Ramayana: रामायणच्या ट्रेलरला अब्ज व्ह्यूज, निर्माता म्हणाला - 'ही तर फक्त सुरुवात!'

'रामायण' सिनेमाचे निर्माते नमित मल्होत्रा यांनी ट्रेलरला मिळालेल्या अब्जावधी व्ह्यूजवर प्रतिक्रिया दिली आहे. ही कथा लोकांपर्यंत पोहोचत असल्याचा आनंद त्यांनी व्यक्त केला. मुंबईत आपल्या नवीन स्टुडिओच्या उद्घाटनावेळी त्यांनी सिनेमाच्या ग्लोबल रिलीजची योजनाही सांगितली.

'रामायण'च्या ट्रेलरच्या यशावर नमित मल्होत्रा यांची प्रतिक्रिया

प्राइम फोकसचे संस्थापक, DNEG चे सीईओ आणि आगामी रणबीर कपूर स्टारर 'रामायण' सिनेमाचे निर्माते नमित मल्होत्रा यांनी या पौराणिक सिनेमाच्या ट्रेलरला मिळालेल्या जबरदस्त प्रतिसादावर आपली प्रतिक्रिया दिली आहे. ANI शी बोलताना नमित मल्होत्रा म्हणाले, "गेल्या आठवड्यात ट्रेलर रिलीज झाला आणि मला वाटतं की पाच दिवसांत त्याला एक अब्जाहून अधिक व्ह्यूज मिळाले आहेत, ही भारतासाठी एक मोठी गोष्ट आहे. जगभरातील लोकांनी दिलेल्या प्रेमाबद्दल मी सर्वांचे आभार मानतो. आता सोनी पिक्चर्ससोबतच्या भागीदारीतून हा सिनेमा जगभरात पोहोचवण्याचं आमचं ध्येय आहे. 'रामायण' हा एक मोठा युनिव्हर्सल सिनेमा म्हणून जागतिक स्तरावर प्रदर्शित होईल, अशी आम्हाला आशा आहे."

या सिनेमाला "प्रत्येकाची गोष्ट" असं संबोधत मल्होत्रा पुढे म्हणाले, "हा एक खूप चांगला क्षण आहे, कारण रामायण ही प्रत्येकाची गोष्ट आहे. मला वाटतं की प्रत्येक भारतीय, जगातील प्रत्येक व्यक्ती या कथेला कोणत्या ना कोणत्या स्वरूपात स्वतःशी जोडू शकतो. त्यामुळे आमच्या कामाला दाद मिळतेय आणि ही कथा लोकांपर्यंत पोहोचतेय, याचं खूप समाधान वाटतंय की आम्ही योग्य मार्गावर आहोत."

मुंबईत प्राइम फोकस स्टुडिओचं उद्घाटन

'रामायण'चे निर्माते मुंबईतील दादासाहेब फाळके चित्रनगरीत त्यांच्या 'प्राइम फोकस स्टुडिओ - फेज १' च्या उद्घाटनावेळी बोलत होते. या कार्यक्रमाला महाराष्ट्राचे मुख्यमंत्री देवेंद्र फडणवीस हेदेखील उपस्थित होते.

🔸मुख्यमंत्री देवेंद्र फडणवीस यांनी मुंबईतील दादासाहेब फाळके चित्रनगरी येथील प्राइम फोकस स्टुडिओच्या फेज १ ची पाहणी केली. @Dev_Fadnavis @ShelarAshish… pic.twitter.com/0675cZB2F9 — CMO Maharashtra (@CMOMaharashtra) August 6, 2026

'महाराष्ट्रासाठी अभिमानाचा क्षण': नमित मल्होत्रा

याबद्दल बोलताना मल्होत्रा यांनी ANI ला सांगितले, "हा महाराष्ट्र आणि मुंबईसाठी खूप अभिमानाचा क्षण आहे, कारण आम्ही आमचं वर्ल्ड हेडक्वार्टर मुंबईत, फिल्म सिटीच्या मध्यभागी सुरू केलं आहे. तसेच, महाराष्ट्राचे मुख्यमंत्री देवेंद्र फडणवीस यांनी स्वतः येऊन या कार्यक्रमाची शोभा वाढवली, ही आमच्यासाठी मोठी गोष्ट आहे."

मुख्यमंत्री फडणवीसांकडून नव्या स्टुडिओचं कौतुक

मुख्यमंत्री फडणवीस यांनीही उद्घाटन सोहळ्यावर आपली प्रतिक्रिया दिली. ते म्हणाले, "महाराष्ट्र असं राज्य आहे जिथे आम्ही सर्वांसाठी सर्व काही करमुक्त ठेवलं आहे. जसं जगात किंवा भारतात कुठेही मुंबईसारखं दुसरं शहर बनू शकत नाही, तसंच मुंबईसारखं दुसरं फिल्म सिटीही कुठे बनू शकत नाही. या फिल्म सिटीमध्ये आम्ही अनेक आधुनिक स्टुडिओ उभारत आहोत. असे प्रकल्प थांबायला नकोत."

या कार्यक्रमाचे फोटो महाराष्ट्र CMO च्या सोशल मीडिया हँडलवरही शेअर करण्यात आले आहेत.

🔸मुख्यमंत्री देवेंद्र फडणवीस यांच्या हस्ते मुंबईतील दादासाहेब फाळके चित्रनगरी येथे 'प्राइम फोकस स्टुडिओ - फेज १' चे उद्घाटन. मंत्री ॲड. आशिष शेलार, DNEG चे ग्लोबल सीईओ आणि प्राइम फोकस लिमिटेडचे संस्थापक नमित मल्होत्रा व इतर मान्यवर उपस्थित होते. pic.twitter.com/53yqkVz0Wy — CMO Maharashtra (@CMOMaharashtra) August 6, 2026

'रामायण' ट्रेलरमधील डिटेल्स आणि रिलीजची तारीख

दरम्यान, 'रामायण'चा ट्रेलर नुकताच रिलीज झाला असून त्याची सुरुवात रावणाच्या भूमिकेतील यशच्या परिचयाने होते. तो अंधारातून बाहेर येऊन आपल्या भव्य महालात प्रवेश करतो आणि तिन्ही लोकांवर आपलं राज्य असल्याचं घोषित करतो. जसा अंधार पसरतो, तसा पृथ्वीवर प्रभू विष्णू राजकुमार रामाच्या रूपात पुनर्जन्म घेतात. प्रभू श्रीरामाच्या भूमिकेत रणबीर कपूर दिसतो, तर अरुण गोविल यांनी राजा दशरथाची भूमिका साकारली आहे, जे अयोध्येच्या लोकांना रामाची ओळख करून देतात.

'रामायण: पार्ट १' दिवाळी २०२६ मध्ये चित्रपटगृहात प्रदर्शित होणार आहे, तर 'रामायण: पार्ट २' दिवाळी २०२७ मध्ये येण्याची शक्यता आहे. (ANI)