Harmanpreet Kaur : 'तो रनआऊट खूप वेदनादायी होता', हरमनप्रीतसाठी अभिजीत दिपकेंची भावुक पोस्ट

'तो दिवस मला आजही आठवतोय. तो रनआऊट खरंच खूप वेदनादायी होता. पण मी तुझा एवढा मोठा चाहता का आहे, हे त्याच क्षणी स्पष्ट झालं होतं.'

नवी दिल्ली : भारतीय महिला क्रिकेट संघाच्या कर्णधारपदावरून पायउतार झालेल्या हरमनप्रीत कौरसाठी सामाजिक कार्यकर्ता आणि 'कॉक्रोच जनता पार्टी'चे संस्थापक अभिजीत दिपके यांनी एक भावुक पोस्ट लिहिली आहे. क्रिकेट आणि भारतीय संघावर जीवापाड प्रेम करणाऱ्या, संघाच्या विजयासाठी प्रामाणिकपणे लढणाऱ्या हरमनप्रीतचा मी नेहमीच मोठा चाहता राहिलोय, असं दिपके यांनी म्हटलंय.

२०२५ मध्ये भारताला पहिल्यांदाच महिला वनडे विश्वचषकाचं विजेतेपद मिळवून देणारी हरमनप्रीत हीच ती कर्णधार आहे. याशिवाय, आशियाई क्रीडा स्पर्धेत दोन सुवर्णपदकं, राष्ट्रकुल क्रीडा स्पर्धेत रौप्यपदक आणि असंख्य विजय भारताने हरमनप्रीतच्या नेतृत्वाखाली मिळवले. पण या सगळ्या यशापेक्षा, हरमनच्या करिअरमधल्या एका अत्यंत वेदनादायी क्षणाची आठवण काढत दिपकेंनी आपल्या पोस्टची सुरुवात केली आहे. २०२३ च्या टी-२० विश्वचषकाच्या उपांत्य फेरीत ऑस्ट्रेलियाविरुद्ध खेळताना हरमनप्रीतची बॅट क्रीजमध्ये अडकली आणि ती रनआऊट झाली. त्यानंतर ती रागाने मैदान सोडून गेली होती, तोच हा प्रसंग.

दिपके लिहितात, 'तो दिवस मला आजही आठवतोय. तो रनआऊट खरंच खूप वेदनादायी होता. पण मी तुझा एवढा मोठा चाहता का आहे, हे त्याच क्षणी स्पष्ट झालं होतं. काहींनी तुला अति-भावुक आणि रागीट म्हटलं. पण मला वाटलं की तू या खेळावर किती प्रेम करतेस, हेच त्यातून दिसलं. त्या रागात स्वतःसाठी नाही, तर आपल्या संघासाठी आणि देशासाठी जिंकण्याची तुझी जिद्द आम्हाला दिसली.'

हरमनने कधीही शांत किंवा एकदम 'परफेक्ट' कर्णधार बनण्याचा प्रयत्न केला नाही, असंही दिपकेंनी नमूद केलं. सलग पराभव आणि टीकेनंतर हरमनप्रीतने जेव्हा विश्वचषकाची ट्रॉफी उंचावली, ती माझी क्रिकेटमधली सर्वात आवडती आठवण आहे, असंही ते म्हणाले.

हरमनप्रीतने मिळवलेलं यश हे कोणत्याही ट्रॉफीपेक्षा खूप मोठं आहे, हे स्पष्ट करत दिपके म्हणाले की, तिने एक संघ बांधला आणि त्यांना लढायला शिकवलं. आता ती कर्णधार नसली तरी, जिंकायचं कसं हे माहित असलेला एक संघ तयार करून ती पायउतार होत आहे, आणि हीच एका खऱ्या कर्णधाराची ओळख असते. आता दुसरा कोणीतरी संघाचं नेतृत्व करेल, पण त्या लढवय्या वृत्तीत नेहमीच हरमनचा अंश असेल. 'आठवणींसाठी धन्यवाद,' असं म्हणत दिपकेंनी आपली पोस्ट संपवली.