अहो आश्चर्यम्! दिवाळीत बंगळुरुमधील हवेची गुणवत्ता अनपेक्षितपणे सुधारली, फटाक्यांचा कोणताही परिणाम नाही!

Bangalore Air Quality Improves During Diwali : दिवाळी सणाच्या काळात बंगळूरुमधील वायू प्रदूषण अनपेक्षितपणे कमी झाले आहे. सणाच्या सुट्ट्यांमुळे वाहनांची वर्दळ कमी झाली आणि पावसाच्या प्रभावामुळे एअर क्वालिटी इंडेक्स (AQI) सुधारला आहे.

Bangalore Air Quality Improves During Diwali : दिवाळीत फटाके फोडल्यामुळे वायू प्रदूषण वाढते, हे यावर्षी शहराच्या बाबतीत खोटे ठरले आहे. दिवाळी सणाच्या पहिल्या दिवशी, सोमवारी, शहरातील प्रदूषणाची पातळी सामान्य दिवसांपेक्षा कमी होती. कर्नाटक प्रदूषण नियंत्रण मंडळाने दिलेल्या माहितीनुसार, शहरातील ९ ठिकाणी दि. १३ ऑक्टोबर रोजी सरासरी हवा गुणवत्ता निर्देशांक (AQI) ८९ होता, तर दिवाळीच्या पहिल्या दिवशी, दि. २० ऑक्टोबर रोजी तो ७७ नोंदवला गेला.

शहर रेल्वे स्थानकात दि. १३ रोजी ९८ असलेला AQI दि. २० रोजी १०४ होता. त्याचप्रमाणे, हेब्बाळमध्ये अनुक्रमे ८४ आणि ७४, निम्हान्स परिसरात अनुक्रमे ८८ आणि ४४, सिल्क बोर्ड जंक्शनवर अनुक्रमे ११६ आणि ७३, तर पीण्यामध्ये दि. २० रोजी ९४ AQI नोंदवला गेला. शहरातील एक-दोन भाग वगळता इतर सर्व भागांमध्ये वायू प्रदूषण कमी झाले आहे.

वाहनांचे योगदान:

दिवाळीच्या काळात शहरातील वायू प्रदूषणाची पातळी कमी होण्यामागे वाहनांची कमी वर्दळ हे प्रमुख कारण आहे. सणासाठी बहुतेक लोक आपापल्या गावी गेले आहेत. सुट्टीमुळे वाहनांची संख्या लक्षणीयरीत्या कमी झाली आहे. त्यामुळे प्रदूषण कमी झाले आहे. त्यासोबतच पाऊस पडत असल्यानेही प्रदूषणाची पातळी कमी झाल्याचा अंदाज अधिकाऱ्यांनी व्यक्त केला आहे.

ध्वनी प्रदूषणात थोडी वाढ:

दि. १३ ऑक्टोबरच्या तुलनेत दि. २० ऑक्टोबर रोजी ध्वनी प्रदूषणात थोडी वाढ झाली आहे. ध्वनी प्रदूषण नियंत्रण केंद्रांमध्ये नोंदवलेल्या आकडेवारीनुसार, बसवेश्वर नगरमध्ये दि. १३ रोजी आवाजाची पातळी ७४.७ डेसिबल होती, तर दि. २० रोजी ती ७१.२ डेसिबल होती. डोमलूरमध्ये अनुक्रमे ५३.७ आणि ५७, चर्च स्ट्रीटवर अनुक्रमे ६५.२ आणि ६५.९, आणि यशवंतपूर पोलीस स्टेशनजवळ अनुक्रमे ६२.५ डेसिबल आणि ६९.२ डेसिबल होती.