55 लाखांचे सोने परत करणाऱ्या सफाई कर्मचाऱ्याचा रजनीकांतकडून सन्मान, भेट दिला सोन्याचा हार!

Rajinikanth Felicitates Sanitation Worker For Returning 55 Lakh Gold : रस्त्यावर झाडू मारताना सापडलेले सुमारे ५५ लाख रुपये किमतीचे ३६० ग्रॅम सोने त्याच्या मालकाला परत करणाऱ्या कर्मचारी पद्मा यांना अभिनेते रजनीकांत यांनी घरी बोलावून सन्मानित केले.

Rajinikanth Felicitates Sanitation Worker For Returning 55 Lakh Gold : रस्त्यावर झाडू मारताना सापडलेले सुमारे ५५ लाख रुपये किमतीचे ३६० ग्रॅम सोने त्याच्या मालकाला परत करणाऱ्या चेन्नई महानगरपालिकेच्या सफाई कर्मचारी पद्मा यांना अभिनेते रजनीकांत यांनी घरी बोलावून सन्मानित केले आहे. रजनीकांत यांनी पद्मा यांना 'ओम' नावाचे पदक, १६ ग्रॅमचा सोन्याचा हार आणि शाल देऊन सन्मानित केले. याच कारणामुळे अलीकडेच मुख्यमंत्री स्टॅलिन यांनीही पद्मा यांना ₹1 लाख रुपये देऊन गौरवले होते.

एसआयआर चौकशी: मुख्यमंत्री ममता आज सुप्रीम कोर्टात हजर राहणार?

नवी दिल्ली: पश्चिम बंगालमध्ये निवडणूक आयोगाने केलेल्या विशेष मतदार यादी पुनरीक्षण (एसआयआर) विरोधात सर्वोच्च न्यायालयात गेलेल्या मुख्यमंत्री आणि टीएमसी नेत्या ममता बॅनर्जी बुधवारी सुनावणीसाठी स्वतः हजर राहण्याची शक्यता आहे. बंगालमधील मतदार यादी पुनरीक्षणाला आव्हान देत ममता यांनी २८ जानेवारी रोजी सर्वोच्च न्यायालयात धाव घेतली होती. सुरुवातीला ६ फेब्रुवारी रोजी सुनावणीची तारीख निश्चित करण्यात आली होती. मात्र, आता वेळापत्रकात बदल होऊन ४ फेब्रुवारी रोजी सुनावणी होण्याची शक्यता आहे. सोमवारीच दीदी एका शिष्टमंडळासह भारताचे मुख्य निवडणूक आयुक्त ज्ञानेश कुमार यांना भेटायला गेल्या होत्या. यावेळी ज्ञानेश यांनी आपला अपमान केला असून ते अहंकारी असल्याचे म्हणत त्या बैठकीतून बाहेर पडल्या होत्या.

सीईसींविरोधात महाभियोग आणण्याचा विचार, मित्रपक्षांशी चर्चा: टीएमसी

कोलकाता: मतदार यादी पुनरीक्षणाविरोधात लढा देणाऱ्या पश्चिम बंगालमधील सत्ताधारी टीएमसीने मुख्य निवडणूक आयुक्त (सीईसी) ज्ञानेश कुमार यांच्यावर महाभियोग आणण्याचा विचार सुरू केला आहे. याबाबत इतर मित्रपक्षांशी चर्चा सुरू असल्याचे पक्षाच्या सूत्रांनी मंगळवारी सांगितले. दिल्लीत सीईसींसोबतची बैठक सोडून मुख्यमंत्री ममता बॅनर्जी बाहेर पडल्यानंतर दुसऱ्याच दिवशी ही महत्त्वाची घडामोड घडली आहे. याबाबत माहिती देताना टीएमसी खासदार कल्याण बॅनर्जी म्हणाले, 'मुख्य निवडणूक आयुक्त ज्या पद्धतीने मतदार यादी पुनरीक्षण करत आहेत ते चुकीचे आहे आणि त्याचा देशातील प्रत्येक नागरिकाच्या मतदानाच्या हक्कावर परिणाम होत आहे. त्यामुळे आम्ही त्यांच्यावर महाभियोग चालवण्याचा विचार करत आहोत.'

सरकारच्या परवानगीअभावी जनरल नरवणेंच्या पुस्तकाचे प्रकाशन नाही

नवी दिल्ली: संसदेत मोठ्या गदारोळाला कारणीभूत ठरलेले निवृत्त लष्करप्रमुख एम. एम. नरवणे यांच्या पुस्तकाला संरक्षण मंत्रालयाने परवानगी न दिल्याने ते अद्याप प्रसिद्ध झालेले नाही, असे म्हटले जात आहे. 'फोर स्टार्स ऑफ डेस्टिनी' हे पुस्तक २०२४ मध्येच प्रसिद्ध होणार होते. मात्र, लष्करातील वरिष्ठ अधिकाऱ्यांच्या पुस्तकांच्या प्रकाशनापूर्वी सरकारची पूर्वपरवानगी घेणे बंधनकारक आहे. पुस्तकात काही वादग्रस्त मुद्दे असल्याने सरकारने अद्याप प्रकाशनास परवानगी दिलेली नाही, असे म्हटले जात आहे. याच पुस्तकातील काही अंश सोमवारी राहुल गांधी यांनी लोकसभेत मांडल्यावर मोठा गदारोळ झाला होता.