Madhuri Dixit : स्टारडम सोडून नवऱ्यासाठी सामान्य गृहिणी बनलेली एव्हरग्रीन हिरोईन.. अमेरिकेतले तिचे सिक्रेट्स!

बॉलिवूडची धकधक गर्ल माधुरी दीक्षितने करिअरच्या शिखरावर असताना लग्न केलं आणि ती एक सामान्य गृहिणी बनली. अमेरिकेत तिने कसं आयुष्य जगलं आणि तिथल्या काही खास गोष्टींबद्दल आज आपण जाणून घेणार आहोत.

हिरोईन म्हणून टॉपला असताना माधुरीने केलं लग्न

माधुरी दीक्षित हे नाव ऐकलं की तिचं सौंदर्य, उत्तम अभिनय आणि डान्स डोळ्यांसमोर येतो. 'साजन', 'हम आपके है कौन', 'दिल', 'राम लखन' सारखे सुपरहिट सिनेमे तिने दिले. पण करिअरच्या शिखरावर असताना तिने अचानक लग्न केलं आणि सगळ्यांनाच धक्का दिला. लग्नानंतर माधुरी नवरा डॉ. श्रीराम नेने यांच्यासोबत अमेरिकेत सेटल झाली. स्टारडम बाजूला ठेवून तिने एका सामान्य गृहिणीसारखं आयुष्य सुरू केलं. ती रोज सकाळी लवकर उठून नवऱ्यासाठी स्वतः नाश्ता बनवायची. माधुरीच्या आयुष्यातल्या याच काही खास गोष्टी आता समोर आल्या आहेत. ती तिथे नक्की काय करायची?

अमेरिकेत माधुरीचं सामान्य आयुष्य!

सिमी गरेवाल यांच्या चॅट शोमध्ये माधुरीने स्वतः या गोष्टी सांगितल्या आहेत. सकाळी लवकर उठण्यापासून ते नवऱ्याला डबा देण्यापर्यंत सगळी घरची कामं ती स्वतः करायची. तिने पहिल्यांदाच आपल्या वैवाहिक आयुष्याबद्दल आणि घरच्या जबाबदाऱ्यांबद्दल एवढ्या मोकळेपणाने गप्पा मारल्या. अमेरिकेतल्या आयुष्याबद्दल सांगताना माधुरी म्हणाली, 'माझे मिस्टर जेव्हा सर्जरीसाठी जायचे, तेव्हा मी सकाळी ५:३० वाजताच उठून त्यांच्यासाठी नाश्ता बनवायची. ते कामावर गेल्यावर मी पुन्हा थोडा वेळ झोपायची. त्या आयुष्यातला प्रत्येक क्षण मी खूप एन्जॉय केला.'

माधुरीची पर्सनल लाईफ..

माधुरीने १७ ऑक्टोबर १९९९ रोजी दक्षिण कॅलिफोर्नियामध्ये डॉ. श्रीराम नेने यांच्यासोबत पारंपरिक पद्धतीने लग्न केलं. त्यानंतर ती नवऱ्यासोबत अमेरिकेला निघून गेली. २००३ मध्ये त्यांना अरिन हा मुलगा झाला. त्यानंतर दोन वर्षांनी २००५ मध्ये दुसऱ्या मुलाचा, रायनचा जन्म झाला. लग्नानंतर सिनेमांपासून दूर गेलेल्या माधुरीने २००७ मध्ये 'आजा नचले' सिनेमातून बॉलिवूडमध्ये कमबॅक केलं. त्यानंतर तिने सिनेमे आणि टेलिव्हिजन क्षेत्रात पुन्हा आपली वेगळी ओळख निर्माण केली. नुकतीच ती ओटीटीवर रिलीज झालेल्या 'मा बहन' सिनेमातही दिसली होती.

शोमध्ये उलगडली गुपितं

सिमी गरेवाल यांच्या शोमध्ये माधुरीने डॉ. श्रीराम नेने यांच्याबद्दल तिला आवडलेल्या गोष्टी सांगितल्या. विशेष म्हणजे, जेव्हा ते दोघे पहिल्यांदा भेटले, तेव्हा माधुरी एक मोठी स्टार आहे हे श्रीराम नेने यांना अजिबात माहीत नव्हतं. त्यांनी तिचा एकही सिनेमा पाहिला नव्हता. 'इतरांना मदत करण्यासाठी मी नेहमी पुढे असते, माझा हाच स्वभाव त्यांना खूप आवडला,' असं माधुरीने एकदा सांगितलं होतं. सध्या माधुरी दीक्षित एंटरटेनमेंट इंडस्ट्रीत खूप ॲक्टिव्ह आहे. मोठ्या पडद्यापासून ते ओटीटी प्लॅटफॉर्मपर्यंत ती आपल्या टॅलेंटने प्रेक्षकांचं मनोरंजन करत आहे.