थरार! मुंबई-वाराणसी 'एअर इंडिया' विमानाला बॉम्बने उडवण्याची धमकी; देशातील ५ Major विमानतळांवर हाय अलर्ट!

Air India Express Bomb Threat: मुंबईहून वाराणसीला जाणाऱ्या एअर इंडिया एक्सप्रेसच्या विमानाला बॉम्बची धमकी मिळाल्याने त्याचे वाराणसीत इमर्जन्सी लँडिंग करण्यात आले. या घटनेनंतर देशातील ५ मोठ्या विमानतळांनाही बॉम्बने उडवण्याची धमकी मिळाली. 

नवी दिल्ली: मुंबईहून वाराणसीला येत असलेल्या एअर इंडिया एक्सप्रेसच्या विमानाला हवेतच बॉम्बने उडवण्याची धमकी मिळाली. या धमकीनंतर विमानाचे इमर्जन्सी लँडिंग करण्यात आले आणि त्याला सुरक्षेच्या तपासणीसाठी वेगळे ठेवण्यात आले आहे. सर्व प्रवाशांना सुखरूप बाहेर काढण्यात आले आहे, तर बॉम्बशोधक पथकाकडून शोधमोहीम सुरू आहे. अधिकाऱ्यांनी धमकीच्या स्रोताची चौकशी सुरू केली आहे. लाल बहादूर शास्त्री आंतरराष्ट्रीय विमानतळावर हाय अलर्ट जारी करण्यात आला आहे.

देशातील ५ मोठ्या विमानतळांनाही धमकी

दिल्लीतील कार बॉम्बस्फोटानंतर देशातील ५ विमानतळांना बॉम्बने उडवण्याची धमकी मिळाली आहे. इंडिगो एअरलाइन्सच्या कार्यालयात दुपारी साडेतीन वाजता एक ईमेल आला, ज्यात हैदराबाद, दिल्ली, मुंबई, चेन्नई आणि त्रिवेंद्रम विमानतळ बॉम्बने उडवून देण्याची धमकी देण्यात आली आहे. या धमकीनंतर सर्व सुरक्षा यंत्रणा हाय अलर्टवर आहेत. सर्व शहरांमध्ये आणि विमानतळांवर कसून तपासणी केली जात आहे.

दिल्ली कार बॉम्बस्फोटानंतर दोन दिवसांनीच धमकीचा मेल प्राप्त

तपासानंतर स्पष्ट झाले की हा मेल केवळ भीती आणि अफवा पसरवण्याच्या उद्देशाने पाठवण्यात आला होता. हा धमकीचा ईमेल दिल्लीतील लाल किल्ला मेट्रो स्टेशनजवळ झालेल्या कार स्फोटानंतर अवघ्या दोन दिवसांनी आला आहे, ज्यात 12 जणांचा मृत्यू झाला होता. या हल्ल्यानंतर देशातील विमानतळ, रेल्वे स्थानके आणि प्रमुख धार्मिक स्थळांवरील सुरक्षा अधिक कडक करण्यात आली आहे. विमानतळांच्या आत आणि बाहेर CISF जवानांना उच्च सतर्कतेवर ठेवण्यात आले आहे. तसेच डॉग स्क्वॉड आणि बॉम्ब निष्क्रिय पथके (Bomb Disposal Teams) यांनाही अलर्टवर ठेवण्यात आले आहे.