CCTV Video: तोंडाला पदर लावून आल्या, ८ लाखांचे दागिने तोंडात लपवून पसार! बिजनौरमधील घटना कॅमेऱ्यात कैद
सार
बिजनौरच्या बस्ता भागातील एका ज्वेलरी दुकानातून दोन बुरखाधारी महिलांनी सुमारे ८ लाख रुपये किमतीचे ५० ग्रॅम सोन्याचे दागिने चोरल्याचा आरोप आहे. दुकानदारच्या मुलाचे लक्ष विचलित करून या महिलांनी दागिने तोंडात लपवले. ही संपूर्ण घटना दुकानाच्या सीसीटीव्ही कॅमेऱ्यात कैद झाली असून, पोलीस फुटेजच्या आधारे तपास करत आहेत.
बिजनौर: उत्तर प्रदेशच्या बिजनौरमधील बस्ता परिसरात एका ज्वेलरी दुकानातून चोरीची एक धक्कादायक घटना समोर आली आहे. दागिने खरेदी करण्याच्या बहाण्याने आलेल्या दोन बुरखाधारी महिलांनी दुकानातून ५० ग्रॅमपेक्षा जास्त सोन्याचे दागिने लंपास केले आहेत. या चोरी झालेल्या सोन्याची किंमत सुमारे ८ लाख रुपये असल्याचे दुकानदाराने सांगितले. दुकानात लावलेल्या सीसीटीव्ही कॅमेऱ्यातील फुटेजच्या आधारे पोलीस या प्रकरणाचा तपास करत आहेत.
ही घटना बस्ता परिसरातील रसूलपूर नांगला गावात घडली. या गावात रामेश्वर वर्मा यांचा मुलगा दिनेश वर्मा यांचे ज्वेलरीचे दुकान आहे. ते आपल्या मुलासोबत दुकानात बसतात. मिळालेल्या माहितीनुसार, दुपारी ज्यावेळी ही घटना घडली, तेव्हा दिनेश वर्मा काही वेळासाठी दुकानातून बाहेर गेले होते. याचवेळी दोन बुरखाधारी महिला दुकानात आल्या. त्यांनी दुकानातील दागिने पाहण्यास सुरुवात केली आणि सोने-चांदीचे दागिने खरेदी करण्यात रस दाखवला.
या महिला दुकानात बसून काही दागिने ट्राय करू लागल्या. यादरम्यान त्यांनी दुकानदाराच्या मुलाला नाकातली सोन्याची नथ आणि पायातली जोडवी यांसारख्या इतर वस्तू दाखवण्यास सांगितले. आरोप आहे की, दुकानदाराच्या मुलाचं लक्ष विचलित होताच, महिलांनी हुशारीने काही सोन्याचे दागिने तोंडात लपवले. नंतर संधी साधून त्यांनी तोंडातून दागिने काढले आणि आपल्या कपड्यांमध्ये लपवले. काही वेळ या महिला दागिने पाहण्याचे आणि ट्राय करण्याचे नाटक करत राहिल्या. त्यानंतर काहीही खरेदी न करता त्या दुकानातून निघून गेल्या.
चोरीची घटना सीसीटीव्हीमध्ये कैद
या महिलांच्या हालचाली दुकानात लावलेल्या सीसीटीव्ही कॅमेऱ्यात कैद झाल्या. फुटेज पाहिल्यानंतर दुकानदाराला दागिने पाहताना सोनं चोरी झाल्याचा संशय आला. सीसीटीव्ही फुटेज तपासल्यावर या महिला दागिने लपवताना स्पष्ट दिसत होत्या. त्यानंतर दुकानदाराने या घटनेची माहिती पोलिसांना दिली.
पाहा व्हायरल झालेला सीसीटीव्ही व्हिडिओ
बिजनौर जनपद में चोरों और ठगों के हौसले बुलंद हैं, जो लगातार पुलिस को खुली चुनौती दे रहे हैं। ताजा मामला बिजनौर के चांदपुर थाना क्षेत्र का है, जहां एक ज्वेलरी शॉप में बुर्का पहनकर आई दो शातिर महिलाओं ने लाखों रुपये के सोने के आभूषणों पर हाथ साफ कर दिया। चोरी की यह पूरी हैरान कर… pic.twitter.com/b1pjQIEvNU
— Arun (आज़ाद) Chahal 🇮🇳 (@ArunAzadchahal) September 15, 2026
दुकान मालक दिनेश वर्मा यांच्या म्हणण्यानुसार, या घटनेत ५० ग्रॅमपेक्षा जास्त सोन्याचे दागिने चोरीला गेले आहेत. त्यांनी चोरी झालेल्या सोन्याची किंमत अंदाजे ८ लाख रुपये सांगितली आहे. या घटनेमुळे परिसरातील इतर दुकानदारांमध्ये चिंतेचे वातावरण आहे. दुकानदाराच्या तक्रारीवरून पोलिसांनी गुन्हा दाखल करून तपास सुरू केला आहे.