Rishikesh Viral Video: 'हे माझं हक्काचं घर वाटलं'; ऋषिकेशमध्ये ढसाढसा रडली डच तरुणी, व्हिडिओ व्हायरल

भारतात फिरायला आलेल्या एका डच तरुणीला ऋषिकेशमध्ये आलेला भावनिक अनुभव सध्या सोशल मीडियावर व्हायरल होत आहे. अनेक वर्षांपासून मनात साठवून ठेवलेल्या भावनांचा बांध फुटला आणि ती ढसाढसा रडली. आयुष्यात पहिल्यांदाच आपल्याला 'हक्काची जागा' मिळाल्याची भावना इशा ब्रँडरहॉर्स्टने व्यक्त केली आहे.

भारतात आल्यावर एका डच तरुणीच्या आयुष्यात काय बदल झाले, याचा अनुभव तिने मनमोकळेपणाने शेअर केला आहे. इशा ब्रँडरहॉर्स्ट असं या तरुणीचं नाव असून ती एक स्टोरीटेलर आणि फिल्ममेकर आहे. उत्तराखंडमधील पवित्र शहर असलेल्या ऋषिकेशला भेट दिल्यानंतर तिला काय वाटलं, याचा एक इन्स्टाग्राम व्हिडिओ तिने शेअर केलाय. हा व्हिडिओ सध्या सोशल मीडियावर तुफान व्हायरल होत आहे.

'माझी हक्काची जागा' असल्याची भावना

जगात इतर कुठेही जाणवली नाही, अशी एक वेगळीच ओढ आणि 'हक्काची जागा' असल्याची भावना भारतात आल्यावर जाणवल्याचं इशा सांगते. मानसिक शांतता आणि आयुष्याला नवा अर्थ शोधण्यासाठी जगभरातून हजारो पर्यटक ऋषिकेशमध्ये येतात. इशासुद्धा याच शोधात तिथे पोहोचली होती.

अनेक वर्षांनंतर अश्रूंचा बांध फुटला

"ऋषिकेशमधल्या एका पुलावरून चालताना मला एक वेगळंच आत्मिक समाधान जाणवलं, जे याआधी कुठेच मिळालं नव्हतं. अचानक त्या भावनांनी माझ्यावर ताबा मिळवला आणि मी रडायला लागले," असं इशाने या व्हिडिओमध्ये सांगितलं आहे. स्वतःला सावरण्यासाठी तिने मनाभोवती एक मोठी भिंत उभी केली होती. त्यामुळे अनेक वर्षांपासून तिला साधं रडताही आलं नव्हतं. पण त्या दिवशी तिचे अश्रू आपोआप वाहू लागले. आयुष्यात पहिल्यांदाच आपण एखाद्या जागेसाठी पूर्णपणे पात्र आहोत, असं तिला वाटलं.

हा व्हिडिओ व्हायरल झाल्यानंतर अनेक युजर्सनी कमेंट बॉक्समध्ये तिला पाठिंबा दिला आहे. ऋषिकेशच्या वातावरणात आणि ऊर्जेत एक वेगळीच जादू आहे, असेच अनुभव आम्हालाही आले आहेत, असं अनेकांनी म्हटलंय. भारतातील प्रत्येक शहरात एक दैवी शक्ती आहे आणि ज्याच्या मनात अध्यात्माची ओढ आहे, त्याला ही ऊर्जा नक्कीच जाणवते, अशा प्रतिक्रिया नेटकऱ्यांनी दिल्या आहेत.