पावभाजीच्या पार्सलमध्ये सापडली 'ओढलेली' बिडी; बंगळूरमधील प्रकाराने खळबळ

बंगळूरमध्ये राहणाऱ्या प्रियं तहाबिल्डर नावाच्या व्यक्तीला धक्कादायक अनुभव आला. त्याने झोमॅटोवरून मागवलेल्या पावभाजीमध्ये एक पूर्ण ओढलेली बिडी सापडल्याचा प्रकार समोर आला आहे.

मुंबई : ऑनलाइन फूड ऑर्डर करताना कधी काय विचित्र अनुभव येईल, याचा काही नेम नाही. बंगळुरूमध्ये राहणाऱ्या एका व्यक्तीसोबत असाच एक धक्कादायक प्रकार घडला आहे. त्याने झोमॅटोवरून मागवलेल्या पावभाजीमध्ये चक्क एक पूर्ण ओढलेली बिडी सापडली.

प्रियं तहाबिल्डर असं या व्यक्तीचं नाव आहे. त्याने झोमॅटोवरुन रात्रीच्या जेवणासाठी पावभाजी ऑर्डर केली होती. पण जेव्हा ऑर्डर आली, तेव्हा त्याला जेवणाच्या प्लेटमध्ये एक वापरलेली बिडी दिसली. हे पाहून त्याला मोठा धक्का बसला.

तहाबिल्डरने या विचित्र प्रकाराचा फोटो लगेच सोशल मीडियावर शेअर केला आणि हा प्रकार व्हायरल झाला. त्याने शेअर केलेल्या फोटोमध्ये, पावभाजीसोबत दिलेल्या चिरलेल्या कांद्यावर एक बिडी ठेवलेली स्पष्ट दिसत आहे. त्याने आपला अनुभव शेअर करताना लिहिलं, “झोमॅटोवरून पावभाजी मागवली आणि सोबत एक बिडी फ्री मिळाली. ती पूर्णपणे ओढलेली होती. खरं सांगायचं तर, मला असं फ्री गिफ्ट नको होतं. झोमॅटो केअर.”

व्हायरल झालेली लिंक्डइन पोस्ट पाहा

ही पोस्ट पाहताच सोशल मीडिया युजर्सनी त्यावर प्रतिक्रिया द्यायला सुरुवात केली. काहींनी रेस्टॉरंटच्या फूड हँडलिंग प्रक्रियेवर प्रश्नचिन्ह उपस्थित केलं, तर काहींनी या परिस्थितीची खिल्ली उडवली.

झोमॅटोने काय उत्तर दिलं?

तहाबिल्डरने नंतर एक अपडेट देत सांगितलं की, या तक्रारीनंतर झोमॅटोच्या कस्टमर सपोर्ट टीमने त्याच्याशी संपर्क साधला. त्याने लिहिलं, “अपडेट: झोमॅटोने माझ्या पुढच्या ऑर्डरसाठी १०० रुपयांचं कूपन देऊ केलं आहे.” या घटनेमुळे रेस्टॉरंटमधून मागवलेल्या जेवणात जर अशी कोणती विचित्र वस्तू सापडली, तर त्याची अंतिम जबाबदारी कोणाची, यावर एक नवीन चर्चा सुरू झाली आहे.

इंटरनेटवर लोकांच्या प्रतिक्रिया

काही युजर्सनी फूड सेफ्टी आणि जबाबदारी यावर लक्ष केंद्रित केलं, तर काही जणांनी या विचित्र परिस्थितीतही विनोद करण्याची संधी सोडली नाही.एका व्यक्तीने गंमतीने म्हटलं, “एक्स्ट्रा स्मोक फ्लेवर टाकला आहे.” तर दुसऱ्याने उपहासाने कमेंट केली, “आजच्या पिढीची हीच समस्या आहे. ते चांगल्या बाजूकडे बघतच नाहीत.”