पंतप्रधान मोदींच्या हस्ते ऑटो एक्स्पोचे उद्घाटन, १००+ नवीन गाड्यांचे लाँचिंग

पंतप्रधान नरेंद्र मोदी यांनी आज भारत मंडपम येथे भारत मोबिलिटी ग्लोबल एक्स्पो-2025 (ऑटो एक्स्पो) च्या दुसऱ्या आवृत्तीचे उद्घाटन केले आहे. यावेळी हा भारत मोबिलिटी ग्लोबल एक्स्पो विशेष ठरत आहे कारण यामध्ये 100 हून अधिक नवीन गाड्या लॉन्च केल्या जाणार आहेत. लोकांना संबोधित करताना नरेंद्र मोदी म्हणाले, “तुम्ही कल्पना करा की जेव्हा भारत जगातील सर्वात मोठ्या तीन अर्थव्यवस्थांमध्ये सामील होईल, तेव्हा भारताचा ऑटो मार्केट कुठे असेल. विकसित भारताची यात्रा मोबिलिटी सेक्टरच्या अभूतपूर्व विस्ताराची यात्रा ठरणार आहे.

"पुढील 5-6 दिवसांत येथे खूप मोठ्या प्रमाणात लोक उपस्थित राहणार आहेत. तसेच, मोठ्या प्रमाणावर नवीन गाड्या लॉन्च केल्या जाणार आहेत, यावरून भारतात मोबिलिटीच्या भविष्याबाबत किती सकारात्मकता आहे हे दिसून येते. भारताची ऑटोमोटिव्ह इंडस्ट्री उत्कृष्ट आहे आणि भविष्यासाठी सज्जही आहे.”

आणखी वाचा- महाकुंभ 2025: 10 देशांच्या प्रतिनिधींनी अनुभवली भारतीय संस्कृती

पंतप्रधान म्हणाले, “एका वर्षात जवळपास अडीच कोटी गाड्या विकल्या जाणे हे दाखवते की भारतामध्ये मागणी कशी सतत वाढत आहे. जेव्हा मोबिलिटीच्या भविष्याबद्दल चर्चा होते, तेव्हा भारताकडे आशेने पाहिले जाते. भारत हा जगातील पाचव्या क्रमांकाची मोठी अर्थव्यवस्था आहे आणि प्रवासी वाहनांच्या बाजारपेठेमध्ये भारत जगात तिसऱ्या क्रमांकावर आहे.”

ते पुढे म्हणाले, “पुढील अनेक दशके भारत जगातील सर्वात तरुण देश राहणार आहे. तरुण पिढी हे देशाचे सर्वात मोठे ग्राहक असतील. त्याचबरोबर, दुसरे सर्वात मोठे ग्राहक मध्यमवर्गीय असतील. गेल्या 10 वर्षांत 25 कोटी भारतीय गरिबीतून बाहेर आले आहेत आणि ते आता स्वतःचे वाहन घेत आहेत. जसजशी प्रगती होईल, तसतसे लोक आपली वाहने अपग्रेड करतील. याचा लाभ ऑटोमोबाईल क्षेत्राला मिळणार आहे.”

भारतातील पहिली इलेक्ट्रिक कार

ऑटो एक्स्पोमध्ये मारुती सुजुकी इंडिया आपली पहिली इलेक्ट्रिक कार Maruti eVitara सादर करणार आहे. त्याचबरोबर हुंडई मोटर इंडिया आपली क्रेटा इलेक्ट्रिक, तर टाटा मोटर्स आपली सिएरा ईव्ही, सफारी ईव्ही आणि हॅरियर ईव्ही देखील सादर करणार आहे. याशिवाय सुजुकी मोटरसायकल, हिरो मोटोकॉर्प, एमजी मोटर, मर्सिडीज बेंझ आणि ओलेक्ट्रा ग्रीन टेक या कंपन्याही आपापल्या नवीन गाड्या लॉन्च करतील.

आणखी वाचा- लाडकी बहीण योजनेचा हप्ता २६ जानेवारीच्या आत दिला जाणार : मंत्री आदिती तटकरे

अलीकडेच मर्सिडीज बेंझने आपली नवीन जी-वैगन सादर केली आहे, तर महिंद्रा अँड महिंद्राने आपल्या दोन नवीन इलेक्ट्रिक गाड्या XEV 9e आणि BE 6 लॉन्च केल्या आहेत. या गाड्यांबाबत तरुणांमध्ये मोठा उत्साह दिसून येत आहे. या सर्व गाड्या ऑटो एक्स्पोमध्ये शोकेस केल्या जाणार आहेत, आणि यासाठी लोकांमध्ये प्रचंड उत्सुकता आहे.