Yami Gautam : माझ्या फोटोंमध्ये AI चा वापर करू नका, यामी गौतमची मीडियाला विनंती

'आर्टिकल 370' फेम अभिनेत्री यामी गौतमने मीडियाला एक खास विनंती केली आहे. सार्वजनिक कार्यक्रमांमधील तिचे फोटो AI च्या मदतीने एडिट करू नयेत, असं तिने 'X' वर पोस्ट करत म्हटलंय. परवानगीशिवाय फोटो बदलणं चुकीचं असल्याचं तिने स्पष्ट केलं.

मुंबई : सध्या AI ने तयार केलेले आणि एडिट केलेले फोटो खूप व्हायरल होत आहेत. याच पार्श्वभूमीवर अभिनेत्री यामी गौतमने मीडियाला एक महत्त्वाची विनंती केली आहे. सार्वजनिक कार्यक्रमांमध्ये काढलेले तिचे फोटो AI च्या मदतीने बदलू नयेत, असं तिने म्हटलंय. 'आर्टिकल 370' या चित्रपटातील या अभिनेत्रीने 'X' वर एक पोस्ट शेअर केली आहे. यात तिने मीडियाला तिचे फोटो 'अल्टर किंवा एन्हांस' (बदल किंवा आकर्षक) करण्यासाठी AI चा वापर न करण्यास सांगितलं असून, फोटो जसे आहेत तसेच वापरण्याची विनंती केली आहे.

AI ने फोटो एडिट न करण्याची यामी गौतमची विनंती

तिने आपल्या पोस्टमध्ये लिहिलंय, "मीडियाला माझी एक नम्र विनंती आहे. कृपया सार्वजनिक कार्यक्रमांमधील माझे फोटो बदलण्यासाठी किंवा अधिक आकर्षक बनवण्यासाठी AI चा वापर करू नका. कृपया मूळ फोटोच वापरा." ती पुढे म्हणाली, "कोणत्याही व्यक्तीच्या माहितीशिवाय आणि परवानगीशिवाय AI चा वापर करून त्यांचा फोटो किंवा चेहरा बदलणं चुकीचं आहे. माझ्या विनंतीचा मान राखल्याबद्दल आगाऊ धन्यवाद!"

A sincere request to the media Please refrain from using AI to alter or enhance my photographs from public appearances. Kindly use images in original form. Altering or manipulating an individual’s image or likeness using AI should not be done without their knowledge and consent. Thank you in advance for respecting my request! — Yami Gautam Dhar (@yamigautam) October 4, 2026

यामीचं हे वक्तव्य अशा वेळी आलंय, जेव्हा एक दिवस आधीच अभिनेता ज्युनियर एनटीआरने त्याच्या 'देवरा' चित्रपटातील 'चुट्टामल्ले' गाण्याच्या AI-एडिटेड व्हिडिओ क्लिप्सवर नाराजी व्यक्त केली होती. या गाण्यात जान्हवी कपूरही होती. मात्र, यामीने तिच्या पोस्टमध्ये कोणत्याही विशिष्ट घटनेचा उल्लेख केलेला नाही.

यामीचे आगामी प्रोजेक्ट्स

कामाच्या आघाडीवर बोलायचं तर, यामी लवकरच 'नयी नवेली' या चित्रपटात दिसणार आहे. हा चित्रपट दसऱ्याच्या मुहूर्तावर १६ ऑक्टोबरला चित्रपटगृहांमध्ये प्रदर्शित होणार आहे. या चित्रपटात यामी एका नव्या भूमिकेत दिसणार असून, यात कौटुंबिक कथेसोबतच फँटसी, विनोद आणि ॲक्शनचा तडका पाहायला मिळणार आहे.

या चित्रपटात अभिनेत्रीने अवस्थी कुटुंबातील नवीन सून 'मोहिनी'ची भूमिका साकारली आहे. एका नवविवाहित महिलेची तिच्या नवीन घरात रुळण्याची ही कथा हळूहळू वेगळं वळण घेते, जेव्हा तिच्या चारित्र्यावर प्रश्नचिन्ह निर्माण होतात आणि तिच्याभोवतीची रहस्यं उलगडू लागतात.

या चित्रपटात आदिनाथ एम कोठारे, अनुराग ठाकूर, सुनीता राजवार, मीता वशिष्ठ, आदित्य कुलश्रेष्ठ, सुस्मिता मुखर्जी आणि प्रतीक पचौरी यांच्याही महत्त्वाच्या भूमिका आहेत. 'नयी नवेली'चं दिग्दर्शन बालाजी मोहन यांनी केलं असून, हिमांशू शर्मा आणि दिव्य निधी शर्मा यांनी याचं लेखन केलं आहे. आनंद एल राय आणि हिमांशू शर्मा या चित्रपटाचे निर्माते आहेत, तर जी. व्ही. प्रकाश कुमार यांनी याला संगीत दिलं आहे.