Asha Bhosle: 'वाईट आवाज' म्हणून स्टुडिओतून हकललं, एकेकाळी आयुष्य संपवण्याचा विचारही मनात आलेला!

९२ वर्षांच्या आशा भोसले यांनी १२,००० हून अधिक गाणी गायली. पण एकेकाळी 'खराब आवाज' म्हणून त्यांना स्टुडिओतून बाहेर काढण्यात आलं होतं. त्यांनी हार मानली नाही आणि गिनीज वर्ल्ड रेकॉर्डपर्यंत मजल मारली. कौटुंबिक आणि वैयक्तिक आयुष्यात त्यांना प्रचंड संघर्ष करावा लागला.

Asha Bhosle Untold Story: ज्येष्ठ गायिका आशा भोसले यांना हृदयविकाराचा झटका आल्यानंतर मुंबईच्या ब्रीच कँडी हॉस्पिटलमधील आयसीयूमध्ये दाखल करण्यात आलं आहे. जगभरातील चाहते त्या लवकर बऱ्या व्हाव्यात यासाठी प्रार्थना करत आहेत. मात्र, त्यांच्या कुटुंबीयांकडून अद्याप कोणतीही अधिकृत माहिती समोर आलेली नाही. वयाच्या ९२ व्या वर्षीही आपल्या आवाजाने जादू करणाऱ्या आशाताईंचं आयुष्य एखाद्या सिनेमाच्या कथेपेक्षा कमी नाही. आज त्यांच्याकडे प्रसिद्धी आणि पैसा आहे, पण एक वेळ अशी होती जेव्हा त्यांना आपलं आयुष्य संपवायचं होतं. वाचा त्यांच्या आयुष्यातील काही न ऐकलेले किस्से...

वयाच्या १६ व्या वर्षी बंडखोरी आणि लतादीदींशी नात्यात दुरावा

आशाताईंचा जन्म ८ सप्टेंबर १९३३ रोजी महाराष्ट्रातील सांगलीत झाला. संगीताचा हा प्रवास त्यांच्यासाठी लहानपणापासूनच आव्हानात्मक होता. वयाच्या अवघ्या ९ व्या वर्षी वडिलांचं छत्र हरपलं, त्यामुळे कुटुंबाचा सांभाळ करण्यासाठी त्यांनी लहान वयातच गाण्यास सुरुवात केली. त्यांच्या आयुष्यात खरं वादळ तेव्हा आलं, जेव्हा वयाच्या १६ व्या वर्षी त्यांनी कुटुंबाच्या विरोधात जाऊन लता मंगेशकर यांचे सेक्रेटरी गणपतराव भोसले यांच्याशी पळून जाऊन लग्न केलं. या निर्णयामुळे लतादीदी इतक्या संतापल्या की त्यांनी आपल्या सख्ख्या बहिणीशी संबंधच तोडून टाकले. लग्नानंतर आशाताईंना घरगुती हिंसाचाराचा सामना करावा लागला आणि त्या इतक्या खचल्या की त्यांच्या मनात आत्महत्येचे विचार येऊ लागले होते.

जेव्हा 'खराब आवाज' म्हणून स्टुडिओतून बाहेर काढलं

आज ज्यांच्या आवाजाची दुनिया वेडी आहे, त्यांना सुरुवातीच्या काळात मोठा नकार पचवावा लागला होता. १९४७ सालचा एक किस्सा आहे, जेव्हा त्यांना किशोर कुमार यांच्यासोबत एक गाणं रेकॉर्ड करायचं होतं. तेव्हा संगीत दिग्दर्शक खेमचंद प्रकाश यांनी त्यांचा आवाज 'बेकार' असल्याचं सांगून त्यांना स्टुडिओतून बाहेरचा रस्ता दाखवला होता. पण आशाताईंनी हार मानली नाही आणि १४ भाषांमध्ये १२,००० हून अधिक गाणी गाऊन इतिहास रचला.

आर. डी. बर्मन यांच्याशी लग्न, पण आईनेच केला विरोध

आशाताईंची दुसरी प्रेमकहाणीही सोपी नव्हती. त्या संगीतकार आर. डी. बर्मन (पंचम दा) यांच्या प्रेमात पडल्या. जेव्हा पंचम दा यांनी आपल्या आईला याबद्दल सांगितलं, तेव्हा त्यांनी स्पष्टपणे सांगितलं की, 'हे लग्न माझ्या मृत्यूनंतरच होईल.' या विरोधाचं कारण म्हणजे आशाताई, आर. डी. बर्मन यांच्यापेक्षा ६ वर्षांनी मोठ्या होत्या आणि तीन मुलांची आई होत्या. अखेर, १९८० मध्ये दोघांनी लग्न केलं आणि या जोडीने संगीत विश्वाला अनेक अविस्मरणीय गाणी दिली.

आशाताईंच्या हातच्या जेवणाचे चाहते

आशाताई फक्त उत्तम गातातच असं नाही, तर त्या एक उत्कृष्ट सुगरणसुद्धा आहेत. त्या स्वतः म्हणतात की, 'जर मी गायिका नसते, तर आज एक कुक असते.' दुबईपासून कुवेत आणि अबुधाबीपर्यंत त्यांची 'Asha's' नावाची रेस्टॉरंट्स आहेत. दिवंगत अभिनेते ऋषी कपूर यांना त्यांच्या हातचं 'कढाई गोश्त' आणि 'शामी कबाब' खूप आवडायचं. वयाच्या ९२ व्या वर्षीही आशाताई आपल्या मुलांसाठी स्वतः जेवण बनवतात.

आशाताईंच्या आयुष्यातील महत्त्वाचे टप्पे

१९४३: वयाच्या १० व्या वर्षी पहिलं मराठी गाणं गायलं.

१९४८: 'चुनरिया' सिनेमातून हिंदी चित्रपटसृष्टीत पदार्पण केलं.

१९९७: ग्रॅमी अवॉर्डसाठी नामांकन मिळवणाऱ्या पहिल्या भारतीय महिला ठरल्या.

२०००-२००८: दादासाहेब फाळके आणि पद्मविभूषण यांसारख्या मोठ्या पुरस्कारांनी सन्मानित.

२०११: सर्वाधिक गाणी रेकॉर्ड केल्याबद्दल 'गिनीज बुक ऑफ वर्ल्ड रेकॉर्ड'मध्ये नावाची नोंद झाली.