Asha Bhosle: आशा भोसलेंना श्रद्धांजली देणं पाकिस्तानी चॅनलला पडलं महागात!
सार
Islamabad : पाकिस्तानी चॅनल 'जिओ न्यूज'ने आशा भोसले यांच्या निधनानंतर त्यांची गाणी दाखवून श्रद्धांजली वाहिली. पण यामुळे चॅनल अडचणीत आलं आहे. PEMRA ने त्यांना नोटीस पाठवली असून, भारतीय कंटेंटवरील 2018 च्या बंदीचं हे उल्लंघन असल्याचं म्हटलं आहे. तर, कलेला सीमा नसतात, असं म्हणत चॅनलने आपली बाजू मांडली आहे.
Islamabad : पाकिस्तानमधील एक मोठं न्यूज चॅनल 'जिओ न्यूज' सध्या अडचणीत आलं आहे. या चॅनलने भारताच्या दिग्गज गायिका आशा भोसले यांच्या निधनाची बातमी देताना त्यांची गाणी आणि सिनेमातील काही सीन्स दाखवले होते. यानंतर पाकिस्तानच्या इलेक्ट्रॉनिक मीडिया रेग्युलेटरी अथॉरिटीने (PEMRA) चॅनलला कारणे दाखवा नोटीस पाठवली आहे. भारतीय कंटेंटवर 2018 पासून असलेल्या बंदीचं चॅनलने उल्लंघन केलं आहे, असा आरोप अथॉरिटीने केला आहे.
रिपोर्टनुसार, १२ एप्रिल रोजी वयाच्या ९२ व्या वर्षी आशा भोसले यांचं निधन झालं. 'जिओ न्यूज'ने त्यांना श्रद्धांजली देण्यासाठी एका रिपोर्टमध्ये त्यांची प्रसिद्ध गाणी दाखवली. रेग्युलेटरी अथॉरिटीने याला पाकिस्तान सुप्रीम कोर्टाच्या आदेशाचा अपमान मानलं आहे. चॅनलवर मोठा दंड, प्रक्षेपणावर बंदी किंवा लायसन्स रद्द करण्याची कारवाई होऊ शकते, असा इशाराही अथॉरिटीने दिला आहे. चॅनलच्या CEO ना २७ एप्रिल रोजी हजर राहण्यास सांगण्यात आलं आहे.
पण 'जिओ न्यूज'चे मॅनेजिंग डायरेक्टर अझहर अब्बास यांनी या कारवाईवर जोरदार टीका केली आहे. 'जेव्हा एखाद्या महान कलाकाराचं निधन होतं, तेव्हा त्यांचं काम आठवणं आणि दाखवणं हे पत्रकारितेचं कर्तव्य आहे,' असं ते म्हणाले. त्यांनी सोशल मीडिया प्लॅटफॉर्म X वर लिहिलं की, 'कला, ज्ञान आणि माणुसकी हा सर्वांचा सामायिक वारसा आहे, त्याला सीमेच्या बंधनात अडकवता येत नाही.' अब्बास यांनी आशा भोसले यांचं पाकिस्तानबद्दलचं प्रेम आणि नुसरत फतेह अली खान यांच्यासारख्या कलाकारांसोबत केलेल्या कामाची आठवणही करून दिली.
पाकिस्तान पीपल्स पार्टीच्या सिनेटर शेरी रहमान यांच्यासह अनेक नेत्यांनीही रेग्युलेटरी अथॉरिटीच्या या निर्णयावर टीका केली आहे. दुसरीकडे, मुंबईतील शिवाजी पार्कवर पूर्ण शासकीय इतमामात आशा भोसले यांच्यावर अंत्यसंस्कार करण्यात आले. आमीर खानसह बॉलिवूडचे अनेक कलाकार आणि हजारो चाहते आपल्या लाडक्या गायिकेला अखेरचा निरोप देण्यासाठी जमले होते.