Dog Attack: बंगळुरूत ५ महिन्यांच्या कुत्र्याच्या पिल्लावर गोळीबार, संताप

बंगळुरूजवळील नेलमंगला येथे एका ५ महिन्यांच्या कुत्र्याच्या पिल्लावर एअर गनने गोळी झाडल्याची भयंकर घटना घडली आहे. या घटनेनंतर आरोपीने दिलेले कारण ऐकून सगळेच थक्क झाले आहेत. नक्की काय घडलंय? वाचा सविस्तर.

बंगळुरू: नेलमंगलाजवळील मादनायकनहळ्ळी (Madanayakanahalli) येथे माणुसकीला काळीमा फासणारी एक घटना उघडकीस आली आहे. पोलिसांनी या प्रकरणी गुन्हा दाखल केला असून तपास सुरू केला आहे.

नेमकं काय घडलं?

गेल्या २० सप्टेंबर रोजी मादनायकनहळ्ळीच्या कण्णा लेआउटमध्ये काही प्राणीमित्र भटक्या कुत्र्यांना खायला घालत होते. त्याचवेळी तिथे राहणारा ६५ वर्षीय एस. कृष्णमूर्ती हातात एअर गन घेऊन उभा होता. कुत्र्यांना पाहताच त्याने आपल्या एअर गनमधून गोळी झाडली. दुर्दैवाने ती गोळी एका ५ महिन्यांच्या पिल्लाला लागली आणि त्याच्या मानेला गंभीर दुखापत झाली.

हे पाहताच सिंधू आणि सहना या प्राणीमित्रांनी तातडीने त्या पिल्लाला एका रिक्षात घातले आणि रुग्णालयात नेऊन त्याच्यावर उपचार सुरू केले. त्यांच्या या प्रसंगावधानामुळे त्या पिल्लाचा जीव वाचला. त्यानंतर त्यांनी आरोपी कृष्णमूर्तीला चांगलाच जाब विचारला आणि मादनायकनहळ्ळी पोलीस ठाण्यात त्याच्याविरोधात तक्रार दाखल केली.

आरोपीने काय कारण दिले?

पोलिसांच्या चौकशीत आरोपी कृष्णमूर्तीने आपल्या कृत्याचं समर्थन करण्याचा प्रयत्न केला. तो म्हणाला, "माझ्या परसबागेत मी कोंबड्या, शेळ्या आणि मेंढ्या पाळल्या आहेत. भटके कुत्रे येऊन त्यांना खाऊन टाकतील अशी मला भीती होती. त्यामुळे त्यांना घाबरवून पळवून लावण्यासाठी मी लांबूनच हवेत गोळी झाडली होती. ती गोळी त्या पिल्लाला लागेल असा माझा अजिबात हेतू नव्हता." असं म्हणत त्याने माफी मागितली.

या घटनेनंतर आता अनेक प्रश्न उपस्थित होत आहेत. अवघ्या पाच महिन्यांच्या पिल्लापासून त्याच्या जनावरांना खरंच धोका होता का? ते पिल्लू शेळ्या किंवा कोंबड्यांची शिकार करू शकलं असतं का? एअर गनचा परवाना मिळाला म्हणजे त्याचा कसाही वापर करायचा का? अशा क्षुल्लक कारणांसाठी मुक्या प्राण्यांवर गोळ्या झाडणं कितपत योग्य आहे? असे संतप्त सवाल प्राणीमित्र विचारत आहेत.

गावे आणि शहरांमध्ये जनावरांचे मालक आणि भटके कुत्रे यांच्यातील वाद नवीन नाहीत. पण केवळ भीतीच्या नावाखाली थेट गोळीबार करण्यापर्यंत माणसाची सहनशीलता संपली आहे, ही अत्यंत चिंतेची बाब आहे. आरोपीने हात जोडून माफी मागितली असली, तरी त्या मुक्या प्राण्याला ज्या वेदना सहन कराव्या लागल्या त्या कमी होणार नाहीत. या गोळीबारामागे आणखी काही कारण होतं का, याचा सखोल तपास व्हायला हवा, अशी मागणी प्राणीमित्रांनी केली आहे. सध्या पोलिसांनी 'प्राणी छळ प्रतिबंधक कायद्या'अंतर्गत (Prevention of Cruelty to Animals Act) गुन्हा दाखल करून पुढील तपास सुरू ठेवला आहे. पिल्लाला क्रूरपणे मारहाण करणाऱ्या या व्यक्तीला कठोर शिक्षा झालीच पाहिजे, अशी आग्रही मागणी आता जोर धरू लागली आहे.