवा सायबर क्राईम पोलिसांनी महाराष्ट्रातील पुणे जिल्ह्यातील दोघांना अटक केली आहे. त्यांनी एका ६० वर्षीय वृद्धाला ऑनलाइन शेअर ट्रेडिंगच्या नावाखाली तब्बल ३९.०१ लाखांचा गंडा घातला. पोलिसांनी दिलेल्या माहितीनुसार, फसवणूक झालेल्या रकमेपैकी २३.१२ लाख रुपये सुरक्षित करण्यात आले आहेत. सागर प्रकाश ढोळवी आणि अजिंक्य रवींद्र अभंग अशी या आरोपींची नावे असून, पोलिसांनी त्यांना अनुक्रमे २३ आणि २४ ऑक्टोबरला अटक केली. हे दोघेही पुणे जिल्ह्यातील नारायणगाव आणि आळेफाटा परिसरातील रहिवासी आहेत.

कशी झाली फसवणूक?

सायबर क्राईमचे पोलीस अधीक्षक जीवबा दळवी यांनी सांगितले की, पर्वरी (Porvorim) येथे राहणाऱ्या या वृद्धाने ३ ऑक्टोबरला तक्रार दाखल केली होती. २१ ऑगस्ट ते २८ सप्टेंबर या काळात आपली ३९,०१,०४७ रुपयांची फसवणूक झाल्याचे त्यांनी तक्रारीत म्हटले होते.

आरोपींनी व्हॉट्सॲपवरून या वृद्धाशी संपर्क साधला आणि त्यांना ऑनलाइन शेअर ट्रेडिंगमध्ये गुंतवणूक करण्याचे आमिष दाखवले. एका फेक इन्व्हेस्टमेंट ॲपवर खोटा नफा दाखवून आरोपींनी या वृद्धाला वेगवेगळ्या बँक खात्यांमध्ये पैसे ट्रान्सफर करायला लावले.

पण जेव्हा या वृद्धाने गुंतवलेले पैसे आणि नफा काढण्याचा प्रयत्न केला, तेव्हा आरोपींनी त्यांच्याकडे आणखी पैशांची मागणी केली. पैसे देण्यास नकार दिल्यावर आरोपींनी संपर्क तोडला. आपली फसवणूक झाल्याचे लक्षात येताच वृद्धाने थेट पोलिसांत धाव घेतली.

आरोपींपर्यंत कसे पोहोचले पैसे?

तपासात असे समोर आले की, अभंग याच्या बँक खात्यात १०.८ लाख रुपये, तर ढोळवी याच्या खात्यात १२ लाख रुपये ट्रान्सफर झाले होते, अशी माहिती दळवी यांनी दिली. पोलिसांनी तातडीने पावले उचलत तक्रारदाराचे २३.१२ लाख रुपये सुरक्षित केले आहेत.

पोलिसांनी भारतीय न्याय संहिता (BNS) आणि माहिती तंत्रज्ञान कायद्याच्या (IT Act) कलमांखाली या दोघांना अटक केली आहे. उपनिरीक्षक अनिल पोळेकर यांच्या नेतृत्वाखालील गोवा सायबर क्राईम पोलिसांच्या पथकाने हा तपास केला.

पोलिसांचा सायबर फ्रॉड बाबत इशारा

सोशल मीडिया आणि मेसेजिंग ॲप्सवर येणाऱ्या गुंतवणुकीच्या ऑफर्सपासून सावध राहा, असे आवाहन पोलिसांनी केले आहे. विशेषतः खात्रीशीर किंवा भरघोस परतावा देणाऱ्या योजनांपासून दूर राहण्याचा सल्ला पोलिसांनी दिला आहे.

जर तुम्हाला ऑनलाइन आर्थिक फसवणूक झाल्याचा संशय असेल, तर तात्काळ राष्ट्रीय सायबर क्राईम हेल्पलाइन १९३० (1930) वर कॉल करा किंवा cybercrime.gov.in वर तक्रार नोंदवा, असे पोलिसांनी सांगितले आहे.

(एजन्सीच्या इनपुट्ससह)