Bengaluru Traffic : फक्त 6.5 किमीसाठी तब्बल एक तास? बंगळूरमधील तरुणाचा व्हिडिओ व्हायरल

बंगळूरमधील एका व्यक्तीने शेअर केलेला व्हिडिओ सध्या सोशल मीडियावर व्हायरल झाला आहे. या व्हिडिओमध्ये ६.५ किलोमीटरच्या प्रवासाला एक तासापेक्षा जास्त वेळ लागत असल्याचे दिसत आहे. यानंतर शहराच्या वाहतूक कोंडीवर आणि प्रवाशांच्या रोजच्या त्रासावर पुन्हा एकदा चर्चा सुरू झाली आहे.

Bengaluru Traffic : बंगळूरमध्ये राहणाऱ्या प्रत्येकाला तिथल्या ट्रॅफिकचा वैताग चांगलाच माहितीये. काही जण तर याला 'सिलिकॉन ट्रॅफिक' असंही म्हणतात. सोशल मीडियावर तर या रोजच्या त्रासावरचे अनेक पोस्ट्स नेहमीच फिरत असतात. आता पंकज हुरिया नावाच्या बंगळूरमधील एका रहिवाशाने इन्स्टाग्रामवर शेअर केलेला एक व्हिडिओ खूप चर्चेत आला आहे, जो शहरातील प्रवासाची व्यथा अचूकपणे मांडतो.

अवघ्या काही किलोमीटरसाठी एक तासाचा प्रवास

पंकज सकाळी ९:१५ वाजता घरातून निघाला. त्याचं ऑफिस घरापासून फक्त ६.५ किलोमीटर दूर आहे. पण अर्ध्या तासापेक्षा जास्त वेळ रस्त्यावर घालवूनही तो ऑफिसच्या जवळपासही पोहोचला नव्हता. व्हिडिओमध्ये त्याने आपल्या गूगल मॅप्सचा स्क्रीन दाखवला. त्यानुसार, त्याला अजून ४.४ किलोमीटर अंतर कापायचं होतं आणि ऑफिसला पोहोचायला १०:१६ वाजणार होते. याचाच अर्थ, साध्या ६.५ किलोमीटरच्या प्रवासाला त्याला एक तासापेक्षा जास्त वेळ लागणार होता!

नेटकऱ्यांनी दिल्या वेगवेगळ्या प्रतिक्रिया

पंकजने या व्हिडिओला 'हे बंगळूरचं वास्तव आहे' असं कॅप्शन दिलं. अपेक्षेप्रमाणे, हा व्हिडिओ प्रचंड व्हायरल झाला आणि त्यावर लोकांनी वेगवेगळ्या प्रतिक्रिया दिल्या. अनेक युझर्सनी त्याच्या त्रासाबद्दल सहानुभूती व्यक्त केली. एकाने कमेंट केली, 'दिल्लीतही हीच परिस्थिती आहे, एवढ्या अंतरासाठी ४५ मिनिटांपेक्षा जास्त वेळ लागतो'. तर काहींनी त्याला मैत्रीपूर्ण सल्ला दिला, 'तुम्ही कारऐवजी बाईक किंवा स्कूटर वापरली असती तर लवकर पोहोचला असता'.

मात्र, काही लोकांनी पंकजवर टीकाही केली. एका युझरने लिहिलं, 'ही फक्त ट्रॅफिकची समस्या नाही, तर तुमचीही आहे. जर तुम्ही लवकर निघाला असता, तर १५-२० मिनिटांत पोहोचला असता. शहराची प्रतिमा खराब करू नका'.