Shweta Tiwari: 'मी माझ्या दोन्ही नवऱ्यांना फसवणूक करताना पकडलं होतं'; श्वेताचा मोठा खुलासा

'द ट्रेटर्स सीझन 2' च्या ट्रेलरमध्ये श्वेता तिवारीने एक मोठा गौप्यस्फोट केला आहे. खोटं ओळखण्यात पटाईत असल्याचं सांगताना, तिने होस्ट करण जोहरला सांगितलं की तिने तिच्या दोन्ही पूर्वाश्रमीच्या नवऱ्यांना फसवणूक करताना रंगेहाथ पकडलं होतं. श्वेताचं पहिलं लग्न राजा चौधरी आणि दुसरं अभिनव कोहलीसोबत झालं होतं.

'द ट्रेटर्स'मध्ये श्वेता तिवारीचा वैयक्तिक खुलासा

अभिनेत्री श्वेता तिवारी सध्या 'द ट्रेटर्स सीझन 2' च्या नुकत्याच रिलीज झालेल्या ट्रेलरमुळे चर्चेत आहे. या शोमध्ये तिने एक मोठा वैयक्तिक खुलासा केला आहे. होस्ट करण जोहरसोबत बोलताना, खोटं ओळखण्यात आपण किती हुशार आहोत हे सिद्ध करण्यासाठी तिने तिच्या दोन्ही माजी नवऱ्यांनी फसवणूक केल्याचं सांगितलं.

ट्रेलरमध्ये करण तिला तिची खोटं ओळखण्याची क्षमता तपासताना म्हणतो, "झूठ पकडने में आप माहिर नही हो सकती." यावर श्वेता त्याला सडेतोड उत्तर देते, "अपने पतियों को चीट करते हुए मैंने ही पकडा था."

श्वेता तिवारीने १९९८ मध्ये अभिनेता राजा चौधरीसोबत लग्न केलं होतं, पण २००७ मध्ये ते वेगळे झाले. घटस्फोटानंतर तिने २०१३ मध्ये अभिनेता अभिनव कोहलीसोबत लग्नगाठ बांधली. मात्र, नंतर ते दोघेही विभक्त झाले.

'द ट्रेटर्स सीझन 2' बद्दल खास माहिती

हा शो जैसलमेरमधील भव्य सूर्यगढ पॅलेसमध्ये शूट झाला आहे. 'द ट्रेटर्स सीझन 2' मध्ये एकूण २१ सेलिब्रिटी स्पर्धक विजेतेपदासाठी आणि बक्षिसाच्या रकमेसाठी स्पर्धा करणार आहेत. या सीझनमध्ये 'बू' (Boo) नावाचं एक नवीन रहस्यमयी पात्रही दिसणार आहे, जे 'बुरी खबर' घेऊन येणार असल्याचं सांगितलं जातंय. त्यामुळे या खेळात आणखी एक नवीन ट्विस्ट आला आहे.

स्पर्धकांची यादी

या शोमधील सेलिब्रिटी स्पर्धकांची यादी मोठी आहे. यात आदित्य कुलश्रेष्ठ (कुल्लू), अभिषेक मल्हान (फुकरा इन्सान), अंश चोप्रा, दलीप ताहिल, हरमन सिंघा, इक्का सिंग, करण सिंग मॅजिक, क्रिस्टल डिसूझा, मल्लिका शेरावत, मुनव्वर फारुकी, पारुल गुलाटी, प्रिश, रणवीर ब्रार, रिया चक्रवर्ती, रिदा थराना, साहिल सलाथिया, शहनील गिल, शालिनी पासी, श्वेता तिवारी, साउंडूस मौफकीर आणि तान्या पुरी यांचा समावेश आहे.