iPhone 18 Pro Max: बायकोला सरप्राईज देण्यासाठी दिल्लीच्या पठ्ठ्याने विकलं खानदानी सोनं!
सार
बायकोला सरप्राईज देण्यासाठी आपण हा फोन घेतल्याचं या तरुणाने सांगितलं. तसंच, आता आपण ॲपलच्या पहिल्या फोल्डेबल फोनची म्हणजेच 'आयफोन ड्युओ'ची वाट पाहत असल्याचंही तो म्हणाला.
भारतात आयफोन 18 प्रो आणि आयफोन 18 प्रो मॅक्सची विक्री सुरू होताच लोकांमध्ये मोठी क्रेझ पाहायला मिळत आहे. यातच दिल्लीतील एका तरुणाचा व्हिडीओ सध्या सोशल मीडियावर तुफान व्हायरल होत आहे. या पठ्ठ्याने बायकोला आयफोन घेऊन देण्यासाठी चक्क आपल्या पणजी-आजीच्या काळातील खानदानी सोनं विकलं आहे.
प्रसिद्ध उद्योगपती हर्ष गोयंका यांनी हा व्हिडीओ एक्स (ट्विटर) वर शेअर केला आहे. त्यांनी लिहिलंय, 'काही लोक घर घेण्यासाठी सोनं विकतात, तर काही मुलांच्या भविष्यासाठी. पण दिल्लीच्या या माणसाने बायकोला आयफोन 18 प्रो मॅक्स घेऊन देण्यासाठी आपल्या आजी आणि पणजीकडून आलेलं खानदानी सोनं विकलं.' या व्हिडीओमध्ये तो तरुण सांगतोय की, त्याच्याकडे पूर्वजांचं भरपूर सोनं आहे आणि त्यातलं थोडंसं विकून त्याने हा नवीन ॲपल फोन घेतला आहे.
बायकोला सरप्राईज देण्यासाठी आपण हा फोन घेतल्याचं त्याने सांगितलं. तसंच, ॲपलचा पहिला फोल्डेबल फोन 'आयफोन ड्युओ' कधी येतोय, याची आपण आतुरतेने वाट पाहत असल्याचंही त्याने स्पष्ट केलं.
Some people sell gold to buy a house. Some sell it for their children’s future. This Delhi man sold family gold passed down from his grandmother and great-grandmother to buy his wife an iPhone 18 Pro Max.🙈 pic.twitter.com/MVSUEtmfSB
— Harsh Goenka (@hvgoenka) September 18, 2026
हर्ष गोयंका यांच्या या पोस्टवर लोकांच्या भन्नाट प्रतिक्रिया येत आहेत. 'स्वतःचं सोनं आहे, त्याचं काय करायचं हा त्याचा प्रश्न आहे,' असं काहींनी म्हटलंय. तर काहींनी त्याच्यावर जोरदार टीका केली आहे. एका युजरने टोमणा मारत लिहिलंय, 'पुढच्या पिढीलाही असंच करता यावं, यासाठी हा माणूस पुन्हा सोनं कमवेल अशी आशा आहे.' बाजारात आयफोन 18 प्रो ची किंमत 1,64,900 रुपये आहे, तर आयफोन 18 प्रो मॅक्सची किंमत 1,79,900 रुपये इतकी आहे.