"माझी बायको, My Love…", जिनिलियाच्या वाढदिवसाला रितेश देशमुखची हृदयस्पर्शी पोस्ट

जिनिलियाच्या वाढदिवसानिमित्त रितेश देशमुख याने खास पोस्ट शेअर केली आहे. याशिवाय रितेशने काही फोटोही शेअर केले आहेत. 

बॉलीवूडमधील सर्वात गोड आणि आदर्श कपल मानलं जाणारं रितेश देशमुख आणि जिनिलिया देशमुख हे पुन्हा एकदा चर्चेत आले आहेत. यावेळी निमित्त होतं जिनिलियाचा वाढदिवस. आपल्या बायकोच्या ३८व्या वाढदिवसानिमित्त अभिनेता रितेश देशमुखने एक भावनिक आणि रोमँटिक पोस्ट शेअर करत तिला खास शुभेच्छा दिल्या.

"तू माझ्यासाठी सर्वकाही आहेस…"

रितेश आपल्या पोस्टमध्ये लिहितो, “माझी बायको, माय लव्ह… तुला वाढदिवसाच्या खूप खूप शुभेच्छा! आज फक्त तुझा वाढदिवस नाही, तर हा दिवस मला नेहमीच आठवण करून देतो की मी किती भाग्यवान आहे. तू माझ्यासाठी सर्वकाही आहेस – मला आनंदी ठेवणारी, मुलांची काळजी घेणारी, सर्वांचं मन जिंकणारी, माझी मैत्रीण… आणि माझं सगळं जग.”

“तू माझी चिअरलीडर आहेस…”

रितेश पुढे म्हणतो, “तू आमचं संपूर्ण कुटुंब आनंदी ठेवतेस. कितीही थकलेली असलीस, तरी तुझं लक्ष नेहमी इतरांवर असतं. तू माझी चिअरलीडर आहेस – मला नेहमी प्रोत्साहन आणि आधार देणारी. तुझं घरातलं हास्य, प्रेम आणि साथ हीच माझी खरी ताकद आहे.”

“माझं तुझ्यावर खूप प्रेम आहे…”- रितेश

या भावनिक पोस्टमध्ये रितेशने असेही म्हटले की, “तू माझ्या आयुष्यात आहेस यासाठी मी देवाचे आभार मानतो. तू माझी प्रेरणा आहेस. तू मला एक चांगला माणूस बनवलंस. माझं तुझ्यावर खूप प्रेम आहे, बायको... आणि आज मी जे काही लिहिलंय, त्यापेक्षा तू माझ्यासाठी खूप खूप जास्त महत्त्वाची आहेस.”

खास फोटो शेअर करत दिल्या शुभेच्छा

रितेशने या भावनिक पोस्टसोबत जिनिलियासोबतचे १० फोटो शेअर केले आहेत. यात त्यांचा जुना फोटो, शूटिंग सेटवरील क्षण, मुलं रियान व राहीलसोबतचे कौटुंबिक फोटो यांचा समावेश आहे. रितेशच्या या पोस्टवर जिनिलियानेही उत्तर दिलं आहे. तिने लिहिलं,“खूप खूप थँक्यू… तुझ्याशिवाय माझा वाढदिवस कधीच पूर्ण होणार नाही.”

सेलिब्रिटींकडूनही शुभेच्छांचा वर्षाव

या पोस्टवर अनेक बॉलिवूड सेलिब्रिटींनी देखील कमेंट करत जिनिलियाला वाढदिवसाच्या शुभेच्छा दिल्या आहेत. रितेश आणि जिनिलियाची जोडी नेहमीच चाहत्यांच्या मनात खास स्थान निर्माण करत आली आहे, आणि ही पोस्ट त्याच्या प्रेमाची पुन्हा एकदा ग्वाही देते.