अयोध्येत ५०० वर्षांनंतर विश्वविक्रमी दीपावली!

अयोध्या : नवीन राममंदिरात रामलल्ला विराजमान झाल्यानंतरची पहिली दीपावली अयोध्येने साजरी केली. रामलल्लाच्या पहिल्या दीपावलीनिमित्त बुधवारी सरयू नदीच्या काठावर एकाच वेळी २५ लाखांहून अधिक दिवे लावून आणि ११२१ जणांनी एकाच वेळी दीपारती करून नवीन गिनीज विक्रम रचला गेला.

५०० वर्षांच्या प्रदीर्घ प्रतीक्षेनंतर अयोध्येत राममंदिराचे स्वप्न साकार झाले असून, राममंदिराचा दीपोत्सव बुधवारी अनेक वैशिष्ट्यांना साक्षीदार होता. उत्तर प्रदेशचे मुख्यमंत्री योगी आदित्यनाथ यांनी आपल्या मंत्रिमंडळ सहकाऱ्यांसह दीपोत्सवाचे उद्घाटन केले. यावेळी रामलल्लासमोर योगींनी दिवा लावला. दीपोत्सवाच्या निमित्ताने पौराणिक पात्रांची भव्य मिरवणूक, तसेच सचित्र मिरवणूकही निघाली.

अयोध्येच्या रस्त्यांवर दिव्यांच्या रोषणाईने चमक होती. संगीत कार्यक्रमांनी दीपावलीची शोभा वाढवली. दीपोत्सवात म्यानमार, नेपाळ, थायलंड, मलेशिया, कंबोडिया, इंडोनेशियातील कलाकारांचे कार्यक्रमही आयोजित करण्यात आले होते.