IT कर्मचाऱ्यांनी धरा घरचा रस्ता! हा व्यक्ती ड्राय क्लिनिंगमधून महिन्याला करतोय २ लाखांची कमाई

गुजरातमधील एका ड्राय क्लिनिंग दुकानदाराची महिन्याची कमाई सध्या सोशल मीडियावर सॉफ्टवेअर इंजिनिअर्सनाही धक्का देत आहे. सर्व खर्च वजा करून तो दरमहा सरासरी २ लाख रुपयांपेक्षा जास्त कमावतो, असे या पोस्टमध्ये म्हटले आहे.

आजकाल अनेक लोक सामान्य व्हाईट कॉलर नोकरीपेक्षा इतर कामांमधून जास्त पैसे कमावत आहेत. अशीच एक पोस्ट सध्या चर्चेत आहे. ही गोष्ट एका सामान्य ड्राय क्लिनिंग दुकानदाराची आहे, जो अनेक वर्षांचा अनुभव असलेल्या सॉफ्टवेअर इंजिनिअरइतकी कमाई करतो. गुजरातमधील नलिनी उनागर नावाच्या एका तरुणीने X (पूर्वीचे ट्विटर) वर त्याच्याबद्दल एक पोस्ट शेअर केली आहे.

नलिनीने तिच्या घराजवळील एका ड्राय क्लिनिंग दुकानदारासोबत झालेलं संभाषण सोशल मीडियावर शेअर केलं आहे. दुकानदार, त्याची पत्नी आणि दोन मदतनीस मिळून हे दुकान चालवतात. नलिनीने शेअर केलेल्या आकडेवारीनुसार, ते दररोज इस्त्री करून एका कपड्यामागे १० रुपये दराने ३,५०० रुपये कमावतात. म्हणजेच ते दररोज ३५० कपड्यांना इस्त्री करतात.

ड्राय क्लिनिंगमधून दिवसाला ७,००० रुपये मिळतात. साड्या, सूट यांसारख्या २० प्रीमियम कपड्यांसाठी प्रत्येकी ३५० रुपये मिळतात. म्हणजेच, दररोजची एकूण सरासरी कमाई १०,५०० रुपये आहे. महिन्यातून फक्त ३ दिवस सुट्टी घेतल्यास, महिन्याची कमाई सुमारे २,८३,५०० रुपये होते.

आता खर्च वजा केल्यावर नफा किती राहतो? दुकान स्वतःच्या जागेत असल्याने भाडे द्यावे लागत नाही. वीज बिलासाठी सुमारे ६,००० रुपये लागतात. दोन मदतनिसांच्या पगारासाठी ४०,००० रुपये बाजूला ठेवल्यास, सर्व खर्च वजा करून मालकाला सुमारे २,३७,५०० रुपये मिळतात. हा फक्त गेल्या महिन्याचा आकडा नाही, तर दरमहा सरासरी २ लाखांपेक्षा जास्त उत्पन्न मिळते, असे दुकानदाराने सांगितल्याचे नलिनीने आपल्या पोस्टमध्ये म्हटले आहे.

अनेकांनी ही पोस्ट पाहिली असून त्यावर कमेंट्स केल्या आहेत. एकाने कमेंट केली, 'आम्ही पहाटे २ वाजेपर्यंत कोडिंगमधील बग्स काढत बसतो, तर दुसरीकडे हे भाऊ फक्त दोन मिनिटांत कपड्यांवरील सुरकुत्या काढून तेवढाच पगार घेतात. सॉफ्टवेअर इंजिनिअरिंगऐवजी स्टीम इंजिनिअरिंग करायला हवं होतं.' तर दुसऱ्या एका युझरने लिहिले, 'उत्पन्न शिक्षणावर नाही, तर तुम्ही देत असलेल्या सेवेच्या बाजार मूल्यावर अवलंबून असते, याचे हे उत्तम उदाहरण आहे.'

ही पोस्ट एक उदाहरण आहे की, केवळ व्हाईट कॉलर नोकरीतूनच नाही, तर कष्ट करण्याची तयारी असेल तर कोणत्याही कामातून चांगले उत्पन्न मिळवता येते.