Peddi Collection: जान्हवीच्या सीनमुळे वाद, तिसऱ्या दिवशी 'पेद्दी'ने किती गल्ला जमवला?

राम चरणच्या 'पेद्दी' सिनेमानं तिसऱ्या दिवशी बॉक्स ऑफिसवर कमाईत वाढ केली का? जान्हवी कपूरच्या वादग्रस्त सीन्समुळे सिनेमाच्या कमाईवर परिणाम झालाय का? दिग्दर्शकाने माफी मागितल्यानंतर आता काय बदल होणार? आणि विकेंडला हा सिनेमा २०० कोटींचा टप्पा पार करेल का? चला जाणून घेऊया.

राम चरण आणि जान्हवी कपूरच्या 'पेद्दी' सिनेमानं रिलीज होताच बॉक्स ऑफिसवर धमाकेदार सुरुवात केली होती. पण पहिल्या दिवसाच्या तुफान कमाईनंतर शुक्रवार आणि शनिवारी सिनेमाचा वेग थोडा कमी झाला. तरीही, तिसऱ्या दिवशी म्हणजे शनिवारी सिनेमानं शुक्रवारच्या तुलनेत कमाईत थोडी वाढ नक्कीच केली आहे. प्रेक्षकांकडून सिनेमाला संमिश्र प्रतिसाद मिळत आहे, तर दुसरीकडे सोशल मीडियावर सिनेमावरून जोरदार चर्चा सुरू आहे. विशेषतः जान्हवी कपूरच्या भूमिकेवरून आणि काही सीन्सवरून झालेल्या वादामुळे हा सिनेमा सध्या चर्चेत आहे.

'पेद्दी'ने तिसऱ्या दिवशी किती कमाई केली?

ट्रेड ट्रॅकिंग वेबसाईट sacnilk.com च्या रिपोर्टनुसार, 'पेद्दी'ने तिसऱ्या दिवशी म्हणजे शनिवारी जवळपास २८.८५ कोटी रुपयांची कमाई केली आहे. शुक्रवारच्या तुलनेत सिनेमाच्या कमाईत ७.२ टक्क्यांची वाढ झाली आहे. सिनेमानं शुक्रवारी २६.९० कोटी रुपयांचा व्यवसाय केला होता. तीन दिवसांनंतर या सिनेमाचं भारतातील नेट कलेक्शन १०० कोटींचा आकडा पार करत १२५.२५ कोटी रुपयांवर पोहोचलं आहे.

'पेद्दी'चं दिवसानुसार कलेक्शन असं आहे :-

• पेड प्रिव्ह्यू (३ जून, बुधवार) : १८.५० कोटी रुपये
• पहिला दिवस (४ जून, गुरुवार) : ५१ कोटी रुपये
• दुसरा दिवस (५ जून, शुक्रवार) : २६.९० कोटी रुपये
• तिसरा दिवस (६ जून, शनिवार) : २८.८५ कोटी रुपये

एकूण कलेक्शन : १२५.२५ कोटी रुपये

'पेद्दी'चं वर्ल्डवाईड कलेक्शन किती झालं?

'पेद्दी'च्या वर्ल्डवाईड कलेक्शनबद्दल बोलायचं झालं तर, सिनेमानं आतापर्यंत १९१.०७ कोटी रुपयांची ग्रॉस कमाई केली आहे. यामध्ये परदेशातून सिनेमानं ४२ कोटी रुपयांचं ग्रॉस कलेक्शन केलं आहे, तर भारतातून ग्रॉस कमाई १४۹.०७ कोटी रुपये झाली आहे. रविवारच्या कलेक्शननंतर 'पेद्दी' वर्ल्डवाईड बॉक्स ऑफिसवर २०० कोटी रुपयांचा आकडा सहज पार करेल असा अंदाज आहे.

'पेद्दी'ची कथा: खेळातून ओळख निर्माण करण्याची लढाई

सिनेमाची कथा राम चरणच्या 'पेद्दी' या पात्रावर आधारित आहे, जो खेळाच्या माध्यमातून आपली ओळख निर्माण करण्याचा प्रयत्न करतो. तो क्रिकेट, कुस्ती आणि धावण्याच्या शर्यतीत स्वतःला सिद्ध करण्यासाठी संघर्ष करतो. सिनेमातील इमोशनल आणि स्पोर्ट्स अँगलचं कौतुक होत आहे.

'पेद्दी'मधील जान्हवी कपूरची भूमिका वादाच्या भोवऱ्यात

या सिनेमात जान्हवी कपूरच्या 'अचियम्मा' नावाच्या भूमिकेवरून सोशल मीडियावर अनेक प्रश्न उपस्थित केले जात आहेत. तिच्या भूमिकेच्या चित्रणावर आणि काही दृश्यांवर काही प्रेक्षकांनी आक्षेप घेतला आहे, ज्यामुळे सिनेमा मोठ्या वादात सापडला आहे. या विषयामुळे ऑनलाइन डिबेटला आणखी जोर आला आहे. दरम्यान, दिग्दर्शक बुच्ची बाबू सना यांनी एक सार्वजनिक निवेदन जारी करून कोणालाही अस्वस्थ करण्याचा आपला हेतू नव्हता असं म्हटलं आहे. कोणत्याही दृश्यामुळे प्रेक्षकांना त्रास झाला असेल तर आम्ही माफी मागतो आणि टीमने त्यात बदल करण्याचा निर्णय घेतला आहे, असंही त्यांनी स्पष्ट केलं.