Bittu Tabahi: अजनार नदीनंतर आता बंगळूरमध्ये 'बिट्टू तबाही'चा सफाईचा जलवा, १०० लोकांनी दिला साथ (VIDEO)

मध्य प्रदेशातील प्रदूषित अजनार नदी साफ करून देशभरात चर्चेत आलेला बिट्टू तबाही आता आपलं स्वच्छता अभियान बंगळूरमध्ये घेऊन गेला आहे. त्याने १०० लोकांच्या टीमसोबत मिळून कनकपुरा रोडजवळील तुराहल्ली जंगल स्वच्छ केलं.

मध्य प्रदेशातील (Madhya Pradesh) प्रचंड प्रदूषित झालेली अजनार नदी साफ करून सोशल मीडियावर प्रसिद्ध झालेला २० वर्षांचा स्वच्छता प्रचारक बिट्टू तबाही, आता आपलं मिशन कर्नाटकातील (Karnataka) बंगळूरमध्ये (Bengaluru) घेऊन पोहोचला आहे. सुरेंद्र सिंग चौधरी असं खरं नाव असलेल्या बिट्टूने सुमारे १०० लोकांच्या टीमसोबत मिळून बंगळूरपासून २० किमी अंतरावर असलेल्या कनकपुरा रोडजवळील तुराहल्ली जंगलात स्वच्छता मोहीम राबवली.

१०० लोकांनी बिट्टू तबाहीला तुराहल्ली जंगल साफ करण्यासाठी मदत केली

बिट्टूने या स्वच्छता मोहिमेचा एक व्हिडिओ इन्स्टाग्रामवर शेअर केला आहे, ज्यात त्याची टीम कचऱ्याने भरलेल्या भागांमध्ये काम करताना दिसत आहे.

हातमोजे आणि मास्क घालून स्वयंसेवकांनी सर्व कचरा गोळा केला आणि पोत्यांमध्ये भरला. काही सदस्यांनी फावड्यांचा वापर करून जमिनीखाली दबलेला कचराही बाहेर काढला.

जिथे कचरा जमिनीत खोलवर गेला होता, तो भाग साफ करण्यासाठी जेसीबीचीही मदत घेण्यात आली. कचरा गोळा झाल्यावर तो एका रिसायकलिंग ट्रकवर लोड करून जंगलातून बाहेर नेण्यात आला.

बिट्टू म्हणाला की, त्याचं ध्येय फक्त एकच ठिकाण स्वच्छ करण्यापुरतं मर्यादित नाही. सार्वजनिक जागा स्वच्छ ठेवण्याबद्दल जागरूकता पसरवण्यासाठी तो वेगवेगळ्या राज्यांमध्ये फिरत आहे.

व्हिडिओमध्ये बिट्टू म्हणाला, "मी माझ्या स्वच्छता मोहिमेबद्दल जागरूकता पसरवण्यासाठी वेगवेगळ्या राज्यांमध्ये प्रवास करत आहे."

बंगळूरमधील नागरिकांचाही सहभाग

बिट्टूने सांगितलं की, बंगळूरमधील लोकांनी त्याच्या या स्वच्छता मोहिमेला पाठिंबा दिला आणि जंगल साफ करण्यासाठी ते स्वतः सहभागी झाले.

या प्रयत्नांना सोशल मीडियावरही चांगल्या प्रतिक्रिया मिळाल्या. '4cleanindia' या इन्स्टाग्राम अकाऊंटने कमेंट केली, “आपण मिळून हे काम केलं! तुला भेटून खूप आनंद झाला भाई.”

तसेच, 'द इंडियन गॅरेज'नेही तुराहल्ली जंगलातील त्यांच्या ५००K स्वच्छता मोहिमेत सामील झाल्याबद्दल बिट्टूचे आभार मानले. त्याच्या सहभागामुळे हा टप्पा अविस्मरणीय झाल्याचं त्यांनी म्हटलं.

इतर युझर्सनी 'क्लीन इंडिया', 'रिस्पेक्ट ब्रो', 'बंगळूरकडून धन्यवाद' आणि 'बहुत अच्छा काम कर रहे हो भाई' (भाऊ, खूप चांगलं काम करतोयस) अशा कमेंट्स करून त्याच्या कामाचं कौतुक केलं.

अजनार नदीपासून देशव्यापी स्वच्छता मोहिमेपर्यंतचा प्रवास

अजनार नदी स्वच्छ करण्यासाठी अनेक महिने घालवल्यानंतर बिट्टू ऑनलाइन जगतात प्रसिद्ध झाला. त्याने नदीतील प्लास्टिक, टाकलेला कचरा आणि इतर घाण वारंवार काढून नदीचा कायापालट केला आणि त्याचे आधीचे आणि नंतरचे फोटो-व्हिडिओ शेअर केले.

त्याचं हे काम कोणत्याही मोठ्या सरकारी मोहिमेचा किंवा औपचारिक पर्यावरण कार्यक्रमाचा भाग नव्हतं, तर त्याने ते स्वतःच्या हिमतीवर केलं. त्याने यासाठी लागणारे साहित्यही स्वतःच्या पैशांनी खरेदी केलं आणि स्वच्छता पूर्ण होईपर्यंत तो नदीवर परत जात राहिला.

त्याच्या या प्रयत्नांची दखल डच पर्यावरणवादी बोयान स्लॅट यांनी स्थापन केलेल्या 'द ओशन क्लीनअप' या संस्थेने घेतली आणि त्याला नोकरीची ऑफर दिली.

ही ऑफर मिळाल्यानंतर बिट्टूने आणखी एक व्हिडिओ शेअर करून आपल्या प्रवासात पाठिंबा देणाऱ्या लोकांचे आभार मानले. त्याने आपल्या फॉलोअर्सना विचारले की, स्वच्छता मोहीम पुढे चालू ठेवण्यासाठी त्याने पुढच्या कोणत्या राज्यात जावे.