Bengaluru Schools: आई नोकरी करते का? बंगळुरूतील शाळांमध्ये गृहिणींच्या मुलांना प्राधान्य, पालकांचा दावा

बंगळुरूतील एका पालकाने रेडिटवर केलेल्या पोस्टमुळे सध्या मोठी चर्चा सुरू आहे. इथल्या काही शाळांमध्ये प्रवेश देताना आई गृहिणी असलेल्या मुलांना प्राधान्य दिलं जात असल्याचा दावा या पोस्टमध्ये करण्यात आला आहे. आई नोकरी करत असेल तर प्रवेश नाकारला जाऊ शकतो, त्यामुळे अनेक पालक फॉर्मवर खोटी माहिती देत असल्याचंही यात म्हटलंय.

बंगळुरूतील एका पालकाने शाळेतील प्रवेशाबाबत केलेली एक पोस्ट सध्या चर्चेचा विषय ठरली आहे. मुलांच्या प्रवेशासाठी शाळा मातांवर काही अजब अटी लादत आहेत का, असा प्रश्न यातून उभा राहिलाय. बंगळुरूच्या बनशंकरी भागातील काही शाळांमध्ये एक 'अलिखित' नियम पाळला जातोय, ज्यामध्ये आई गृहिणी (हाऊसवाईफ) असलेल्या मुलांना प्रवेशात प्राधान्य दिलं जात असल्याचा दावा या पालकाने केला आहे.

या पालकाला अडीच वर्षांची मुलगी आहे. नुकतीच त्यांनी मुलीसाठी शाळा शोधायला सुरुवात केली, तेव्हा त्यांना या 'फिल्ट्रेशन क्रायटेरिया' (चाळणी पद्धत) बद्दल समजलं. रेडिटवर केलेल्या पोस्टनुसार, काही शाळा फॉर्ममध्ये 'मुलाची आई गृहिणी आहे का?' असा प्रश्न विचारतात. जर आई नोकरी करत असेल, तर तो अर्ज नाकारला जाण्याची शक्यता असते, असा दावा त्यांनी केलाय.

ही व्हायरल पोस्ट इथे पाहा: 

या पालकाने त्याच शाळेत शिकणाऱ्या इतर मुलांच्या पालकांशीही चर्चा केली. तेव्हा त्यांना समजलं की हा प्रकार म्हणजे एक 'ओपन सिक्रेट' आहे. मुलीला शाळेत प्रवेश मिळवून द्यायचा असेल, तर फॉर्मवर चुकीची माहिती भरा, असा सल्लाही काही पालकांनी त्यांना दिला.

पण खोटी माहिती देणं या पालकाला पटलं नाही. जर महिलांचं नोकरी करणं शाळांना प्रवेशासाठी अडचण वाटत असेल, तर या शैक्षणिक संस्था मुलांना कोणते संस्कार देणार, असा सवाल त्यांनी उपस्थित केला.

हा प्रकार फक्त प्रवेश प्रक्रियेपुरता मर्यादित नाहीये. शाळा दरवर्षी आईच्या नोकरीबद्दल माहिती विचारतात, जेणेकरून विद्यार्थ्यांवर 'लक्ष' ठेवता येईल, असा आरोपही या पोस्टमध्ये आहे. या दाव्यामुळे आता इंटरनेटवर नोकरी करणाऱ्या मातांकडून असलेल्या अपेक्षा आणि शाळांनी पालकांच्या नोकरीचा विचार करावा का, यावर मोठी चर्चा सुरू झाली आहे.

या पोस्टवर अनेक युजर्सनी प्रतिक्रिया दिल्या आहेत. अशा गोष्टी निमूटपणे सहन करण्यापेक्षा पालकांनी शाळांना जाब विचारला पाहिजे, असं काहींनी म्हटलंय. एका युजरने तर असा सल्ला दिला की, पालकांनी शाळेलाच विचारायला हवं की त्यांच्या संस्थेत किती शिक्षिका स्वतः माता आहेत आणि त्या आपलं काम आणि कुटुंब कसं सांभाळतात.

बंगळुरू हे शहर भारताचं आयटी आणि स्टार्टअप हब म्हणून ओळखलं जातं. अशा शहरात हा प्रकार घडत असल्याचं पाहून या पालकाला मोठा धक्का बसला. मुलांच्या प्रवेशावेळी नोकरी करणाऱ्या मातांना असा दुजाभाव का सहन करावा लागतोय, असा प्रश्न त्यांनी विचारला आहे.

अर्थात, हे सगळे दावे एका रेडिट युजरने आणि इतर पालकांशी झालेल्या चर्चेच्या आधारावर केले आहेत. या दाव्यांची अद्याप कोणतीही स्वतंत्र पडताळणी झालेली नाही. तसंच, चर्चेत उल्लेख केलेल्या शाळा खरोखरच असा नियम पाळतात का, हेही अद्याप सिद्ध झालेलं नाही.

तरीही, या चर्चेमुळे शाळेच्या प्रवेश प्रक्रियेतील पारदर्शकतेवर आणि पालकांच्या नोकरीचा मुलांच्या शिक्षणावर खरंच काही परिणाम व्हायला हवा का, यावर अनेक प्रश्न निर्माण झाले आहेत.