
पाकिस्तानी टीव्ही मालिकांचा भारतात नेहमीच एक चाहतावर्ग राहिला आहे, पण आता एका नव्या कार्यक्रमाने जेन झेड (Gen Z) प्रेक्षकांमध्ये प्रचंड उत्सुकता निर्माण केली आहे. १ ऑगस्ट २०२६ रोजी सुरू झालेल्या 'दर-ए-निजात' या मालिकेने सीमेपलीकडे जाऊन भारतात आपला मोठा चाहतावर्ग निर्माण केला आहे. यातील अबू बकर आणि झर्याब यांसारख्या पात्रांनी सोशल मीडिया प्लॅटफॉर्मवर चांगलीच लोकप्रियता मिळवली आहे.
इन्स्टाग्राम रील्सपासून ते फॅन फोरमपर्यंत, या मालिकेचे व्हिडिओ भारतीय प्रेक्षकांच्या सोशल मीडिया फीडवर वेगाने व्हायरल होत आहेत. पण हा पाकिस्तानी कार्यक्रम भारतीय तरुणांना इतका का आवडतोय? याचं मुख्य कारण म्हणजे मालिकेत नाती, आदर आणि मानवी मूल्यांचं केलेलं उत्कृष्ट सादरीकरण.
'दर-ए-निजात'मधल्या सर्वात चर्चेत असलेल्या पात्रांपैकी एक म्हणजे अबू बकर. भारतीय जेन झेड चाहते त्याला 'ग्रीन फ्लॅग' जोडीदार (आदर्श जोडीदार) म्हणत आहेत.
नवी दिल्लीतील समाजशास्त्राचा विद्यार्थी अरहानने इंडिपेंडंट उर्दूशी बोलताना सांगितलं की, त्याला या पात्राचा गोड, दयाळू आणि काळजी घेणारा स्वभाव खूप आवडला. अबू बकर हा एक समर्पित जोडीदार आहे, जो स्त्रियांचा अपमान किंवा छळ करत नाही, असं तो म्हणाला.
यासोबतच अरहानने अबू बकर आणि नायिकेच्या एक्स-बॉयफ्रेंडमधील फरकही स्पष्ट केला. नायिकेच्या एक्स-बॉयफ्रेंडचा दृष्टिकोन अत्यंत विषारी आणि नकारात्मक होता, असं त्याचं मत होतं.
इतरांवर कठोर नियम लादण्यासाठी धर्माचा वापर करण्याऐवजी, अबू बकरने स्वतःच्या धर्माचं केलेलं नैसर्गिक पालन अरहानला अधिक भावलं.
अनेक तरुण प्रेक्षकांना त्यांच्या नात्यात जे गुण पाहायला आवडतात, तेच गुण अबू बकरमध्ये दिसतात. यामध्ये संयम, भावनिक परिपक्वता, परस्पर आदर आणि दयाळूपणा यांचा समावेश आहे.
गुलदस्ता नावाच्या एका प्रेक्षकाने सांगितलं की, तिने हे पात्र इन्स्टाग्राम रील्सवर पाहिलं आणि तिला तो खरोखरच 'ग्रीन फ्लॅग' वाटतो.
ती पुढे म्हणाली की, हे पात्र केवळ एका आदर्श पुरुषाचं प्रतिनिधित्व करत नाही. तिच्या मते, ही मालिका महिलांचा आदर करणं, संयम बाळगणं आणि इतरांशी सन्मानाने वागणं यांसारख्या महत्त्वाच्या मानवी मूल्यांवर भर देते.
या मालिकेचा नीतिमत्ता आणि माणुसकीचा संदेश कोणत्याही धार्मिक सीमांपलीकडचा असल्याने, तिचे अनेक हिंदू मित्रही हा शो पाहत असल्याचं तिने आवर्जून सांगितलं.
या मालिकेचं यश केवळ भारतीय प्रेक्षकांपुरतं मर्यादित नाही. एका लेखानुसार, बांगलादेश, दुबई आणि मालदीवमधील प्रेक्षकांनीही या मालिकेला पसंती दर्शवली आहे.
झायेद या आणखी एका तरुण प्रेक्षकाने भारत आणि पाकिस्तानच्या टीव्ही मालिकांमधला फरक सांगितला. भारतीय मालिका अनेकदा कौटुंबिक वादांवर केंद्रित असतात, तर पाकिस्तानी मालिका वेगळ्या कथांवर आधारित असतात, असं तो म्हणाला.
उमेरा अहमद लिखित आणि साकिब खान दिग्दर्शित 'दर-ए-निजात' ही अलीकडच्या काळातील आंतरराष्ट्रीय स्तरावर दखल घेतली गेलेली नवी पाकिस्तानी मालिका आहे.
'हमसफर', 'जिंदगी गुलजार है' आणि 'मेरे पास तुम हो' यांसारख्या मालिकांच्या यशानंतर, या नव्या शोची वाढती लोकप्रियता हे दाखवून देते की, उत्तम कथा आणि मनाला भिडणारी पात्रं सीमेपलीकडे जाऊन प्रेक्षकांची मनं जिंकू शकतात.