कमरेला दोर बांधून 40 फूट खोल विहिरीत उतरला, चिमुकल्याने वाचवले बकरीच्या पिल्लाचे प्राण!

Bihar Boy Ropes Down 40 Foot Well to Save Baby Goat : बिहारच्या मोतिहारी जिल्ह्यात एक लहान मुलगा स्वतःचा जीव धोक्यात घालून ४० फूट खोल विहिरीत उतरला. त्याने विहिरीत पडलेल्या बकरीच्या पिल्लाला सुखरूप बाहेर काढलं. 

Bihar Boy Ropes Down 40 Foot Well to Save Baby Goat : काही दिवसांपूर्वी एका महिलेने बाल्कनीतून खाली पडलेली आपली साडी परत आणण्यासाठी एका लहान मुलाला इमारतीवरून खाली सोडल्याची घटना घडली होती. या घटनेचा व्हिडिओ व्हायरल झाल्यानंतर त्यावर बरीच चर्चा झाली होती. ही घटना ताजी असतानाच, आता बिहारमध्येही अशीच एक दुसरी घटना समोर आली आहे. इथे एका लहान मुलाला विहिरीत पडलेल्या बकरीच्या पिल्लाला वाचवण्यासाठी खाली उतरवण्यात आलं.

ही घटना आहे बिहारच्या मोतिहारी जिल्ह्यातील पहारपूर गावची. इथे एक बकरीचं पिल्लू खेळता खेळता एका खोल विहिरीत पडलं. गाववाल्यांनी त्याला बाहेर काढण्याचा खूप प्रयत्न केला, पण त्यांना यश आलं नाही. तेव्हा एका लहान मुलाने धाडस दाखवलं. त्याने स्वतः विहिरीत उतरण्याचा निर्णय घेतला. त्याच्या कमरेला दोरखंड बांधून त्याला विहिरीत सोडण्यात आलं. त्याने पाण्यातून बकरीच्या पिल्लाला उचलून घेतलं आणि मग गाववाल्यांनी दोघांनाही सुखरूप वर खेचून काढलं. या मुलाच्या धाडसाचं सोशल मीडियावर खूप कौतुक होत आहे.

झालं असं की, पहारपूर परिसरात एका उघड्या विहिरीजवळ एक बकरीचं पिल्लू खेळत होतं. खेळता खेळता त्याचा तोल गेला आणि ते थेट विहिरीत पडलं. त्याचा ओरडण्याचा आवाज ऐकून आजूबाजूचे लोक विहिरीपाशी जमा झाले. पण विहीर खूप खोल असल्याने खाली उतरण्याची हिंमत कोणीच केली नाही. गाववाल्यांनी आधी काही तात्पुरती उपकरणं आणि दोरीच्या मदतीने पिल्लाला बाहेर काढण्याचा प्रयत्न केला, पण त्यांचे सगळे प्रयत्न फसले. तेव्हा तिथे असलेल्या एका लहान मुलाने स्वतःहून पुढे येऊन त्या पिल्लाला वाचवण्याची तयारी दाखवली.

मग गाववाल्यांनी त्याच्या कमरेला एक मजबूत दोरखंड बांधला. अनेक लोकांनी वरून दोर घट्ट पकडून त्याला हळूहळू त्या अरुंद विहिरीत उतरवलं. त्या मुलानेही न घाबरता खाली जाऊन बकरीच्या पिल्लाला वाचवलं. त्यानंतर गाववाल्यांनी त्याला आणि पिल्लाला हळूवारपणे वर खेचून घेतलं. या चिमुकल्याच्या धाडसी कामगिरीची आता सगळीकडे वाहवा होत आहे.